లేడీ గెటప్‌లో ప్రియురాలి ఇంటికెళ్లాడు.. ఆ తర్వాత ఊహించని పరిణామం

ఉత్తర ప్రదేశ్‌లోని మథుర జిల్లాకు చెందిన 30 ఏళ్ల రేఖకు పెళ్లై ఇద్దరు పిల్లలు కూడా ఉన్నారు. అయితే ప్రస్తుతం అత్తారింట్లోనే ఉంటున్న ఈమె ఇంటికి.. హర్యానాలోని హసన్‌పూర్ గ్రామానికి చెందిన దగ్గరి బంధువు 28 ఏళ్లు ఉమేష్ తరచుగా వచ్చేవాడు. ఈక్రమంలోనే వీరిద్దరి మధ్య ప్రేమ ఏర్పడింది. అది కాస్తా వివాహేతర సంబంధానికి దారి తీసింది. అతడు ఇంటికి వస్తూ.. ఎవరి కంటా పడకుండా చాటుమాటుగా కలవడం ఇబ్బందిగా ఉండడంతో ఇద్దరూ పారిపోవాలని నిర్ణయించుకున్నారు.

పథకం వేసుకుని మరీ గతేడాది ఆగస్ట్ 31వ తేదీన పారిపోయారు. అయితే రేఖ భర్త మాత్రం.. తన భార్య కనిపించడం లేదంటూ పోలీసులను ఆశ్రయించాడు. కేసు నమోదు చేసుకున్న పోలీసులు దర్యాప్తు చేపట్టారు. ఉమేష్ గురించి తెలిసి అతడి సెల్ ఫోన్ సిగ్నల్ ఆధారంగా వారు హిమాచల్ ప్రదేశ్‌లోని కిన్నౌర్ జిల్లాలో ఉన్నట్లు గుర్తించారు. 2025 ఫిబ్రవరి 10వ తేదీన రేఖను తీసుకు వచ్చి ఆమె భర్తకు అప్పగించారు. ఈక్రమంలోనే బంధువులు, కుటుంబ సభ్యులు తిట్టడం.. భర్త, పిల్లలు పడ్డ బాధను వివరించడంతో తన తప్పు తెలుసుకుంది. ఇక నుంచి భర్త, పిల్లలతోనే ఉంటానని చెప్పింది.

అయితే ప్రియుడు ఉమేష్ మాత్రం రేఖను మర్చిపోలేదు. ఎలాగైనా సరే ఆమెను మళ్లీ తీసుకెళ్లి పెళ్లి చేసుకోవాలనుకున్నాడు. ఈక్రమంలోనే ఓ లెహంగా వేసుకుని అమ్మాయిని ముస్తాబయ్యాడు. అలాగే బైకుపై రేఖ ఇంటికి వెళ్లాడు. ఆ సమయంలో పిల్లలు బడికి వెళ్లడం, రేఖ భర్త వ్యవసాయ క్షేత్రం వద్దకు వెళ్లడంతో.. ఆమె ఇంట్లో ఒంటరిగా ఉంది. దీంతో ఉమేష్ నేరుగా ఆమె వద్దకు వెళ్లి తనతో వచ్చేయమని గొడవ చేశాడు. కానీ ఆమె మాత్రం పిల్లల్ని వదిలి రాలేనని తెగేసి చెప్పింది. దీంతో తీవ్ర ఆగ్రహానికి గురైన ఉమేష్.. వెంట తెచ్చుకున్న పెట్రోల్ ఆమెపై పోసి నిప్పంటించాడు.

ఆ తర్వాత అక్కడి నుంచి పారిపోయేందుకు ప్రయత్నించాడు. ఈక్రమంలోనే బంగ్లాపైనుంచి కిందకు దూకేందుకు యత్నించాడు. కానీ ఎత్తు ఎక్కువగా ఉండి కింద పడడంతో తీవ్ర గాయాలు అయ్యాయి. ఓవైపు ఇతడు పడడం, మరోవైపు రేఖ కేకలు వేయడంతో.. స్థానికులు విషయం గుర్తించారు. వెంటనే ఆమె కుటుంబ సభ్యులు, పోలీసులకు సమాచారం అందించి.. వారిద్దరినీ ఆగ్రాలోని ఎస్ఎన్ మెడికల్ కాలేజీ ఆస్పత్రికి తరలించారు.

70 శాతం కాలిన గాయాలు అయిన రేఖ, తీవ్ర గాయాలపాలైన ఉమేష్ ఇద్దరి పరిస్థితి విషమంగా ఉన్నట్లు వైద్యులు చెబుతున్నారు. అయితే దీనిపై ఇప్పటి వరకు ఎలాంటి ఫిర్యాదు అందలేదని.. వారిద్దరూ కోలుకున్న తర్వాత తగిన చర్యలు తీసుకుంటామని పోలీసులు చెబుతున్నారు.