ఏపీలో కొత్తగా ఫిషింగ్ హార్బర్, రెండు జెట్టీలు అక్కడే

ఇటు ఆంధ్రప్రదేశ్‌లో, అటు కేంద్రంలో ఎన్డీఏ సర్కారు అధికారంలో ఉండటంతో రాష్ట్రంలో దీర్ఘకాలంగా పెండింగ్‌లో ఉన్న పలు ప్రాజెక్టులకు మోక్షం లభిస్తోంది. అలాగే కొత్త ప్రాజెక్టులు కూడా దక్కుతున్నాయి.ఈ క్రమంలోనే శ్రీకాకుళం జిల్లాలో ఫిషింగ్‌ హార్బర్‌, రెండు ఫిషింగ్‌ జెట్టీలు ఏర్పాటు చేయాలంటూ స్థానిక ఎంపీ, కేంద్ర పౌరవిమానయాన శాఖ మంత్రి కింజరాపు రామ్మోహన్ నాయుడు కేంద్ర ప్రభుత్వాన్ని కోరారు. ఈ మేరకు కేంద్ర నౌకాయాన శాఖ మంత్రి శర్బానంద సోనోవాల్‌‌కు రామ్మోహన్‌ నాయుడు లేఖ రాశారు. శ్రీకాకుళం నియోజకవర్గం పరిధిలో 197 కిలోమీటర్ల మేరకు తీర ప్రాంతం ఉందన్న రామ్మోహన్ నాయుడు.. ఇక్కడి ప్రజలు మత్స్య సంపదపైనే ప్రధానంగా ఆధారపడి జీవిస్తున్నారని కేంద్ర మంత్రికి లేఖలో వివరించారు. ఈ నేపథ్యంలో శ్రీకాకుళం జిల్లాలో ఫిషింగ్‌ హార్బర్‌, జెట్టీలు ఏర్పాటు చేయాల్సిన అవసరం ఉందని లేఖలో కోరారు.

శ్రీకాకుళం జిల్లా సంతబొమ్మాలి మండలం భావనపాడు వద్ద ఫిషింగ్ హార్బర్ ఏర్పాటు చేయాలన్న రామ్మోహన్ నాయుడు.. గార మండలం కళింగపట్నం, వజ్రపుకొత్తూరు మండలంలోని మంచినీళ్లపేట వద్ద ఫిషింగ్ జెట్టీలు ఏర్పాటు చేయాలని కేంద్ర మంత్రిని కోరారు. శ్రీకాకుళం జిల్లాలో 230కి పైగా గ్రామాల్లో చేపలవేట జీవనాధారంగా మత్స్యకారులు నివశిస్తున్నారని.. చేపలు పట్టేందుకు సరైన మౌలిక వసతులు లేక వారంతా ఇబ్బందులు పడుతున్నారని రామ్మోహన్ నాయుడు లేఖలో వివరించారు. దీంతో ఇతర ప్రాంతాలకు వలస వెళ్లాల్సిన పరిస్థితి ఉందని.. స్థానికంగా మౌలిక వసతులు కల్పిస్తే.. వారందరికీ ఇక్కడే ఉపాధి, ఉద్యోగ అవకాశాలు దొరుకుతాయని వివరించారు.

అందులో భాగంగానే భావనపాడు వద్ద ఫిషింగ్ హార్బర్, కళింగపట్నం, మంచినీళ్లపేట వద్ద ఫిషింగ్ జెట్టీలు ఏర్పాటు చేయాలని కేంద్ర నౌకాయాన శాఖ మంత్రి శర్బానంద సోనోవాల్‌‌కు కింజరాపు రామ్మోహన్ నాయుడు విజ్ఞప్తి చేశారు. దీని ద్వారా శ్రీకాకుళం జిల్లా నుంచి వలసలు తగ్గిపోవటమే కాకుండా.. స్థానికంగా ఆర్థిక వ్యవస్థ మెరుగవుతుందని లేఖలో పేర్కొన్నారు. మరి కేంద్ర మంత్రి రామ్మోహన్ నాయుడు విజ్ఞప్తికి కేంద్రం ఎలా స్పందిస్తుందనేదీ చూడాలి మరి. కేంద్రంలో ఏపీకి అత్యధిక ప్రాధాన్యత లభిస్తున్న నేపథ్యంలో.. ఈ వినతిని కేంద్రం పరిశీలించే అవకాశం ఉన్నట్లు తెలుస్తోంది.