బ్యాంకుల్లో లోన్లు తీసుకుంటున్నారా.. ఈ తప్పులు మాత్రం అస్సలు చేయొద్దు

చిన్న చిన్న అవసరాల కోసం కూడా ఇప్పట్లో బ్యాంకుల్లో లోన్లు తీసుకుంటూ ఉంటామన్న సంగతి తెలిసిందే. అయితే ఇక్కడే సాధారణంగా చాలా మంది లోన్ తీసుకోవడంతో పాటు ఈఎంఐలు చెల్లించే విషయంలో కూడా తప్పులు చేస్తుంటారు. అందుకే ఇప్పుడు మనం రుణ గ్రహీతలు ఎలాంటి జాగ్రత్తలు తీసుకోవాలనేది చూద్దాం. ముందుగా పర్సనల్ లోన్ తీసుకునే సమయాల్లో ఎక్కువగా సుదీర్ఘ కాల వ్యవధిని ఎంచుకుంటుంటారు. అయితే వ్యక్తిగత రుణాలపై వడ్డీ రేట్లు ఎక్కువగా ఉంటాయి కాబట్టి ఇది సరైనది కాదు. మీరు ముందుగా దీర్ఘకాల ఈఎంఐ ఎంచుకొని.. మీ దగ్గర డబ్బులు ఉన్నప్పుడు ముందుగానే లోన్ తీర్చేయాలనుకుంటే అప్పుడు రుణ సంస్థలు ప్రీ క్లోజర్ ఛార్జీల్ని వసూలు చేస్తుంటాయి. అందుకే.. పర్సనల్ లోన్లకు గరిష్టంగా 2-3 ఏళ్ల కాలవ్యవధిని పెట్టుకోవడం మంచిది.

ముఖ్యంగా కొన్ని క్రెడిట్ కార్డులపై పరిమితి మేరకు క్యాష్ విత్‌డ్రా చేసుకునేందుకు అవకాశం ఉంటుంది. మనకు క్రెడిట్ కార్డులో ఈ సౌకర్యం ఉంది కదా అని నగదు విత్‌డ్రా చేయాలనుకోవడం మంచి పద్ధతి కాదు. ఇక్కడ ఇలా డబ్బులు తీసుకుంటే.. 2-3 శాతం వరకు ప్రాసెసింగ్ ఫీజు పడుతుంది. వడ్డీ కూడా నెలకు 3-4 శాతంగా ఉండొచ్చు. మీరు అత్యవసర పరిస్థితుల్లో ఇలా క్రెడిట్ కార్డు లోన్ తీసుకున్నా.. వెంటనే తీర్చేసేందుకు ప్రయత్నించాలి. లేకపోతే వడ్డీ భారం భరించలేరు.

ఇక చాలా బ్యాంకులు కారు విలువపైన 90 శాతం వరకు రుణాలు ఇస్తుంటాయి. ఈఎంఐ టెన్యూర్ కోసం కూడా ఏడేళ్ల వరకు అనుమతిస్తుంటాయి. ఇక్కడ కూడా టెన్యూర్ ఎక్కువగా పెట్టుకుంటే.. మీరు ఎక్కువ ఈఎంఐ చెల్లించాల్సి వస్తుంది. రుణ భారం పెరుగుతుంది. అందుకే.. ఈ లోన్లు తీసుకునేటప్పుడు ముందుగా కారు విలువలో 30-40 శాతం వరకు డౌన్ పేమెంట్ చెల్లించి.. 4-5 ఏళ్ల పాటు ఈఎంఐ పెట్టుకోవడం మేలు.

హోం లోన్ అనేది కూడా దీర్ఘకాలం పాటు చెల్లిస్తూనే ఉండాలి. ఇక్కడ కూడా రుణ మొత్తం, చెల్లించే కాలం, ఈఎంఐ అన్నీ ఎక్కువగానే ఉంటాయి. చాలా మంది ఇక్కడ వడ్డీ ఎక్కువగా ఉన్నప్పటికీ.. చివరివరకు కూడా అదే బ్యాంకులో లోన్ కొనసాగిస్తుంటారు. అయితే.. వడ్డీ రేటు ఒక శాతం తక్కువగా లభించినా వేరే బ్యాంకుకు దీన్ని బదిలీ చేసుకోవడం మంచిది. ఇక్కడ ఒక శాతం వడ్డీ రేటు తగ్గినా.. దీర్ఘకాలంలో పెద్ద మొత్తంలో ఆదా చేసుకోవచ్చు. ఇక బంగారు లోన్ల విషయంలో.. ఎక్కడి పడితే అక్కడ బంగారం తాకట్టు పెట్టి లోన్ తీసుకోవడం మంచిది కాదు. బంగారానికి బ్యాంకుల్లోనే భద్రత ఎక్కువ ఉంటుంది. సరసమైన వడ్డీ రేట్లకే లోన్లు కూడా ఇస్తున్నాయి. కాబట్టి బ్యాంకుల్ని పోల్చుకొని లోన్ తీసుకోవడం మంచిది.