శరీరంలో పెరిగిన కొలెస్ట్రాల్‌ని తగ్గించే కూరగాయలు

ఈ రోజుల్లో అధిక కొలెస్ట్రాల్ సమస్య సర్వసాధారణమైపోయింది. పెరిగిన కొలెస్ట్రాల్‌ని చాలా మంది సకాలంలో గుర్తించలేరు. దీని లక్షణాల్ని చాలా మంది ఆలస్యంగా గుర్తిస్తారు. దీని కారణంగా గుండెపోటు, స్ట్రోక్ ప్రమాదం గణనీయంగా పెరుగుతుంది. సాధారణంగా కొలెస్ట్రాల్ రెండు రకాలు ఉంటుంది. ఒకటి చెడు కొలెస్ట్రాల్ (LDL), రెండు మంచి కొలెస్ట్రాల్ (HDL). మన శరీరంలో చెడ్డ కొలెస్ట్రాల్‌ (ఎల్‌డీఎల్‌) ఎక్కువైతేనే ప్రమాదం. చెడు కొలెస్ట్రాల్‌ ఎక్కువగా ఉంటే.. గుండె జబ్బులు, స్ట్రోక్, గుండెపోటు, హైపర్‌టెన్షన్‌ వచ్చే ప్రమాదం ఎక్కువగా ఉంటుంది.

అందుకే చెడు కొలెస్ట్రాల్‌ని తగ్గించుకోవాలి. జీవనశైలిలో మార్పులు, తినే ఆహారంపై దృష్టి పెట్టాలి. కొన్ని ఆహారాలు తినడం వల్ల చెడు కొలెస్ట్రాల్ పెరుగుతుంది. వేయించిన ఆహారాలు, జంక్ ఫుడ్, స్పైసీ ఫుడ్స్, సోడియం, చక్కెర ఎక్కువగా ఉండే ఆహారాలు తినడం వల్ల చెడు కొలెస్ట్రాల్ ప్రమాదం పెరుగుతుంది. కొన్ని కూరగాయలను తీసుకోవడం వల్ల సిరల్లో పేరుకుపోయిన చెడు కొలెస్ట్రాల్ క్లీన్ అవుతుంది. అధిక కొలెస్ట్రాల్ బారి నుంచి కాపాడే ఆ కూరగాయలేంటో ఓ లుక్కేద్దాం.

పాలకూర

పాలకూర పోషకాలతో నిండి ఉన్న ఆకుకూర. ఇందులో విటమిన్లు, ఖనిజాలు, యాంటీఆక్సిడెంట్లు పుష్కలంగా ఉంటాయి. ఇందులో ఉండే ల్యూటిన్ చెడు కొలెస్ట్రాల్‌ను తగ్గించడంలో సహాయపడుతుంది. ల్యూటిన్ ధమనుల గోడలపై కొలెస్ట్రాల్ నిక్షేపణను నిరోధిస్తుంది. దీంతో గుండె జబ్బుల ప్రమాదం తగ్గుతుంది. అంతేకాకుండా పాలకూరలో అధిక మొత్తంలో ఫైబర్ కూడా ఉంటుందియ ఇది కొలెస్ట్రాల్ స్థాయిని నియంత్రించడంలో సహాయపడుతుంది. రోజూ పాలకూర తినడం ద్వారా కొలెస్ట్రాల్ స్థాయిల్ని సమతుల్యంగా ఉంచుకోవచ్చని నిపుణులు అంటున్నారు.

బ్రకోలి

బ్రకోలి చెడు కొలెస్ట్రాల్‌ను తగ్గించడంలో సహాయపడే మరొక సూపర్‌ వెజిటేబుల్. ఇందులో అధిక మొత్తంలో ఫైబర్ ఉంటుంది. ఇది శరీరంలో పెరిగిన కొలెస్ట్రాల్‌ను తొలగించడంలో సహాయపడుతుంది. అదనంగా, బ్రోకలీలో సల్ఫోరాఫేన్ సమ్మేళనం ఉంటుంది. ఇది కొలెస్ట్రాల్ స్థాయిలను తగ్గించడంతో పాటు గుండె ఆరోగ్యాన్ని మెరుగపరుస్తుంది. దీనిని ఉడికించి లేదా సలాడ్, సూప్, స్మూతీల్లో తీసుకోవచ్చు.

వెల్లుల్లి

వెల్లుల్లి ఆహార రుచిని పెంచడమే కాకుండా, చెడు కొలెస్ట్రాల్‌ను తగ్గించడంలో కూడా ప్రభావవంతంగా ఉంటుంది. వెల్లుల్లిలో అల్లిసిన్ అనే సమ్మేళనం ఉంటుంది. ఇది కొలెస్ట్రాల్ స్థాయిని తగ్గించడంలో సహాయపడుతుంది. వెల్లుల్లిని క్రమం తప్పకుండా తినడం వల్ల LDL కొలెస్ట్రాల్ తగ్గుతుంది. దీంతో పాటు HDL కొలెస్ట్రాల్ పెరుగుతుంది. మీరు దీన్ని పచ్చిగా తినవచ్చు లేదంటే వంటల్లో కలిపి తినవచ్చు. కావాలంటే సూపులు, తేనెతో కలిపి కూడా తీసుకోవచ్చు.

క్యారెట్

క్యారెట్లలో బీటా కెరోటిన్, ఫైబర్ పుష్కలంగా ఉంటాయి. ఇవి చెడు కొలెస్ట్రాల్‌ను తగ్గించడంలో సహాయపడతాయి. క్యారెట్లలో ఉండే ఫైబర్ జీర్ణవ్యవస్థలో కొలెస్ట్రాల్ శోషణను తగ్గిస్తుంది. అంతేకాకుండా శరీరం నుంచి చెడు కొలెస్ట్రాల్‌ని తొలగించడంలో సాయపడుతుంది. అంతేకాకుండా క్యారెట్లలో పొటాషియం కూడా ఉంటుంది. ఇది రక్తపోటును నియంత్రించడంలో, గుండె ఆరోగ్యాన్ని మెరుగుపరచడంలో హెల్ప్ చేస్తుంది. క్యారెట్లను పచ్చిగా తినడం లేదా జ్యూస్ రూపంలో తాగడం వల్ల ఆరోగ్యానికి ఎక్కువ మేలు జరుగుతుంది.

బెండకాయ

బెండకాయ తినడం వల్ల ఆరోగ్యానికి ఎంతో మేలు జరుగుతుంది. ఇందులో విటమిన్ కె, సి, ఫోలేట్, మెగ్నిషియం, విటమిన్ బి, మాంగనీస్ వంటి పోషకాలు శరీరానికి అవసరమైన పోషణను అందిస్తాయి. బెండకాయలో కాల్షియం, విటమిన్ కె ఎక్కుగా ఉంటాయి. లేడీఫింగర్‌లో ఫైబర్, యాంటీఆక్సిడెంట్లు పుష్కలంగా ఉంటాయి. ఇవి చెడు కొలెస్ట్రాల్‌ని తగ్గించడంలో సాయపడతాయి. ఇందులో ఉండే కరిగే ఫైబర్ జీర్ణవ్యవస్థలో కొలెస్ట్రాల్ శోషణను నిరోధించి శరీరం నుంచి దానిని తొలగిస్తుంది. బెండకాయలో ఉండే యాంటీ ఆక్సిడెంట్లు గుండె ఆరోగ్యాన్ని కాపాడతాయి.