పురోహితుల కొత్త బిజినెస్ ట్రిక్.. చాలా సింపుల్‌గా రూ.20వేల సంపాదన

నెల్లూరు జిల్లా ఇప్పుడు ఓ కొత్త ఆచారం గురించి ఆసక్తికర చర్చ జరుగుతోంది. కొంతమంది పురోహితులు అవివాహితులకు చెట్లతో పెళ్లి చేయించిన వ్యవహారం బయటపడింది. కావలితో పాటుగా ఆ చుట్టుపక్కల ప్రాంతాల్లో అవివాహితులకు చెట్లతో పెళ్లి చేయడం మంచిదని కొందరు పురోహితులు ప్రచారం చేస్తున్నారు. కావలి టూ టౌన్ పోలీస్ స్టేషన్ పరిధిలోని వెంగళరావునగర్‌ వీరబ్రహ్మేంద్రస్వామి గుడి దగ్గర కొందరు పురోహితులు హడావుడి చేస్తున్నారు. అభిషేక్‌ బచ్చన్, ఐశ్వర్యరాయ్‌ల వివాహం ముందు తొలుత రావి, అరటిచెట్లతో జరిపారంటూ వీడియోలను చూపిస్తున్నారు.

కొందరు పురోహితులు ఈ వీడియోలను అవివాహితులకు చూపించి.. తమ మాటలతో వారిని ఆకర్షిస్తున్నారు. చెట్లతో పెళ్లి చేసుకుంటే మంచిదని చెప్పి.. వారి నుంచి కనీసం రూ.20వేలు వసూలు చేస్తున్నారు. పురుషులకు అరటి చెట్టుతో.. మహిళలకు రావి మొక్కలతో పూజల చేయించి పెళ్లిళ్లు చేయిస్తున్నారు. అనంతం ఆ చెట్టు, మొక్కల్ని సముద్రతీరానికి తీసుకెళ్లి నరికేయిస్తున్నారు. ఆ తర్వాత జరిగే పెళ్లితో అరిష్టాలన్నీ తొలగిపోతాయని పురోహితులు అవివాహితులతో నమ్మబలుకుతున్నారు. ఇదిలా ఉంటే పురోహితులు చేస్తున్న ఈ పూజలతో తమకు అనర్థాలు వస్తాయని స్థానికులు కొందరు అడ్డుకుని పోలీసులకు సమాచారం అందించారు. ఆ వెంటనే పోలీసులు ఆ పురోహితులను స్టేషన్‌కు పిలిపించి ప్రశ్నించారు. స్థానికంగా ఏం జరుగుతుందో కూడా పరిశీలించారు. పురోహితుల ఆచారాలు, స్థానికుల అభ్యంతరాలు పరిగణనలోకి తీసుకొని విచారణ చేస్తున్నామన్నారు కావలి రెండో పట్టణ సీఐ గిరిబాబు.

గురువారం శ్రీ మ‌హా విష్ణువుకు, బృహ‌స్ప‌తికి పూజలు చేస్తుంటారట.. శ్రీమహావిష్ణువుకు ప్రత్యేక పూజలు చేసి, ఆరాధించిన తర్వాత అరటి చెట్టుకు పూజ చేసే ఆచారం ఉందని చెబుతుంటారు. 'హిందూ ఆచారాల ప్రకారం, బృహస్పతి అరటి చెట్టులో నివసిస్తాడ‌ని నమ్మకం. గురువారం అరటి చెట్టును పూజిస్తే.. దేవ‌త‌ల గురువు బృహ‌స్ప‌తితో పాటు శ్రీమ‌హావిష్ణువు సంతోషిస్తార‌ని.. త‌ద్వారా భ‌క్తుల ప్ర‌తి కోరికను నెర‌వేరుస్తార‌ని విశ్వసిస్తారు. సంప‌ద‌, జ్ఞానం, గౌర‌వం, కీర్తి ప్ర‌తిష్ఠ‌ల‌తో పాటు అనేక ఫ‌లితాలు ల‌భిస్తాయ‌ని న‌మ్మ‌కం. పెళ్లి ఆలస్యం అవుతున్నా, తగిన భర్త దొరకని యువ‌తులు గురువారం నాడు వ్రతాన్ని ఆచరించి అరటి చెట్టును పూజిస్తే వారికి అతి త్వరలో వివాహం జరగడమే కాకుండా ఉత్తమ జీవిత భాగస్వామి కూడా లభిస్తాడ‌ని విశ్వాసం ఉంది' అని చెబుతుంటారు.