ప్రభుత్వ కార్యాలయాల చుట్టూ తిరగక్కర్లేదు, ఈ ఒక్క యాప్‌తో చాలా సింపుల్‌గా

ఆంధ్రప్రదేశ్ ప్రభుత్వం ఇటీవల నగరాలు, పట్టణాల్లో ప్రజల సమస్యల పరిష్కారానికి కొత్తగా పురమిత్ర యాప్‌ను అందుబాటులోకి తీసుకొచ్చారు. ముఖ్యమంత్రి చంద్రబాబు నాయుడు ఈ నెల 15న ఈ యాప్‌ను ప్రారంభించిన సంగతి తెలిసిందే. ఈ యాప్ ద్వారా రాష్ట్రవ్యాప్తంగా ప్రజలు సులువుగా సేవలు పొందుతున్నారు.. సమస్యలను పరిష్కరించుకంటున్నారు. ప్రతి పనికి ఒక గడువు ఉంటుంది.. ఆ గడువులోగా అధికారులు స్పందించకపోతే, ఆ దరఖాస్తు నేరుగా వారిపై అధికారులకు చేరుతుంది. ఆ వెంటనే వారు చర్యలు తీసుకునేలా ప్లాన్ చేశారు.

పురమిత్ర యాప్‌లో మొత్తం 8 విభాగాలు ఉండగా.. వీటిలో 119 రకాల సేవలను ప్రజలు ఉపయోగించుకోవచ్చు. పరిశుభ్రత, ప్రజారోగ్యం, నీటి సరఫరా, పట్టణ ప్రణాళిక, పేదరిక నిర్మూలన, ఇంజినీరింగ్, వీధి దీపాలు, రెవెన్యూ వంటి ముఖ్యమైన సేవలు ఇందులో ఉన్నాయి. ప్రతి విభాగంలో 20 నుంచి 25 సేవలను అనుసంధానం చేశారు. నీటి సరఫరా విషయానికి వస్తే, పైపుల లీకేజీలు, తాగునీటి సమస్యలు, నీటి కాలుష్యం, అక్రమ నీటి కనెక్షన్ల గురించి ఫిర్యాదు చేయొచ్చు. ఈ 119 సేవలను అందించడానికి ప్రభుత్వం కనీసం 24 గంటల నుండి గరిష్టంగా 30 రోజుల వరకు గడువు ఇచ్చింది.

సమస్య ఎంత పెద్దదైనా, ఒక ఫొటోతో పరిష్కరించేలా ఈ పుర మిత్ర యాప్‌ను రూపొందించారు. పేరుకుపోయిన చెత్త గురించి ఫిర్యాదు చేయాలంటే, ఆ ప్రాంతం ఫోటో తీసి యాప్‌లో అప్‌లోడ్ చేయాలి. వెంటనే ఆ సమాచారం సంబంధిత వార్డు కార్యదర్శికి చేరుతుంది. ఈ యాప్‌కు AI అనుసంధానం చేయడంతో ఫొటో తీసిన ప్రాంతం గురించి ప్రత్యేకంగా చెప్పనవసరం లేదు. లొకేషన్ వివరాలు ఆటోమేటిక్‌గా రికార్డ్ అవుతాయి.. సిబ్బంది ఆ వివరాల ఆధారంగా అక్కడికి వెళ్లి సమస్యను పరిష్కరిస్తారు. అనుమతి లేని నిర్మాణాలు, రోడ్డు గుంతలు, పైపులైన్ లీకేజీలు ఇలా ఏదైనా సరే, ఫోటో తీసి అప్‌లోడ్ చేస్తే సరిపోతుంది.

పురమిత్ర యాప్‌లో చాట్‌బాట్ ద్వారా వాయిస్ మెసేజ్ పంపి కూడా ఫిర్యాదు చేయొచ్చు. ఫోటో తీయలేని సందర్భంలో, సమస్యను నోటితో చెబితే, చాట్‌బాట్ ద్వారా ఆ వాయిస్ మెసేజ్ సంబంధిత అధికారులకు చేరుతుంది. దాని ఆధారంగా వారు చర్యలు తీసుకుంటారు. చాట్‌బాట్ ద్వారా సందేహాలను కూడా నివృత్తి చేసుకోవచ్చు. ఉదాహరణకు, కొత్తగా ఇల్లు కట్టుకోవడానికి అనుమతులు తీసుకోవాలంటే.. అవసరమైన పత్రాలు, దరఖాస్తు విధానం, ఫీజుల చెల్లింపు వంటి వివరాలను చాట్‌బాట్ తెలుగు, ఇంగ్లీష్ భాషల్లో తెలియజేస్తుంది. కొత్తగా ఇంటి నిర్మాణానికి అనుమతులు తీసుకోవాలనుకుంటే.. అవసరమైన పత్రాలు, దరఖాస్తు విధానం, ఫీజుల చెల్లింపు వంటివి వాయిస్‌ ద్వారా తెలుగు, ఇంగ్లీష్‌లో చాట్‌బాట్‌ తెలియజేస్తుంది.

స్మార్ట్‌ ఫోన్‌లో ప్లే స్టోర్‌ నుంచి ఈ పురమిత్ర యాప్‌ను డౌన్‌లోడ్ చేసుకోవచ్చు. మొబైల్ నంబర్‌తో లాగిన్ అవ్వాలి.. ఆ తర్వాత ఓటీపీ వస్తుంది. దాన్ని ఎంటర్ చేయగానే యాప్ సేవలు అందుబాటులోకి వస్తాయి. గత 15 రోజుల్లో 12 వేల మంది రిజిస్ట్రేషన్ చేసుకుంటే.. 500లకు పైగా సమస్యలను అప్‌లోడ్ చేశారు. వీటిలో పరిశుభ్రత, రోడ్లు, కాలువలు, ఆస్తి పన్ను, పట్టణ ప్రణాళికకు సంబంధించిన సమస్యలు ఎక్కువగా ఉన్నాయి.