టార్ఫాలిన్ హిజాబ్ ధరించండి.. మసీదులకు కవర్లు కట్టుకోండి

హోలీ సంబురాల్లో ఎలాంటి ఇబ్బందులూ ఎదురుకాకుండా ఉండాలంటే ముస్లిం పురుషులు.. మహిళల మాదిరిగా టార్ఫాలిన్ హిజాబ్ ధరించాలని యూపీ మంత్రి రఘురాజ్ సింగ్ తెలిపారు. అలాగే మసీదులపై రంగులు పడకుండా ఉండాలని కోరుకుంటే.. వాటికి టార్ఫాలిన్ కవర్లు కప్పకోవాలని సూచించారు. ఇవేవీ చేయము, హోలీ సంబురాలకు అంతరాయం కల్గిస్తామంటే అస్సలే ఊరుకోమని తేల్చి చెప్పారు. అలాగే అంతరాయం కల్గించే వారికి మూడే మూడు మార్గాలు ఉన్నాయని.. అందులో ఒకటి ఇంట్లోనే ఉండడం, రెండు జైలుకు వెళ్లడం, మూడు రాష్ట్రం దాటి వెళ్లిపోవడం లేదా చనిపోవడం అంటూ తీవ్ర వ్యాఖ్యలు చేశారు. ఈ కామెంట్లు రాష్ట్రవ్యాప్తంగా తీవ్ర దుమారం రేపుతున్నాయి. ఆ పూర్తి వివరాలు మీకోసం.

హోలీ పండుగ సందర్భంగా రంగులు తమపై పడకూడదు అని అనుకునే ముస్లిం పురుషులు.. స్త్రీల మాదిరిగా టార్ఫాలిన్ హిజాబ్ ధరించాలని ఉత్తర ప్రదేశ్ మంత్రి రఘురాజ్ సింగ్ మంగళవారం చెప్పారు. అలీఘర్‌లో జరిగిన ఓ కార్యక్రమంలో మాట్లాడుతూ.. కార్మిక మరియు ఉపాధి మంత్రి ముస్లి ప్రజలకు ఈ సూచన చేశారు. ముఖ్యంగా ముస్లిం పురుషులు.. తమ టోపీలు, దుస్తులు శుభ్రంగా ఉంచుకోవాలనుకుంటే టార్ఫాలిన్ హిజాబ్ ధరించాలని లేకపోతే ఇళ్లలోనే ఉండాలని పేర్కొన్నారు.

హోలీ ఉత్సవాలకు అంతరాయం కల్గించడానికి ప్రయత్నించే వారికి పరిమిత ఎంపికలు మాత్రమే ఉన్నాయని మంత్రి వ్యాఖ్యానించారు. అందులో ఒకటి పురుషులు ఇళ్లలోనే ఉండడం అని, రెండోది జైలుకు వెళ్లడం అని, మూడోది రాష్ట్రం నుంచి వెళ్లిపోవడం లేదా యమధర్మరాజును కలుసుకోవడం అంటూ తీవ్ర వ్యాఖ్యలు చేశారు. హోలీని ఏ విధంగానైనా జరుపుకుంటామని తేల్చి చెప్పారు. ప్రభుత్వం కూడా హోలీ వేడుకలకు అనుమతి ఇచ్చిందన్నారు. సత్య యుగం, త్రేతాయుగం, ద్వాపర యుగం నాటి నుంచి ఈ హోలీ పండుగను జరుపుకుంటున్నామని.. కలియుగంలోనూ ఇది కొనసాగుతుందని మంత్రి రఘురాజ్ సింగ్ చెప్పుకొచ్చారు.

హోలీ పండుగతో పాటు పవిత్ర రంజాన్ మాసపు రెండో శుక్రవారం ఒకే రోజు వస్తున్నాయని.. ప్రభుత్వం పూర్తి అప్రమత్తంగా ఉందన్నారు. అయితే కొందరికి మాత్రమే దీనిపై అభ్యంతరాలు ఉన్నాయని.. వారంతా ముందే జాగ్రత్తలు తీసుకోవాలని సూచించారు. రంగులు చల్లుకునే వారికి నిర్దిష్ట దూరం నుంచి మాత్రమే అలా చేయాలని సూచించలేమని.. ముఖ్యంగా 20 మీటర్లు, 25 మీటర్ల నుంచే చల్లుకోండంటూ చెప్పలేమని వెల్లడించారు. ప్రస్తుతం మంత్రి చేసిన ఈ కామెంట్లు తెగ వైరల్ అవుతున్నాయి. దీనిపై అనేక మంది ముస్లిం ప్రజలు తీవ్రంగా వ్యతిరేకిస్తున్నారు.