జీఎస్టీ, ట్యాక్స్‌లు తగ్గించాలని కేంద్రాన్ని అడగొద్దు.. కేంద్రమంత్రి నితిన్ గడ్కరీ

గూడ్స్ అండ్ సర్వీసెస్ ట్యాక్స్-జీఎస్టీ, ఇతర ట్యాక్సులను తగ్గించాలని వస్తున్న విజ్ఞప్తులు, డిమాండ్లపై కేంద్ర ఉపరితల రవాణా శాఖ మంత్రి నితిన్ గడ్కరీ కీలక వ్యాఖ్యలు చేశారు. వస్తు సేవల పన్ను, ఇతర పన్నులను తగ్గించాలని పదే పదే కేంద్రంలోని నరేంద్ర మోదీ ప్రభుత్వాన్ని కోరవద్దని పేర్కొన్నారు. ఈ సందర్భంగా జీఎస్టీ, ఇతర పన్నులు తగ్గించాలని కోరుతున్న పరిశ్రమ వర్గాలకు కేంద్రమంత్రి నితిన్‌ గడ్కరీ కీలక సూచనలు చేశారు. అయితే దేశం అభివృద్ధి చెందాలంటే ప్రజల నుంచి ప్రభుత్వానికి వచ్చే పన్నులే ఆదాయ వనరులు అని పేర్కొన్నారు. అదే సమయంలో దేశంలో సామాన్య ప్రజల కోసం సంక్షేమ పథకాలు అమలు చేయాలన్నా, కొత్తవి ప్రకటించాలన్నా ఈ పన్నులే ముఖ్యమని నితిన్ గడ్కరీ వెల్లడించారు.

దేశంలోని పేదలను ఆదుకునేందుకు సంక్షేమ పథకాలు ఎంతగానో ఉపయోగపడతాయని కేంద్రమంత్రి తెలిపారు. అలాంటి సంక్షేమ పథకాలను అమలు చేయాలంటే కేంద్ర ప్రభుత్వానికి నిధులు అవసరమని గుర్తు చేశారు. అందుకే జీఎస్టీ, ఇతర పన్నులు తగ్గింపు విజ్ఞప్తులను ప్రభుత్వం ముందు ఉంచవద్దని కోరారు. ఈ సందర్భంగా నితిన్ గడ్కరీ ఆసక్తికర వ్యాఖ్యలు చేశారు. వివిధ వర్గాల నుంచి విజ్ఞప్తులు, డిమాండ్లను ఒప్పుకుని.. ఒకవేళ కేంద్ర ప్రభుత్వం పన్నులు కొంత తగ్గించినా.. వాటిని మరింత తగ్గించాలని కోరతారని పేర్కొన్నారు. ఇది మనుషుల సహజ మనస్తత్వం అంటూ కీలక వ్యాఖ్యలు చేశారు.

అయితే కేంద్ర ప్రభుత్వం కూడా వివిధ రకాల పన్నులను తగ్గించేందుకు కావాల్సిన అన్ని ప్రయత్నాలు చేస్తోందని నితిన్ గడ్కరీ వివరించారు. కానీ అలా చేయడం వల్ల సామాన్య ప్రజలకు కేంద్రం అందించే సంక్షేమ పథకాలు అందడం కష్టతరం అవుతుందని పేర్కొన్నారు. ఇక ధనవంతుల నుంచి పన్నుల రూపంలో డబ్బులు వసూలు చేసి.. వాటిని పేదల అభివృద్ధికి, అవసరాలకు వినియోగించడం అనేది ప్రభుత్వ దార్శనికత అని కేంద్రమంత్రి వెల్లడించారు.

దేశంలో లాజిస్టిక్స్‌ ఖర్చు 2 ఏళ్లలోపు 9 శాతానికి తగ్గుతుందని ఈ సందర్భంగా పరిశ్రమ వర్గాలకు కేంద్రమంత్రి నితిన్ గడ్కరీ హామీ ఇచ్చారు. ఈ లాజిస్టిక్స్ ఖర్చు చైనాలో 8 శాతం ఉండగా.. అమెరికా, యూరప్ దేశాల్లో 12 శాతంగా ఉందని వెల్లడించారు. దేశంలో మూలధన పెట్టుబడులను మరింత పెంచడం ద్వారా రానున్న రోజుల్లో మరిన్ని ఎక్కువ ఉద్యోగాలను సృష్టించే అవకాశం ఉంటుందన్నారు. భారత్‌ను అభివృద్ధి చెందిన దేశంగా మార్చేందుకు.. విదేశాల నుంచి మన దేశానికి వచ్చే దిగుమతులను తగ్గించి.. మన దేశం నుంచి ఇతర దేశాలకు పంపించే ఎగుమతులను పెంచాల్సిన అవసరం ఉందని ఈ సందర్భంగా నితిన్ గడ్కరీ తెలిపారు.