కూతుర్ని హత్య చేసి పెట్రోల్ పోసి తగలబెట్టిన తండ్రి

శాస్త్ర, సాంకేతిక రంగాల్లో భారతదేశం అపూర్వ ప్రగతిని సాధిస్తున్నా.. కొన్ని విషయాల్లో మాత్రం ఇంకా వెనుకబడే ఉన్నట్లు అనిపిస్తోంది. చంద్రయాన్, గగన్‌యాన్ అంటూ ఇతర గ్రహాలపై త్రివర్ణ పతాకాన్ని ఎగరేస్తున్న ఈ కాలంలోనూ.. సగటు మనిషి కొన్ని విషయాల్లో తన ఇంటి గడప కూడా దాటలేకపోతున్నాడు. ఆచరించేదే ఆచారం.. పాటించేదే సంప్రదాయం., మంచితనమే మానవత్వం, మానవత్వమే మన మతం, కులం అనే అభిప్రాయాలకు రాలేకపోతున్నాడు. కులం కూడుపెట్టదని అర్థం చేసుకోలేకపోతున్నాడు. అందుకే పరువు కోసం ప్రాకులాడుతూ అల్లారుముద్దుగా పెంచుకున్న కూతుర్లు, కొడుకులపై అక్కసు వెళ్లగక్కుతున్నాడు. గుండెలపై పెట్టుకుని పెంచుకున్న పేగుబంధాన్ని తన చేతులతో తనే తెంపేసుకుంటున్నాడు. అలాంటి ఘటనే అనంతపురం జిల్లాలో చోటుచేసుకుంది.

అనంతపురం జిల్లా కసాపురం పోలీసులు వెల్లడించిన వివరాల ప్రకారం.. గుంతకల్లు పట్టణానికి చెందిన ఇద్దరు దంపతులకు నలుగురు కుమార్తెలు. వీరిలో ముగ్గురు కూతుర్లకు పెళ్లిళ్లు జరిపించారు. ఆఖరి అమ్మాయి బీటెక్ చదువుతోంది. అందరి కంటే చిన్నది కావటంతో ఆ అమ్మాయిని దంపతులు అల్లారుముద్దుగా పెంచుకున్నారు. ఉన్నదాంట్లో ఏమీ తక్కువ లేకుండా, గారాబంగా పెంచారు. మిగతా కుమార్తెల మాదిరిగా ఆఖరి అమ్మాయికి కూడా పెళ్లి జరిపించి, తమ బాధ్యత పూర్తి చేయాలని ఆ కుటుంబం భావించింది. ఇదే విషయాన్ని తండ్రి, తన కుమార్తెకు చెప్పాడు. అయితే ఆ యువతి తాను ప్రేమ వివాహం చేసుకుంటానని, ఓ యువకుణ్ని ప్రేమించానని తండ్రికి బదులిచ్చినట్లు తెలిసింది.

అయితే కూతురు ప్రేమించిన యువకుడిది వేరే కులం కావటంతో ఆమె తండ్రి అంగీకరించలేదు. ప్రేమ పెళ్లికి నిరాకరించాడు. తాను చెప్పిన వ్యక్తిని పెళ్లి చేసుకోవాలని నచ్చజెప్పే ప్రయత్నం చేశాడు. అయితే అందుకు ఆ యువతి అంగీకరించలేదు. దీంతో కూతురిపై కోపం పెంచుకున్న ఆ తండ్రి.. కూతురి ప్రేమ విషయం బయటకు తెలిస్తే పరువు పోతుందేమోననే భయంతో ఆమెను హత్య చేయాలని నిర్ణయించుకున్నాడు. మంగళవారం సాయంత్రం కసాపురం శివార్లలోని తిక్క స్వామి ఆలయం వద్దకు తీసుకెళ్లాడు. అక్కడే యువతికి ఉరివేసి హత్య చేశాడు. అనంతరం మృతదేహాన్ని పెట్రోల్ పోసి తగలబెట్టాడు.

అయితే ఏమైందో తెలియదు.. తన కూతుర్ని తాను హత్య చేశానంటూ ఆ తర్వాత గుంతకల్లు రెండో పట్టణ పోలీస్ స్టేషన్‌లో లొంగిపోయాడు. ఈ ఘటనపై పోలీసులు కేసు నమోదు చేసుకున్నారు. ఘటనా స్థలానికి చేరుకుని పరిశీలించారు. ఈ ఘటనపై ప్రస్తుతం దర్యాప్తు జరుపుతున్నట్లు పోలీసులు తెలిపారు.