ఇంగ్లండ్ కెప్టెన్‌గా బెన్ స్టోక్స్? అందరి చూపు అతనివైపే!

ఛాంపియన్స్ ట్రోఫీలో ఇంగ్లండ్ జట్టు దారుణంగా విఫలమైంది. వరుస ఓటములతో ఆ జట్టు కెప్టెన్ జాస్ బట్లర్ ఏకంగా కెప్టెన్ పదవికే రాజీనామా చేశాడు. దాంతో ఇప్పుడు ఆ జట్టును గాడిలో పెట్టే ఆటగాడి వేటలో ఇంగ్లండ్ క్రికెట్ బోర్డ్ ఉంది. ఇంగ్లండ్ టెస్టు కెప్టెన్ బెన్ స్టోక్స్‌నే వైట్ బాల్ క్రికెట్‌కు సారథిగా చేసే ఆలోచనలో ఉన్నారు.

ఛాంపియన్స్ ట్రోఫీకి ముందు భారత్‌తో జరిగిన మూడు వన్డేల సిరీస్‌లోనూ ఇంగ్లండ్ ఓటమిపాలయింది. కనీసం ఒక్క మ్యాచ్ కూడా గెలవలేదు. ఛాంపియన్స్ ట్రోఫీలోనూ ఆస్ట్రేలియాపై భారీ స్కోర్ చేసినా ఓటమి తప్పలేదు. అప్ఘనిస్తాన్‌పై కూడా ఓడిపోవడంతో కెప్టెన్ జాస్ బట్లర్ ఓటములకు నైతిక బాధ్యత వహిస్తూ రిజైన్ చేశాడు. ఏడాది కాలంలో ఇంగ్లండ్ జట్టు 11 వన్డేలు ఆడితే పది మ్యాచ్‌లలో ఓటమి పాలయింది.

బట్లర్ తర్వాత కెప్టెన్‌గా ఎవర్ని నియమించాలి అని ఇంగ్లండ్ క్రికెట్ బోర్డు డైలమాలో పడింది. హ్యారీ బ్రూక్ పేరు బాగా వినిపిస్తున్నా ఇలాంటి పరిస్థితుల్లో జట్టును ముందుకు నడపగలడా అనే ఆలోచనలో పడ్డారు. టెస్టు కెప్టెన్ బెన్ స్టోక్సే సరైన వ్యక్తని ఇంగ్లండ్ క్రికెట్ బోర్డు మేనేజింగ్ డైరెక్టర్ రాబర్ట్ విలియమ ట్రెవర్ కీ (రాబ్ కీ) అభిప్రాయపడ్డాడు.

"నేను చూసిన వాళ్లల్లో బెన్ స్టోక్స్ బెస్ట్ కెప్టెన్. అతని వైపు చూడటం తప్పేమీ కాదని నాకు అనిపిస్తుంది. మేమైతే ఇలాంటి పరిస్థితుల్లో ఇంగ్లండ్ జట్టును గట్టున పడేసే బెస్ట్ వ్యక్తి కోసం ఎదురుచూస్తున్నాం. వన్డేల్లో మా జట్టు చాలా వెనుకబడి ఉంది. నిజానికి చెప్పాలంటే ఇయాన్ మోర్గాన్ తర్వాత వైట్ బాల్ క్రికెట్‌లో మంచి కెప్టెన్‌నే ఎంచుకోలేకపోయాం" రాబ్ కీ అన్నాడు.

జో రూట్ తర్వాత ఇంగ్లండ్ టెస్టు కెప్టెన్‌గా 33 సంవత్సరాల బెన్ స్టోక్స్ బాధ్యతలు స్వీకరించాడు. గత 16 నెలలుగా బెన్ స్టోక్స్ కేవలం టెస్టు క్రికెట్‌పైనే దృష్టి పెట్టాడు. వన్డేలకు గుడ్ బై చెప్పిన స్టోక్స్ జట్టు అభ్యర్థన మేరకు 2023 వన్డే వరల్డ్‌కప్‌లో ఆడాడు. ఒకవేళ బెన్ స్టోక్స్‌ని కెప్టెన్‌ని చేస్తే కోచ్ బ్రాండన్ మెక్‌కల్లమ్‌తో కలిసి టెస్టు, వన్డేల్లో ప్రయాణించాల్సి ఉంటుంది.