రాష్ట్రాన్ని వైసీపీ నేతలు అప్పుల కుప్పగా మార్చారు
Andhra Pradesh Telugu | Suryaa Desk | Published : Sat, Mar 08, 2025, 11:42 AM
అసెంబ్లీలో డ్రాపౌట్లు, మండలిలో వాకౌట్లు చేస్తున్నారంటూ వైసీపీ సభ్యుల తీరుపై రాష్ట్ర ఆర్థికశాఖ మంత్రి పయ్యావుల కేశవ్ మండిపడ్డారు. తీరు మార్చుకోకపోతే త్వరలోనే ప్రజాజీవితం నుంచీ డ్రాప్ అవుతారని హెచ్చరించారు. శుక్రవారం శాసనమండలిలో బడ్జెట్పై జరిగిన చర్చకు ఆయన సమాధానమిచ్చారు. బక్కోడి బువ్వను లాక్కుని బలిసిపోదామనుకున్నారని, అందుకే 11 సీట్లకే జనం పరిమితం చేశారని వైసీపీని ఉద్దేశించి మంత్రి అన్నారు. ప్రజల మంచి కోసం వైసీపీ సభ్యుల సద్విమర్శలు స్వీకరిస్తామని తెలిపారు. ‘‘సూపర్ సిక్స్ వాగ్దానాలు నిలబెట్టుకునేలా బడ్జెట్లో కేటాయింపులు చేశాం. గత ప్రభుత్వ నిర్వాకం వల్ల ఆర్థిక విధ్వంసం చోటుచేసుకుంది. దీనివల్ల రాష్ట్రానికి వచ్చే ఆదాయమంతా ఉద్యోగుల జీతభత్యాలకు, అప్పులకు వడ్డీల చెల్లింపులకే సరిపోతోంది. ఐదేళ్ల వైసీపీ పాలనలో రాష్ట్రాన్ని అప్పుల కుప్పగా మార్చడమే దీనికి కారణం. అదంతా చూస్తే విధ్వంసం అనేది చిన్న మాటలా అనిపిస్తుంది. మేం చేసిన అప్పులను సంపద సృష్టి కోసం ఖర్చుపెడుతున్నాం. మా విధానాల వల్ల ప్రభుత్వ ఆదాయం పెరుగుతోంది. మా సంపద సృష్టి అంతా సమాజం, ప్రజల కోసం వెచ్చిస్తాం. కానీ, వైసీపీ వారి సంపద సృష్టి అంతా రుషికొండ ప్యాలె్సలు, ఎస్టేట్ల కోసమే ఖర్చుపెట్టారు. బోత్ ఆర్ నాట్ సేమ్’’ అని కేశవ్ స్పష్టం చేశారు. పట్టిసీమ ప్రాజెక్టు నిర్మించడానికి ముందంతా రాయలసీమ, కృష్ణా డెల్టా రైతుల మధ్య గొడవలు జరిగేవని, చంద్రబాబు ప్రయత్నంతో వారంతా సఖ్యతతో ఉంటున్నారన్నారు.
|
|