ప్రియురాలిని ఆట పట్టించేందుకు ఉరేసుకున్న యువకుడు

సరదాగా చేసి పనులు కొన్నిసార్లు ప్రమాదాలకు కారణం అవుతాయి. మరికొన్ని సార్లు ప్రాణాలకే ముప్పు తీసుకొస్తాయి. ప్రమాదమని తెలిసినా.. సరదా కోసం పిచ్చిగా ప్రవర్తించటం వల్ల ప్రాణాలు పోతుంటాయి. తాజాగా.. హైదరాబాద్ కాచిగూడలో అటువంటి ఘటనే చోటు చేసుకుంది. తాను ప్రేమించి పెళ్లి చేసుకోబోతున్న ప్రియురాలిని ఆటపట్టించేందుకు ఓ యువకుడు చేసిన పని అతడి ప్రాణం తీసుకుంది. సరదాగా వేసుకున్న ఉరితాడు గొంతుకు బిగుసుకొని ప్రాణాలు కోల్పోయాడు. దీంతో ప్రాణంగా ప్రేమించిన యువతితో పాటుగా.. అతడి కుటుంబంలోనూ తీవ్ర విషాదం అలుముకుంది.

వివరాల్లోకి వెళితే.. హైదరాబాద్ కాచిగూడ తిలక్‌నగర్‌లో నివాసముంటున్న ఆదర్శ్‌ అనే యువకుడు క్యాబ్ డ్రైవర్‌గా పని చేస్తున్నాడు. ఇతను నల్లకుంట ప్రాంతానికి చెందిన ఓ యువతిని ఐదేళ్లుగా ప్రేమిస్తున్నాడు. ఇద్దరు మనసులు కలవటంతో పెళ్లి చేసుకోవాలని డిసైడ్ అయ్యారు. ఇదే విషయాన్ని ఇంట్లో తల్లిదండ్రులకు చెప్పగా.. ఇరు కుటుంబాల పెద్దలు పెళ్లికి ఒప్పుకున్నారు. ఇప్పటికే నిశ్చితార్థం కూడా జరగ్గా.. వచ్చే ఏప్రిల్‌ నెలలో వివాహం జరగాల్సి ఉంది. అయితే సోమవారం అర్ధరాత్రి 12 గంటల సమయంలో కాబోయే భార్యను సరదాగా బయపెట్టాలని భావించాడు. ఇంట్లో ఉన్న సీలింగ్‌ ఫ్యాన్‌కు ఐరన్‌ బాక్స్‌ వైరుతో ఉరేసుకుంటున్నట్లు వీడియో కాల్ చేశాడు.

ఈ క్రమంలో వైరుతో ఉరేసుకోగా.. మెడకు గట్టిగా బిగుసుకుపోయింది. దీంతో ఊపిరాడక ఆదర్శ్ ఫ్యానుకు వేలాడుతూ మృతి చెందాడు. వీడియో కాల్‌లో ఇదంతా చూసిన ప్రియురాలు విషయాన్ని ఇంట్లో వారికి చెప్పింది. వారు వెళ్లి చూసేసరికి ఆదర్శ్ ఫ్యానుకు వేలాడుతూ కనిపించాడు. అతడ్ని వెంటనే కిందకు దింపి సమీపంలోని ఆసుపత్రికి తరలించారు. పరీక్షించిన డాక్టర్లు అప్పటికే అతను మృతి చెందినట్లు ధృవీకరించారు. దీంతో రెండు కుటుంబాల్లోనూ తీవ్ర విషాద ఛాయలు అలుముకున్నాయి. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని పరిశీలించారు. అనంతరం పోస్టుమార్టం నిమిత్తం ఉస్మానియా ఆస్పత్రికి తరలించారు. ఆదర్శ్ మృతి ఘటనపై కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.