హెచ్‌డీఎఫ్‌సీ బ్యాంక్ లోన్ వడ్డీ రేట్లు తగ్గింపు.. మార్చి 7 నుంచే అమల్లోకి

దేశంలోనే అతిపెద్ద ప్రైవేట్ రంగ బ్యాంకు.. హెచ్‌డీఎఫ్‌సీ బ్యాంకు గుడ్‌న్యూస్ చెప్పింది. మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేటును  తగ్గిస్తున్నట్లు వెల్లడించింది. ఒక లోన్ టెన్యూర్‌పై 5 బేసిస్ పాయింట్లు తగ్గించింది. సవరించిన తర్వాత.. ఇప్పుడు హెచ్‌డీఎఫ్‌సీ బ్యాంకులో ఎంసీఎల్ఆర్ 9.20 శాతం నుంచి గరిష్టంగా 9.45 శాతం వరకు ఉంది. ఈ సవరించిన వడ్డీ రేట్లు 2025, మార్చి 7 నుంచి అమల్లోకి వస్తున్నట్లు బ్యాంక్ తన అధికారిక వెబ్‌సైట్‌లో వెల్లడించింది. ఇప్పుడు రెండు సంవత్సరాల టెన్యూర్ ఎంసీఎల్ఆర్ 5 బేసిస్ పాయింట్లు తగ్గించి.. 9.45 శాతం నుంచి 9.40 శాతానికి చేర్చింది. అంటే రెండేళ్ల టెన్యూర్ ఎంసీఎల్ఆర్‌కు లింక్ అయి ఉన్న లోన్ వడ్డీ రేట్లు తగ్గుతాయని చెప్పొచ్చు. దీంతో.. కట్టాల్సిన ఈఎంఐ తగ్గుతుందని చెప్పొచ్చు.

ఇప్పుడు ఒక నెల టెన్యూర్ ఎంసీఎల్ఆర్ ఏం మార్చలేదు. ఇది 9.20 శాతం వద్దనే స్థిరంగా ఉంది. 3 నెలల ఎంసీఎల్ఆర్ 9.30 శాతం వద్ద యథాతథంగానే ఉంది. 6 నెలలు, ఏడాది టెన్యూ్ర్ ఎంసీఎల్ఆర్ 9.40 శాతంగా ఉంది. ఇక ముందుగా చెప్పుకున్నట్లుగా రెండేళ్ల ఎంసీఎల్ఆర్ 9.40 శాతానికి తగ్గింది. మూడేళ్ల ఎంసీఎల్ఆర్ 9.45 శాతంగా ఉంది.

ఎంసీఎల్ఆర్ అనేది రుణ ఆధారిత వడ్డీ రేటు. అన్ని బ్యాంకుల్లో ఒకే విధానం ఉండాలన్న ఉద్దేశంతో రిజర్వ్ బ్యాంక్ ఆఫ్ ఇండియా  ఈ ఎంసీఎల్ఆర్ విధానాన్ని తీసుకొచ్చింది. ఎంసీఎల్ఆర్ అంటే కనీస వడ్డీ రేటు అన్నమాట. అంటే ఎంసీఎల్ఆర్ కంటే తక్కువ వడ్డీకి బ్యాంకులు లోన్లు ఇచ్చేందుకు వీల్లేదు. ఎంసీఎల్ఆర్ విధానాన్ని ఆర్బీఐ 2016 సంవత్సరంలో లాంఛ్ చేసింది. ఎంసీఎల్ఆర్ అన్ని రకాల ఫ్లోటింగ్ లోన్లపై వర్తిస్తుంది. ఫ్లోటింగ్ లోన్లు అంటే.. లోన్ వడ్డీ రేట్లు మారినప్పుడు.. ఇక్కడ ఈఎంఐ లేదా టెన్యూర్ మారు తుంటుంది. ఫిక్స్‌డ్ వడ్డీ రేటుపై వర్తించదు. ఈ ఎంసీఎల్ఆర్‌కు హోం లోన్లు, పర్సనల్ లోన్లు, ఆటో లోన్లు వంటివి లింక్ అయి ఉంటాయి.

ఇక హెచ్‌డీఎఫ్‌సీ బ్యాంకు బేస్ రేటు విషయానికి వస్తే ఇది 9.45 శాతంగా ఉంది. ఇది 2024, సెప్టెంబర్ 9 నుంచే అమలవుతుంది. హెచ్‌డీఎఫ్‌సీ బ్యాంకు బెంచ్‌మార్క్ పీఎల్ఆర్ 17.95 శాతంగా ఉంది. ఇది 2024, సెప్టెంబర్ 9 నుంచి వర్తిస్తుంది. హెచ్‌డీఎఫ్‌సీ బ్యాంక్ హోం లోన్ వడ్డీ రేట్లు వేతన జీవులకు, స్వయం ఉపాధి పొందుతున్న వారికి కనీం 9.40 శాతం నుంచి గరిష్టంగా 9.95 శాతంగా ఉంది. ఇక స్పెషల్ కేటగిరీ రేట్లు 8.70 శాతం నుంచి 9.55 శాతంగా ఉన్నాయి. ఇది కూడా 2025, మార్చి 7 నుంచే వర్తిస్తుంది. ఆర్బీఐ ఇటీవల కీలక రెపో రేట్లను 25 బేసిస్ పాయింట్ల మేర తగ్గించి 6.50 శాతం నుంచి 6.25 శాతానికి చేర్చింది. దీంతోనే బ్యాంకులు రుణాలపై వడ్డీ రేట్లను తగ్గిస్తున్నాయని చెప్పొచ్చు.