ట్రంప్ నివాసం వద్ద కలకలం... భద్రతా వలయంలోకి దూసుకొచ్చిన ప్రైవేట్ విమానం

అమెరికా అధ్యక్షుడు డొనాల్డ్ ట్రంప్ నివాసం ఫ్లోరిడాలోని మార్ ఎ లాగ్‌ వద్ద భద్రతా వైఫల్యం చోటుచేసుకుంది. స్థానిక కాలమానం ప్రకారం ఆదివారం ట్రంప్ నివాసంవైపు పౌర విమానం దూసుకొచ్చింది. దీన్ని గమనించి వైమానిక దళం తక్షణమే అప్రమత్తమై, ఆ విమానాన్ని అడ్డుకుంది. తన వెస్ట్‌ పామ్ బీచ్‌లో ట్రంప్ గోల్ఫ్ ఆడుతున్న సమయంలో ఈ ఘటన చోటుచేసుకున్నట్టు నార్త్ అమెరికన్ ఏరోస్పేస్ డిఫెన్స్ కమాండ్ ఒక ప్రకటనలో వెల్లడించింది. భద్రతా వలయంలోకి వచ్చిన ప్రైవేటు విమానాన్ని ఎఫ్‌-16 ఫైటర్ జెట్‌లు అడ్డుకున్నాయి. దీనికి ముందు శనివారం ఉదయం కూడా ఓ పౌర విమానాన్ని ఫైటర్ జెట్లు నిలువరించాయి.

ఈ పరిణామాలతో ప్రైవేటు విమానాల పైలట్‌లు ఆంక్షలను పట్టించుకోవడం లేదని విమర్శలు వెల్లువెత్తుతున్నాయి. ట్రంప్ రెండోసారి అధ్యక్షుడిగా ప్రమాణం చేసిన తర్వాత 20కిపైగా ఇలాంటి ఘటనలు చోటుచేసుకోవడం గమనార్హం. అమెరికా అధ్యక్ష భవనం వైట్‌హౌస్‌ సమీపంలో దీనికి ముందు రోజు ఓ అనుమానితుడి కదలికలు కలకలం సృష్టించిన విషయం తెలిసిందే. శ్వేతసౌధం సమీపంలో అనుమానితుడి కదలికల గురించి సీక్రెట్‌ సర్వీస్‌కు స్థానిక పోలీసులు సమాచారం అందించారు. దాంతో అప్రమత్తమైన అధికారులు.. వైట్‌హౌస్‌కు కొద్ది దూరంలో పార్క్‌ చేసిన ఒక వాహనాన్ని, అనుమానితుడ్ని గుర్తించారు. తనకు సమీపంగా సీక్రెట్ సర్వీస్ ఏజెంట్లు రావడాన్ని గమనించిన అతడు వెంటనే తన వద్ద ఉన్న తుపాకీ బయటకు తీశాడు.

అతడ్ని అదుపులోకి తీసుకునేందుకు ప్రయత్నిస్తుండగా వారితో ఘర్షణకు దిగాడు. తన చేతిలో ఉన్న రివాల్వర్‌తో కాల్పులు జరిపేందుకు సిద్ధమయ్యారు. దీంతో భద్రతా సిబ్బంది నిందితుడిపై కాల్పులు జరిపారు. ఈ ఘర్షణలో గాయపడిన నిందితుడ్ని ఆసుపత్రికి తరలించి చికిత్స అందజేస్తున్నారు. ఈ ఘటనపై దర్యాప్తు కొనసాగుతోంది. కాగా, అమెరికా అధ్యక్ష ఎన్నికల సమయంలోనూ ట్రంప్‌పై హత్యాయత్నాలు జరిగిన విషయం తెలిసిందే. గత సెప్టెంబరులో ఫ్లోరిడాలోని తన గోల్ఫ్‌ కోర్టులో ట్రంప్‌ గోల్ఫ్‌ ఆడుతుండగా ఓ వ్యక్తి అనుమానాస్పదంగా తుపాకీతో సంచరించాడు. దీంతో ఆ వ్యక్తిపై సీక్రెట్‌ సర్వీస్‌ ఏజెంట్లు కాల్పులు జరపడంతో అనుమానితుడు అక్కడ నుంచి పారిపోయాడు.