ఘనంగా ఎంపీ తేజస్వీ సూర్య వివాహం

 దేశంలోనే అత్యంత పిన్న వయస్కుడైన ఎంపీగా రికార్డు సాధించిన బీజేపీ పార్లమెంట్ సభ్యుడు తేజస్వి సూర్య వివాహం నేడు ఘనంగా జరిగింది. భరత నాట్య కళాకారిణిగా, గాయనిగా విపరీతమైన గుర్తింపు తెచ్చుకున్న ఓ అందాల బుట్టబొమ్మ మెడలో మూడు ముళ్లు వేశారు. ఈ వేడుకకు అనేక మంది కేంద్ర మంత్రులు, ఎంపీలు వచ్చి నూతన వధూవరులను ఆశీర్వదించారు. సంప్రదాయ బద్ధంగా జరిగిన ఈ వివాహ తంతు వేడుకల్లో.. ఎంపీ, ఆయన భార్య చాలా అందంగా కనిపిస్తున్నారు. ప్రస్తుతం ఇందుకు సంబంధించిన ఫొటోలు నెట్టింట వైరల్ అవుతున్నాయి. ఆ పూర్తి వివరాలు మీకోసం.

బీజేపీ ఎంపీ తేజస్వి సూర్య వివాహం బెంగళూరులో ఈరోజు ఉదయం ఘనంగా జరిగింది. ముఖ్యంగా చెన్నైకి చెందిన ప్రముఖ గాయని, శాస్త్రీయ సంగీతం, భరతనాట్య కళాకారిణి అయిన శివశ్రీ స్కంద ప్రసాద్‌ను పెళ్లి చేసుకున్నారు. వీరి పెళ్లికి కేంద్ర మంత్రులు అర్జున్ రామ్ మేఘవాల్, వి సోమన్న, బీజేపీ నేతలు అన్నామలై, అమిత్ మాలవీయ, బీవై విజయేంద్ర తదితరులు వచ్చారు. నూతన దంపతులపై అక్షితలు వేసి మరీ ఆశీర్వదించారు. ప్రస్తుతం ఇందుకు సంబంధించిన ఫొటోలు నెట్టింట తెగ వైరల్ అవుతుండగా.. ఎంపీ చేసుకున్న అమ్మాయి ఎవరో తెలుసుకోవాలని అంతా ఆసక్తి కనబరుస్తున్నారు.

ఎంపీ సూర్య వివాహం చేసుకున్న శివ శ్రీ స్కంద ప్రసాద్.. శాస్త్ర యూనివర్సిటీ నుంచి బయో ఇంజినీరింగ్ పూర్తి చేశారు. మద్రాస్ యూనివర్సిటీ నుంచి భరత నాట్యంలో ఎంఏ, మద్రాస్ సంస్కృత కాలేజీలో సంస్కృతంలో ఎంఏ పట్టా పుచ్చుకున్నారు. పొన్నియిన్ సెల్వన్ పార్ట్-2లో కన్నడ వర్షన్‌లో శివశ్రీ ఓ పాట కూడా పాడగా.. అది చాలా వైరల్ అయింది. ప్రస్తుతం శివశ్రీ స్కంద్ యూట్యూబ్ ఛానెల్ పెట్టి వీడియోలు కూడా చేస్తుండగా.. 2 లక్షల మందికి పైగా సబ్‌స్ర్కైబర్లు ఉన్నారు.

ఇదిలా ఉండగా తేజస్వీ సూర్య వృత్తి రీత్యా లాయర్. అయితే రాజకీయాల మీద ఉన్న ఆసక్తితో ఈ రంగంలోకి వచ్చి బెంగళూరు సౌత్ నియోజకవర్గం నుంచి ఎంపీగా పోటీ చేశారు. ఇప్పటి వరకు మొత్తం రెండు సార్లు గెలుపొంది.. పార్లమెంటు శాసన సభ్యుడిగా పదవీ బాధ్యతలు స్వీకరించారు. ప్రస్తుతం కూడా ఎంపీగానే పని చేస్తున్నారు. అతిపిన్న వయసులోనే ఎంపీగా గెలిచి తేజస్వీ సూర్య రికార్డు సాధించారు.