అన్నంలో విషంపెట్టి ముగ్గురు పిల్లల్ని చంపిన తల్లి..

ఈ ప్రపంచంలో తల్లి ప్రేమను మించినది మరొకటి ఉండదు. కన్న బిడ్డల కోసం తల్లి ఏం చేయడానికైనా సిద్ధపడుతుంది. బిడ్డ ప్రాణం ప్రమాదంలో ఉందంటే తన ప్రాణాలను సైతం పణంగా పెడుతుంది. తన ప్రాణాలను ఏమాత్రం లెక్క చేయకుండా బిడ్డను కాపాడేందుకు ప్రయత్నిస్తుంది. బిడ్డల్ని కంటికి రెప్పలా కాచుకుంటుంది. కానీ.. ప్రస్తుత కాలంలో తల్లి ప్రేమకు నిర్వచనమే మారిపోయింది. కంటికి రెప్పలా కాపాడుకోవాల్సిన తల్లిదండ్రులే కన్నబిడ్డల పాలిట యమపాశాలుగా మారుతున్నారు. ఇటీవల ఏపీలోని కాకినాడ, కోనసీమ, విశాఖ ఘటనలు మరువక ముందే సంగారెడ్డి జిల్లా అమీన్‌పూర్‌లో అత్యంత దారుణ ఘటన వెలుగులోకి వచ్చింది. ఓ తల్లి తన ముగ్గురు పిల్లలకు విషం పెట్టి చంపేసింది. ఆపై తాను ఆత్మహత్యాయత్నానికి పాల్పడింది.

వివరాల్లోకి వెళితే.. రంగారెడ్డి జిల్లా మెడకపల్లికి చెందిన చెన్నయ్య కుటుంబం అమీన్‌పూర్ రాఘవేంద్ర కాలనీలో నివాసం ఉంటోంది. వాటర్‌ ట్యాంకర్‌ డ్రైవర్‌గా పని చేస్తున్న చెన్నయ్య.. భార్య రజిత, ముగ్గురు పిల్లలతో కలిసి గత కొన్నేళ్లుగా కలిసి ఉంటున్నాడు. రజిత ఓ ప్రైవేటు స్కూల్‌లో టీచర్‌గా పనిచేస్తోంది. అయితే గతకొంత కాలంగా భార్య భర్తల మధ్య గొడవలు జరుగుతున్నాయి. ఈ క్రమంలో ఇక బతికుండి లాభం లేదని పిల్లలతో పాటు చనిపోవాలని రజిత నిర్ణయం తీసుకుంది. భర్త డ్యూటికి వెళ్లగా.. గతరాత్రి తినే అన్నంలో విషం పెట్టింది. అన్నం తిన్న ముగ్గురు పిల్లలు సాయి కృష్ణ(12), మధు ప్రియ(10), గౌతమ్(8) నిద్రలోనే కన్నుమూశారు. వారితో పాటు విషం కలిపిన అన్నం తిన్న రజిత ప్రాణాపాయస్థితిలో కొట్టుమిట్టాడుతోంది.

గతరాత్రి 11 గంటల సమయంలో విధులు ముగించుకొని ఇంటికి వచ్చిన చెన్నయ్య పిల్లలు, భార్య నోటి నుంచి నురగలు రావటం, అచేతనంగా పడి ఉండటాన్ని గమనించాడు. పిల్లలు అప్పటికే చనిపోయి ఉండగా.. భార్య రజిత కొన ఊపిరితో కొట్టుమిట్టాడుతోంది. స్థానికుల సహాయంతో ఆమెను వెంటనే ఆసుపత్రికి తరలించారు. భార్య రజితే పిల్లలకు పెరుగన్నంలో విషం కలిపి ఇచ్చినట్లు చెన్నయ్య పోలీసులకు తెలిపాడు. ఈ మేరకు కేసు నమోదు చేసుకున్న పోలీసులు విచారణ చేపట్టారు. చెన్నయ్యను అదుపులోకి తీసుకొని విచారిస్తున్నారు. ఈ ఘటన స్థానికంగా విషాదాన్ని నింపింది. ముగ్గురు పిల్లలను తల్లే విషం పెట్టి చంపటం స్థానికులు విస్మయానికి గురవుతున్నారు. ఈ ప్రపంచంలో ఇంతకన్నా ఘోరం ఉంటుందా..? అని చర్చించుకుంటున్నారు.