నన్నే పేరు పెట్టి పిలుస్తావా....: ఉద్యోగికి సీఈఓ షాక్

ఉద్యోగం చేసే చోట ఏమైనా తప్పులు చేసినా, మేనేజర్లు, సీఈఓలకు నచ్చినట్లుగా ప్రవర్తించకపోయినా..సాలరీలు కట్ చేయడమో, ఉద్యోగం నుంచి తీసేయడమో చేస్తారు. కానీ మనం ఇప్పుడు చూడబోయే సీఈఓ అయితే తన కంపెనీలోని ఓ సీనియర్ ఉద్యోగి షాకింగ్ పనిష్మెంట్ ఇచ్చారు. ఉద్యోగంలోంచి తీసేయకుండా, శాలరీ కట్ చేయకుండా.. స్కూళ్లో పిల్లలకు ఇచ్చినట్లుగా 100 సార్లు ఇంపోజిషన్ రాస్కుని రమ్మని చెప్పారు. ఉద్యోగి కూడా చేసేదేమీ లేక సీఈఓ చెప్పినట్లు విని ఇంపోజిషన్ రాస్కుని వచ్చారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. ఆ పూర్తి వివరాలు మీకోసం.

ఒక కంపెనీకి చెందిన మహిళా సీఈఓను.. అక్కడే పని చేసే ఓ సీనియర్ మహిళా ఉద్యోగి పేరు పెట్టి పిలుస్తోందట. అయితే ఏడాది కాలంగా ఆమె ఇలాగే పిలస్తుండగా.. సీఈఓకు అది ఏమాత్రం నచ్చడం లేదట. కానీ ఆ విషయాన్ని బయటకు చెప్పలేక ఆమె ముఖం మాడ్చుకుంటున్నారు. కానీ అనుకోకుండా ఇటీవలే ఉద్యోగులు అందరితో సీఈఓ మీటింగ్ పెట్టగా.. అక్కడే సదరు ఉద్యోగి అందరి ముందు సీఈఓను పేరు పెట్టి పిలిచారట. దీంతో తీవ్ర కోపోద్రేకానికి గురైన సీఈఓ ఇంకోసారి మీరు నన్ను పేరు పెట్టి పిలవొద్దని చెప్పారట.

అంతటితో ఆగకుండా ఓ శిక్షను కూడా విధించారు. ముఖ్యంగా నేను మిమ్మల్ని ఇంకోసారి పేరు పెట్టి పిలవను మేడమ్ అంటూ 100 సార్లు ఇంపోజిషన్ రాస్కు రమ్మని వివరించారు. అయితే దాన్ని కంపెనీ వాట్సాప్ గ్రూపులో పెట్టమని కూడా చెప్పారట. అయితే చెప్పింది సీఈఓ కాబట్టి.. ఇచ్చిన ఇంపోజిషన్ రాయకపోతే ఉద్యోగంలోంచి తీసేస్తారేమోనని భయపడ్డ సీనియర్ ఉద్యోగి 100 సార్లు ఇంపోజిషన్ రాశారట. అంతేకాకుండా సీఈఓ ఆదేశాల మేరకు దాన్ని కంపెనీలో గ్రూపులో కూడా పెట్టారట. అది చూసిన ఉద్యోగులు అంతా షాక్ అయ్యారు.

ముఖ్యంగా అదే కంపెనీలో పని చేసే ఓ యువకుడు.. తన స్నేహితుడికి ఈ విషయాన్ని చెప్పారు. అయితే మిత్రుడు చెప్పిన ఈ విషయం విన్న వ్యక్తి షాక్ అయి దాన్ని సోషల్ మీడియా వేదికగా పంచుకున్నాడు. ప్రస్తుతం ఇందుకు సంబంధించిన స్టోరీ నెట్టింట తెగ వైరల్ అవుతుండగా.. సదరు వ్యక్తి తన కంపెనీలో జరిగిన విషయాన్ని వివరిస్తున్న స్క్రీన్ షాట్లను సైతం పెట్టారు. ఇది చూసిన నెటిజెన్లు అంతా ఒక్కో విధంగా స్పందిస్తున్నారు. రాజీనామా చేయడానికి బదులుగా ఇంపోజిషన్ ఎందుకు రాశారని కొందరు, మేడమ్ అని పిలిస్తే సరిపోయేదానికి ఇంత పెద్ద గొడవ ఎందుకు చేసుకున్నారని మరికొందరు కామెంట్లు చేస్తున్నారు. అలాగే కంపెనీ పేరు చెప్పండి బ్రో.. నేను అస్సలే జాయిన్ అవ్వను అంటూ మరో నెటిజెన్ రాసుకొచ్చాడు.