ఆస్తిని తాకట్టు పెడుతున్నారా? వడ్డీ రేట్లు ఏ బ్యాంకులో ఎలా ఉన్నాయంటే

 బ్యాంకులు పలు రకాల లోన్లు మంజూరు చేస్తుంటాయి. వీటిల్లోనే ఒకటి ఆస్తిపై రుణం. దీనినే లోన్ అగెనెస్ట్ ప్రాపర్టీ- LAP అంటారు. ఇక్కడ మీకు ఇల్లు లేదా ఫ్లాట్ లేదా ప్లాట్ ఉంటే దానిని తాకట్టు పెట్టి రుణం తీసుకోవచ్చన్నమాట. ఇక్కడ చాలా తక్కువ వడ్డీ రేట్లతో .. కనీస డాక్యుమెంటేషన్‌తోనే లోన్ ఈజీగా పొందొచ్చు. అయితే.. ఆస్తిపై రుణం తీసుకునే ముందు.. ఇందుకోసం దరఖాస్తు చేసుకునే ముందు కొన్ని ముఖ్యమైన విషయాల్ని తెలుసుకోవాల్సి ఉంటుంది. ఆస్తి చక్కటి లీగల్ క్లియరెన్స్‌తో ఉండాలి. ఇంకా ఆ ఆస్తిపై ఎలాంటి వివాదాల్లేకుండా.. చట్టబద్ధంగా ఉండాలి. ఆ ఆస్తికి అన్ని ఆమోదాలు ఉండాలి. అంటే పురపాలక సంస్థ, రెవెన్యూ శాఖ నుంచి అవసరమైన అనుమతులు అన్నీ పొంది ఉండాలి.

ఇంకా ఇక్కడ ఆస్తి రుణం తీసుకునే ముందు మెరుగైన క్రెడిట్ స్కోరు ఉండేలా చూసుకోవడం అత్యంత ముఖ్యం. అప్పుడే మెరుగైన వడ్డీ రేట్లకు లోన్ వస్తుంది. ఇంకా లోన్ కాలవ్యవధిని 7 నుంచి 20 సంవత్సరాల వరకు ఎంచుకోవచ్చు. అంటే ఆలోపు చెల్లించవచ్చు. ఇంకా రుణం మొత్తంపై బ్యాంకులు, ఇతర ఆర్థిక సంస్థలు ఒక శాతం నుంచి 3 శాతం వరకు ప్రాసెసింగ్ ఛార్జీలు వసూలు చేస్తుంటాయి.

ఇప్పుడు మనం ప్రముఖ బ్యాంకుల్లో ఆస్తి లోన్ వడ్డీ రేట్ల గురించి తెలుసుకుందాం. స్టేట్ బ్యాంక్ ఆఫ్ ఇండియాలో 9.75 శాతం నుంచి ప్రారంభం అవుతుండగా.. గరిష్టంగా 11.05 శాతంగా ఉన్నాయి. అతిపెద్ద ప్రైవేట్ బ్యాంక్.. హెచ్‌డీఎఫ్‌సీ బ్యాంకులో చూస్తే వడ్డీ రేట్లు 9.50- 13.30 శాతంగా వడ్డీ రేట్లు ఉన్నాయి. ఐసీఐసీఐ బ్యాంకులో 10.85-12.50 శాతంగా వడ్డీ రేట్లు ఉన్నాయి. యాక్సిస్ బ్యాంకులో చూస్తే ఇది 10.50-10.95 శాతం మధ్య వడ్డీ రేట్లు ఉన్నాయి.

టాటా క్యాపిటల్ హౌసింగ్ ఫైనాన్స్ వడ్డీ రేట్లు 9 శాతం నుంచి ప్రారంభమవుతున్నాయి. పీఎన్‌బీ హౌసింగ్ ఫైనాన్స్ విషయానికి వస్తే 9.24-15 శాతం వరకు ఉన్నాయి. ఐడీఎఫ్‌సీ ఫస్ట్ బ్యాంకులో వడ్డీ రేట్లు 9.25 శాతం నుంచి ప్రారంభం అవుతున్నాయి. ఎల్ఐసీ హౌసింగ్ ఫైనాన్స్ వడ్డీ రేట్లు 9.25-11.55 శాతంగా ఉన్నాయి. బ్యాంక్ ఆఫ్ బరోడాలో 9.70 శాతం నుంచి 18.35 శాతం వరకు ఉన్నాయి. పంజాబ్ నేషనల్ బ్యాంకులో చూస్తే 10.15 శాతం నుంచి గరిష్టంగా 14 శాతంగా ఉన్నాయి. బ్యాంక్ ఆఫ్ మహారాష్ట్రలో 10.70 శాతం నుంచి మొదలై 11.70 శాతంగా ఉన్నాయి.