ట్రెండింగ్‌లో రోహిత్ శర్మ.. ఛాంపియన్స్ ట్రోఫీ తర్వాత రిటైర్మెంట్ ఇస్తాడంటూ నెట్టింట వైరల్!

ఛాంపియన్స్ ట్రోఫీ ముగింపునకు వచ్చిన వేళ టీమిండియా కెప్టెన్ రోహిత్ శర్మ న్యూస్ ఇప్పుడు ట్రెండింగ్‌గా మారింది. రికార్డులో, అవార్డులతోనో రోహిత్ న్యూస్ వైరల్ కాలేదు.. హిట్‌మ్యాన్ ఎప్పుడు రిటైర్మెంట్ ప్రకటిస్తాడా అనే న్యూస్‌తో నెట్టింట వైరల్ అవుతున్నాడు. టీ20 వరల్డ్‌కప్‌లో ఛాంపియన్స్‌గా నిలిచిన వెంటనే టీమిండియా సీనియర్లు రోహిత్ శర్మ, కోహ్లి, రవీంద్ర జడేజా పొట్టి ఫార్మాట్‌కు వీడ్కోలు పలికారు. ప్రస్తుతం ఛాంపియన్స్ ట్రోఫీ తర్వాత రోహిత్ ఎలాంటి నిర్ణయం తీసుకుంటాడో అని అభిమానులతో పాటు బీసీసీఐ కూడా ఆసక్తిగా ఎదురుచూస్తోంది.

ఛాంపియన్స్ ట్రోఫీ జరుగుతున్న సమయంలోనే సీనియర్ ఆటగాళ్లు వన్డేలకు వీడ్కోలు పలికారు. సెమీ ఫైనల్స్‌లో భారత్‌పై ఓడిపోయిన తర్వాత ఆస్ట్రేలియా జట్టుకు కెప్టెన్‌గా వ్యవహరించిన స్టీవ్ స్మిత్ రిటైర్మెంట్ ప్రకటించగా.. ఆ తర్వాతి రోజే బంగ్లాదేశ్ ఆటగాడు ముష్ఫికర్ రహీం కెరీర్‌కు ముగింపు పలికాడు. ఇంగ్లండ్ ఓటములకు నైతిక బాధ్యత వహిస్తూ జాస్ బట్లర్ కూడా తన కెప్టెన్సీకి రాజీనామా చేశాడు. ఈ నేపథ్యంలోనే టీమిండియా కెప్టెన్ రోహిత్ శర్మ వన్డేలకు రిటైర్మెంట్ ప్రకటిస్తాడా? అని నెట్టింట చర్చ జరుగుతోంది.

"ఛాంపియన్స్ ట్రోఫీ తర్వాత రోహిత్ ఎలాంటి నిర్ణయం తీసుకుంటాడో అని బోర్డు ఎదురుచూస్తోంది. తనలో ఇంకా క్రికెట్ ఆడే సత్తా ఉందని రోహిత్ భావిస్తున్నాడు. భవిష్యత్ ప్రణాళికల గురించి ఇప్పటికే అతనితో చర్చించాం. వచ్చే వన్డే వరల్డ్‌కప్ కోసం జట్టు సిద్ధం కావాలంటే స్థిరమైన కెప్టెన్ అవసరం.. అది రోహిత్‌కు తెలుసు. ఛాంపియన్స్ ట్రోఫీ తర్వాత రోహిత్ రిటైర్మెంట్ ఆలోచన చేస్తే తర్వాత ఏం చేయాలో బోర్డు చూస్తుంది. సెంట్రల్ కాంట్రాక్టుల విషయంలోనూ మార్పులు చేసే అవకాశం కూడా ఉంది" అంటూ బీసీసీఐ వర్గాలు వెల్లడించాయి.

రోహిత్ శర్మ ఫిట్‌నెస్ గురించి వస్తు్న్న విమర్శలపై టీమిండియా టీ20 కెప్టెన్ సూర్యకుమార్ యాదవ్ తాజాగా స్పందించాడు. రోహిత్ ఫిట్‌నెస్ విషయంలో చాలా శ్రమిస్తాడని, అందులో ఈరోజు ఉన్నత స్థానంలో ఉన్నాడంటూ సపోర్ట్ చేశాడు. 15-20 ఏళ్ల నుంచి రోహిత్ దేశం కోసం ఆడుతున్న తీరు గర్వించదగినది అంటూ చెప్పాడు. అదేవిధంగా ఛాంపియన్స్ ట్రోఫీ ఫైనల్‌కు చేరుకున్న టీమిండియా విజేతగా నిలిచి స్వదేశానికి రావాలని కోరుకున్నాడు.