ఈపీఎఫ్ కీలక అప్డేట్.... ఏటీఎం నుంచే పీఎఫ్ విత్‌డ్రా

మీకు పీఎఫ్ అకౌంట్ ఉందా.? అయితే శుభవార్త. గతంలో చెప్పినట్లుగానే ఈపీఎఫ్ఓ సర్వీసులు మరింత సులభంగా, వేగంగా అందనున్నాయి. అంటే ముఖ్యంగా ఈపీఎఫ్ఓ ట్రాన్సాక్షన్స్‌కు సంబంధించి కీలక అప్డేట్ వచ్చింది. గతంలోనే ఈపీఎఫ్ఓ 3.O వస్తుందని కేంద్ర కార్మిక శాఖ కార్యదర్శి ప్రకటించగా.. ఇప్పుడు కేంద్ర కార్మిక శాఖ మంత్రి కీలక వివరాలు వెల్లడించారు. ఇక మీదట ఈపీఎఫ్ఓ లావాదేవీలు 3.O. వెర్షన్‌లోకి మారబోతున్నట్లు తెలిపారు. బ్యాంక్ తరహాలోనే ఈపీఎఫ్ఓ సేవలు, కార్యకలాపాలు నిర్వహించేందుకు వీలుగా ఏర్పాట్లు జరుగుతున్నట్లు వివరించారు. తాజాగా .. హైదరాబాద్ బేగంపేటలో నూతనంగా నిర్మించిన ఈపీఎఫ్ఓ ఆఫీస్, తెలంగాణ రీజనల్ ఆఫీస్, బంజారాహిల్స్ రీజనల్ ఆఫీసుల్ని వర్చువల్‌గా ప్రారంభించారు.

ఈ క్రమంలోనే మాండవీయ కీలక వ్యాఖ్యలు చేశారు. ఈపీఎఫ్ఓ 3.O లో భాగంగా.. ఏటీఎంల దగ్గరికి వెళ్లి నేరుగా పీఎఫ్ చందాదారులు.. తమ ఈపీఎఫ్ డబ్బుల్ని కూడా విత్‌డ్రా చేసుకోవచ్చని చెప్పారు. అంటే ప్రస్తుతం బ్యాంక్ ఏటీఎం/డెబిట్ కార్డులతోనే ఈ సేవలు పొందే అవకాశం ఉండగా.. త్వరలో దీనికి సంబంధించి ప్రత్యేకంగా ఈపీఎఫ్ కార్డును కూడా జారీ చేయనున్నట్లు తెలుస్తోంది.

చిన్న చిన్న సవరణలు/మార్పుల కోసం ఆన్‌లైన్లోనే అప్డేట్ చేసుకునే వీలు కల్పిస్తున్నట్లు మాండవీయ వివరించారు. ఈపీఎఫ్ఓ 3.O అమల్లోకి వస్తే.. ఎన్నో ఇబ్బందులు తప్పనున్నట్లు తెలుస్తోంది. ముఖ్యంగా కార్యాలయాల వద్ద లాంగ్ క్యూలు, సమయం వృథా అయ్యే డాక్యుమెంటేషన్ ప్రాసెస్, అభ్యర్థనల తిరస్కరణ, వాయిదాలు ఇలా వీటి బెడద తప్పేలా ఉంది. త్వరలో వీటన్నింటికీ పరిష్కారం రాబోతుంది. ఈపీఎఫ్ఓ సేవలు, సర్వీసులు మరింత సులభంగానే అందుకోవచ్చని ఇప్పుడు మాండవీయ చెప్పారు. దీంతో ముఖ్యంగా రిటైర్మెంట్ తర్వాత ఎవరైనా ఇబ్బందులు పడకుండా సేవలు పొందే వీలు కల్పించనున్నారు.

ఈపీఎఫ్ఓ 3.O తో ఏమేం మారనున్నాయి.?

ఏటీఎం విత్‌డ్రా- ఇక మీదట పీఎఫ్ డబ్బుల్ని.. నేరుగా ఏటీఎంల నుంచి విత్‌డ్రా చేసుకునే వీలుంటుంది.

డైరెక్ట్ యాక్సెస్- మీ అకౌంట్‌‌ను మీకు మీరే స్వయంగా నిర్వహించుకోవచ్చు. మీ జోక్యాన్ని మరింత సులభతరం చేస్తుంది. ఆధార్, పాన్ కార్డు వంటి వాటిని ఉపయోగించడం ద్వారా పూర్తిగా ఈ ప్రక్రియను డిజిటల్ రూపంలోనే చేసుకోవచ్చు.

యజమానిపై ఆధారపడటం తగ్గుతుంది?- ఈపీఎఫ్ఓ 3.O తో విత్‌డ్రా సహా ఇతర అభ్యర్థనల కోసం యజమానిపై ఆధారపడటం తగ్గుతుందని చెప్పొచ్చు.

డిజిటల్ ట్రాన్స్‌ఫర్మేషన్- వ్యక్తిగత వివరాల్ని అప్డేట్ చేసుకోవడం కూడా మరింత సులభం కానుంది. ఇక్కడ ఎలాంటి డాక్యుమెంటేషన్ అవసరం లేకుండా.. యజమాని జోక్యం లేకుండా పూర్తిగా డిజిటల్ రూపంలో చేసుకోవచ్చు. చెల్లింపుల్ని డిజిటల్‌గానే .. భౌతిక జోక్యం లేకుండా తీసుకోవచ్చు.

ఎఫీషియన్సీ- ప్రాసెసింగ్‌లో జాప్యం తగ్గుతుంది. పేపర్ వర్క్ తగ్గుతుంది. ఈపీఎఫ్ఓ రిలేటెడ్ ఫైనాన్షియల్ ఇష్యూస్‌కు సంబంధించి తక్షణ పరిష్కారం లభిస్తుంది.