భర్త, అత్తింటివారు షాక్.. పెళ్లైన 2 రోజులకే బిడ్డకు జన్మనిచ్చిన నవవధువు

పెళ్లి అయిన 2 రోజులకే కొత్త పెళ్లి కుమార్తె కడుపు నొప్పి అని చెప్పింది. వెంటనే అప్రమత్తం అయిన భర్త, అత్తింటివారు.. ఆమెను హుటాహుటిన ఆస్పత్రికి తీసుకెళ్లారు. అక్కడ పరీక్షలు చేసిన డాక్టర్లు ఆమె 9 నెలల గర్భవతి అని తెలిసి షాక్ అయ్యారు. ఆ విషయం కాస్తా భర్త, అత్తమామలకు చెప్పడంతో వారు అవాక్కయ్యారు. వెంటనే ఆపరేషన్ చేయాలని చెప్పిన డాక్టర్లు.. ఆమెకు డెలివరీ చేసి బిడ్డను బయటికి తీశారు. ప్రస్తుతం తల్లి, బిడ్డ ఆరోగ్యంగానే ఉన్నట్లు తెలిపారు. అయితే పెళ్లి అయిన 2 రోజుల్లోనే ఆ పెళ్లి కుమార్తె బిడ్డకు జన్మనివ్వడం ఇప్పుడు తీవ్ర చర్చనీయాంశంగా మారింది. ఇక ఈ ఘటనపై వధువు, వరుడి తరఫు బంధువులకు తీవ్ర వాగ్వాదం చోటు చేసుకుంది. ఉత్తర్‌ప్రదేశ్‌లో జరిగిన ఈ సంఘటన ఇప్పుడు సంచలనం రేపుతోంది.

ఉత్తర్‌ప్రదేశ్ ప్రయాగ్‌రాజ్‌కు చెందిన ఓ యువతీ, యువకుడికి గత నెల 24వ తేదీన పెళ్లి జరిగింది. బంధుమిత్రుల సమక్షంలో ఘనంగా వారి పెళ్లి వేడుకను నిర్వహించారు. ప్రయాగ్‌రాజ్ జిల్లా జస్రా గ్రామంలో ఘనంగా నూతన వధూవరుల ఊరేగింపు కూడా నిర్వహించారు. ఇక రాత్రంతా బరాత్ జరగడంతో తెల్లవారుజామున ఆ వధూవరులు.. వరుడి ఇంటికి చేరుకున్నారు. అనంతరం ఎంతో సంతోషంతో కొత్త జీవితాన్ని ప్రారంభించేందుకు ఆ నవవధువు అత్తగారింట్లో అడుగుపెట్టింది. ఆ తర్వాత ఫిబ్రవరి 26వ తేదీన.. వచ్చిన చుట్టాలు, బంధువులకు కొత్త కోడలు టీ ఇచ్చింది. ఈ క్రమంలోనే ఆ నవవధువుకు పురిటి నొప్పులు వచ్చాయి. కడుపు నొప్పి భరించలేకపోతున్నానని.. భర్త, అత్తింటివారి చెప్పడంతో వారు హుటాహుటిన ఆమెను ఆస్పత్రికి తీసుకెళ్లారు.

అయితే ఆస్పత్రిలో ఆమె టెస్ట్‌లు చేసిన డాక్టర్లు.. ఆ నవ వధువు గర్భవతి అని, 9 నెలలు కూడా నిండినట్లు చెప్పారు. అది విన్నాక అంతా షాక్‌లో మునిగిపోయారు. ఆమెకు 2 గంటల్లోనే ఆపరేషన్ చేసి బిడ్డను బయటికి తీశారు. పెళ్లి జరిగిన 2 రోజులకే ఆ నవవధువు బిడ్డకు జన్మనివ్వడంతో అంతా నోరెళ్లబెట్టారు. అయితే ఆ కొత్త పెళ్లి కుమార్తె గర్భవతి అనే విషయాన్ని దాచి పెట్టి పెళ్లి చేశారని వరుడి కుటుంబ సభ్యులు తీవ్ర ఆగ్రహంతో రగిలిపోయారు.

కానీ.. వారిద్దరికీ గతేడాది మే నెలలోనే పెళ్లి సంబంధం కుదిరింది. కొన్ని కారణాల వల్ల పెళ్లి జరగడం కాస్త ఆలస్యం అయినట్లు పెళ్లి కుమార్తె తండ్రి వెల్లడించాడు. అయితే ఈ మధ్య కాలంలోనే తమ కుమార్తెకు, కాబోయే అల్లుడికి శారీరక సంబంధం ఏర్పడిందని వధువు తండ్రి పేర్కొన్నాడు. వారిద్దరికీ ముందు నుంచీ శారీరక సంబంధం ఉందని.. అందుకే తన కుమార్తె గర్భవతి అయిందని తెలిపాడు. అయితే వధువు తండ్రి చేసిన వాదనను వరుడు ఖండించాడు. తాను అలా చేయలేదని.. ఆమెను భార్యగా అంగీకరించే ప్రసక్తే లేదని తేల్చి చెప్పాడు.

ఇక ఈ ఆరోపణలను వరుడి తండ్రి కూడా నిరాకరించాడు. తమ కుమార్తెను భార్యగా అంగీకరించి.. అత్తగారింటికి తీసుకోకపోతే చట్టపరమైన చర్యలు తీసుకుంటామని వధువు తల్లి హెచ్చరించింది. ప్రస్తుతం ఈ వివాదం కాస్తా.. గ్రామ పంచాయతీకి చేరగా.. ప్రస్తుతం తల్లి, బిడ్డ కలిసి పుట్టింటికి చేరారు.