"నాకోసం రెక్కల గుర్రం ఎక్కివస్తావని.. అత్తారింటికి నువ్వే నన్ను తీసుకెళ్తావని".. కల నిజం చేసిన వరుడు

నాకోసం రెక్కల గుర్రం ఎక్కి వస్తావని.. పగడపు దీవికి నువ్వే నన్ను తీసుకెళ్తావాని.. ఇక ఏనాటికి అక్కడే మనం ఉంటామనీ... అందరికీ ఈ పాట గుర్తుండే ఉంటుంది. ప్రతీ ఒక అమ్మాయి తనకు వచ్చే భర్త కోసం ఇలాంటి పాటలే పాడుకుంటూ కలలు కంటుంది. కానీ అది కలే అని తెలుసుకుని ఆపై ఏమీ చేయలేక సర్దుకుపోతూ జీవితం గడిపేస్తుంది. కానీ తాజాగా ఓ అబ్బాయి మాత్రం.. తాను పెళ్లి చేసుకున్న అమ్మాయికన్న ఈ కలను నెరవేర్చాడు. నిజంగానే రెక్కల గుర్రంపై ఆమెను అత్తారింటికి తీసుకెళ్లాడు. అలా అని అతడేదో పెద్ద ధనవంతుడు అనుకోకండి. సామాన్య మధ్యతరగతి కుటుంబానికి చెందినవాడే. కానీ భార్యపై ప్రేమతో ఇలా చేశాడు. ఆ పూర్తి వివరాలు మీకోసం.

హర్యానాలోని పల్వాల్ జిల్లా హసన్ పూర్ గ్రామానికి చెందిన కోమల్ అనే దళిత యువతి.. తండ్రి చాలా రోజుల క్రితమే చనిపోయారు. తల్లే కష్టపడి పెంచింది. ఈక్రమంలోనే ఆమె బాగా చదువుకుని ప్రభుత్వ ఉద్యోగం సంపాదించింది. పెళ్లీడు రావడంతో.. తల్లి ఆమెకు నుహ్ జిల్లాకు చెందిన కపిల్‌తో వివాహం ఖాయం చేసింది. ఈక్రమంలోనే కాబోయే భార్యాభర్తలిద్దరూ ఫోన్లు మాట్లాడుకుంటూ ఒకరి గురించి ఒకరు తెలుసుకున్నారు. తండ్రి చనిపోయినా కోమల్ పడిన కష్టాలు, వాటన్నిటినీ ఎదుర్కుని ఉద్యోగం సాధించడం వరకు అన్నీ చెప్పంది. దీంతో కాబోయే భార్యపై కపిల్‌కు మరింత ప్రేమ ఎక్కువైంది.

ఆమెకు ఎవరూ ఊహించని స్థాయిలో బహుమతి ఇవ్వాలనుకున్నాడు. ముఖ్యంగా ప్రతీ అమ్మాయి పెళ్లికి ముందు తన భర్త రెక్కల గుర్రంపై వస్తాడని ఊహించుకుంటుందని.. ఆ కలను నిజం చేయాలని అనుకున్నాడు. ఘనంగా పెళ్లి జరిగిన తర్వాత ఆమె అత్తారింటికి హెలికాప్టర్‌లో తీసుకు రావాలనుకున్నాడు. అందుకోసం ప్రత్యేకంగా 4 రూపాయల ఖర్చు చేసి మరీ ఓ ప్రైవేటు హెలికాప్టర్‌ను మాట్లాడుకున్నాడు. ఈ విషయాన్ని కాబోయే భార్యకు చెప్పకుండానే.. పెళ్లి అయిపోయాకా నేరుగా హెలికాప్టర్ వద్దకు తీసుకువెళ్లాడు.

హెలికాప్టర్‌ను చూసిన బంధువులు, గ్రామస్థులు అంతా అక్కడకు రాగా.. తన భార్యను మెట్టినింటికి తీసుకు వెళ్లేందుకే ఈ హెలికాప్టర్ తీసుకు వచ్చినట్లు కపిల్ వివరించాడు. అది చూసి అందరూ ముచ్చటపడిపోగా.. నవవధువు అయితే తెగ సంబుర పడిపోయింది. తన భర్త తనకోసం అంత డబ్బులు ఖర్చు చేసి మరీ హెలికాప్టర్ తెప్పిస్తాడని ఏమాత్రం ఊహించలేదని.. చాలా సంతోషంగా ఉందని చెప్పుకొచ్చింది. ప్రస్తుతం ఇందుకు సంబంధించిన వీడియో నెట్టింట వైరల్ అవుతోంది.