వడోదర కారు బీభత్సం నిందితుడు చెప్పినవన్నీ అబద్ధాలే.. అసలు నిజం బయటపెట్టిన సీసీటీవీ ఫుటేజీ!

వడోదర కారు బీభత్సం ఘటనలో నిందితుడు పోలీసులు ముందు షాకింగ్ కామెంట్లు చేశాడు. ముఖ్యంగా తాను డ్రైవింగ్ చేస్తున్న సమయంలో మద్యం సేవించలేదని.. హోలికా దహనం కార్యక్రమానికి వెళ్లి వస్తుండగానే ప్రమాదం జరిగినట్లు వివరించాడు. కానీ అతడు చెప్పినవన్నీ అబద్ధాలేనని తెలుస్తోంది. ముఖ్యంగా అతడు ప్రమాదానికి కొన్ని నిమిషాల ముందే స్నేహితుడికి ఇంటికెళ్లగా.. అక్కడే మద్యం సేవిస్తూ సీసీటీవీ కెమెరా కంట పడ్డాడు. ప్రస్తుతం ఇందుకు సంబంధించిన వీడియో నెట్టింట వైరల్ అవుతుండగా అంతా షాక్ అవుతున్నారు. ఆపూర్తి వివారలు మీకోసం.

గుజరాత్‌లోని వడోదరలో రెండ్రోజుల క్రితం ఓ కారు బీభత్సం సృష్టించగా.. ఓ మహిళ ప్రాణాలు కోల్పోయిన విషయం అందరికీ తెలిసిందే. అయితే ఈ ఘటనలో మరో నలుగురు తీవ్రంగా గాయపడగా ప్రస్తుతం వారంతా ఆస్పత్రిలో చికిత్స పొందుతున్నారు. అయితే ప్రమాదం జరిగిన వెంటనే నిందితుడు రక్షిత్ చౌరాసియా కారు దిగి రచ్చ రచ్చ చేశాడు. అనదర్ రౌండ్, అనదర్ రౌండ్, ఓం నమః శివాయ, ఓం నమః శివాయ, నిఖితా నిఖితా అంటూ గట్టి గట్టిగా కేకలు వేశాడు. ఇందుకు సంబంధించిన వీడియో ఇప్పటికే నెట్టింట వైరల్ కాగా.. పోలీసులు కూడా నిందితుడిని పట్టుకున్నారు.

అయితే విచారణలో రక్షిత్ చౌరాసియా తాను మద్యం సేవించి వాహనం నడపలేదని చప్పాడు. ముఖ్యంగా తాను హోలికా దహనం కార్యక్రమానికి వెళ్లి వస్తుండగా.. రోడ్డుపై ఉన్న గుంత కారణంగానే ప్రమాదం జరిగిందని వెల్లడించాడు. తాను నడుపుతున్న కారును కుడివైపునకు మళ్లించబోతుండగా.. వెనక నుంచి వచ్చిన స్కూటీ తన కారును ఢీకొట్టిందని వెల్లడించాడు. అయితే అతడు చెప్పినవన్నీ అబద్ధాలే అని తెలుస్తోంది.

ముఖ్యంగా ప్రమాదానికి కొన్ని నిమిషాల ముందు.. రక్షిత్ చౌరాసియా ఎక్కడికి వెళ్లాడు, ఏమేం చేశాడో తెలిసిపోయింది. అందుకు సంబంధించిన సీసీటీవీ వీడియో కూడా విడుదల కాగా.. షాకింగ్ విషయాలు వెలుగులోకి వచ్చాయి. ప్రమాదానికి ముందు రక్షిత్ చౌరాసియా తన స్నేహితడితో కలిసి.. మరో స్నేహితుడి ఇంటికి వచ్చినట్లు సీసీటీవీ ఫుటేజీలో రికార్డు అయింది. లోపలికి వెళ్లేముందు వీరిద్దరూ మాట్లాడుకుంటూ ఉండగా.. రక్షిత్ చౌరాసియా మద్యం సేవిస్తూ కనిపించాడు. అలాగే ప్రమాద సమయంలో కారులో ఉన్న రక్షిత్ స్నేహితుడు ప్రాంశు ఇంట్లోకి నడుచుకుంటూ వెళ్లాడు.

అయితే 45 నిమిషాల పాటు అదే ఇంట్లో గడిపిన వీరిద్దరూ ఆ తర్వాత కారు తీసుకుని బయటకు వెళ్లారు. ముందుగా ప్రాంశు కారు డ్రైవ్ చేసేందుకు వెళ్లగా.. రక్షిత్ చౌరాసియా రాగానే అతడు పక్క సీట్లోకి వెళ్లిపోయాడు. ఆ తర్వాత రక్షిత్ చౌరాసియానే కారు నడుపుతూ వచ్చాడు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. ఇది చూసిన ప్రతీ ఒక్కరూ మద్యం మత్తులో, విపరీతమైన వేగంతో కారు నడిపే బీభత్సం సృష్టించాడని నమ్ముతున్నారు.