సాఫ్ట్ వర్సెస్ హార్డ్ ఎంక్వైరీ.. క్రెడిట్ స్కోర్‌పై ఎలాంటి ప్రభావం ఉంటుంది

బ్యాంకులు రుణాలు ఇవ్వాలన్నా, తక్కువ వడ్డీకే లోన్ దొరకాలన్నా మంచి క్రెడిట్ స్కోర్ ఉండాలని చెబుతుంటారు. క్రెడిట్ స్కోర్ అనేది చాలా ముఖ్యమే. క్రెడిట్ స్కోరును పెంచుకోవడంతో పాటుగా తగ్గకుండా చూసుకోవడమూ చాలా కీలకం. ఈ విషయంలో ప్రధానంగా వినిపించే అంశాలు సాఫ్ట్ ఎంక్వైరీ, హార్డ్ ఎంక్వైరీ. మరి ఈ రెండు అంశాల ద్వారా క్రెడిట్ హిస్టరీ చెక్ చేసుకున్నప్పుడు మన క్రెడిట్ స్కోర్‌పై ఎలాంటి ప్రభావం ఉంటుంది? రెండింటి మధ్య తేడా ఏంటి? అనే విషయాలు ఇప్పుడు మనం తెలుసుకుందాం.

ఒక వ్యక్తి ఆర్థిక పరిస్థితిని క్రెడిట్ రిపోర్ట్, స్కోర్ సూచిస్తుంది. 750 పైన క్రెడిట్ స్కోర్ ఉంటే మంచి స్కోర్‌గా పరిగణిస్తారు. ఇలా క్రెడిట్ స్కోర్ చెక్ చేసుకోవడాన్ని సాఫ్ట్ ఎంక్వైరీ అంటారు. ప్రీ అప్రూవ్డ్ లేదా ప్రీ క్వాలిఫైడ్ రుణాలు లేదా క్రెడిట్ కార్డు, ఎంప్లాయిమెంట్ బ్యాక్ గ్రౌండ్ చెక్ వంటివీ సాఫ్ట్ ఎంక్వైరీ పరిధిలోకే వస్తాయి. దీని ద్వారా క్రెడిట్ స్కోరుకు ఎలాంటి నష్టమూ ఉండదు. ఇక మరోవైపు.. లోన్ లేదా క్రెడిట్ కార్డు కోసం బ్యాంకును సంప్రదించినప్పుడు లోన్ దరఖాస్తును ఆమోదించేందుకు క్రెడిట్ స్కోరును పరిశీలిస్తాయి. దీనినే హార్డ్ ఎంక్వైరీ అంటారు. వెహికల్ లోన్, తనఖా రుణాలు, వ్యక్తిగత లోన్స్ వంటివి హార్డ్ ఎంక్వైరీ కిందకు వస్తాయి. అంటే మీరు లోన్ కోసం వేచి ఉన్నట్లు అర్థం. మీరు బ్యాంకును సంప్రదించిన ప్రతిసారీ ఆ వివరాలు రిపోర్ట్‌లో నమోదు చేస్తారు. ఫలితంగా క్రెడిట్ స్కోరుపై ప్రతికూల ప్రభావం పడుతుంది.

హార్డ్ ఎంక్వైరీ వల్ల మీ క్రెడిట్ స్కోర్ తగ్గిపోతుంది. అయితే అది తాత్కాలికమేనని చెప్పవచ్చు. క్రెడిట్ రిపోర్టులో మాత్రం ఆ వివరాలు దీర్ఘకాలం పాటు కొనసాగుతుంటాయి. అందుకే లోన్ కోసం పదే పదే వివిధ బ్యాంకులను సమప్రదించకూడదు. ఈ విషయాన్ని కచ్చితంగా గుర్తుంచుకోవాలి. సాధారణంగా హార్డ్ ఎంక్వైరీ వల్ల 5-10 పాయింట్ల మేర క్రెడిట్ స్కోర్ తగ్గొచ్చు. తక్కువ సమయంలో ఎక్కువ సార్లు బ్యాంకులకు వెళ్లి లోన్ కోసం ప్రయత్నించినట్లయితే అలాంటి సందర్భంలో క్రెడిట్ స్కోర్ భారీగా పడిపోయే ప్రమాదం ఉంటుంది.

మీకు అవసరమైనప్పుడు మాత్రమే లోన్ లేదా క్రెడిట్ కార్డును తీసుకునేందుకు ప్రయత్నించాలి. ఒక్కో దరఖాస్తు మధ్య కనీసం 3-6 నెలల వ్యవధి ఉండాలి. ఏదైనా లోన్ కోసం ప్రయత్నించే ముందు సాఫ్ట్ ఎంక్వైరీ కిందకు వచ్చే ప్రీ అప్రూవ్డ్ లోన్స్ ఏమైనా ఉన్నాయేమో చెక్ చేసుకోవాలి. తద్వారా హార్డ్ ఎంక్వైరీ నుంచి తప్పించుకునే అవకాశం లభిస్తుంది. బోనస్‌లు, రివార్డులు ఎక్కువగా ఉన్నాయని క్రెడిట్ కార్డుల కోసం దరఖాస్తు చేసుకోవడమూ సరైన నిర్ణయం కాదని చెప్పవచ్చు. క్రెడిట్ కార్డు దరఖాస్తు కూడా హార్డ్ ఎంక్వైరీ కిందకే వస్తుంది.