ఆరు వారాల్లోగా రాపిడో, ఓలా, ఉబర్ బైక్ ట్యాక్సీ సర్వీసులను ఆపేయాలి..: కర్టాటక హైకోర్టు షాక్

బైక్ ట్యాక్సీ అగ్రిగేటర్ యాప్ రాపిడోకు భారీ ఎదురు దెబ్బ తగిలింది. కర్ణాటక హైకోర్టు బుధవారం రోజు బైక్ ట్యాక్సీ సేవలను నిలిపివేయాలంటూ సంచలన తీర్పును ఇఛ్చింది. కర్ణాటకలో రానున్న ఆరు వారాల్లో వీటిని నిలిపి వేయాలని రాష్ట్ర ప్రభుత్వం మరియు రవాణా శాఖను కోర్టు ఆదేశించింది. అలాగే బైక్ ట్యాక్సీ సేవలను మోటార్ వాహనాల చట్టం 1988 కింద చేర్చడానికి కర్ణాటక సర్కారుకు 3 నెలల సమయం ఇచ్చింది. ఇందుకు సంబంధించిన పూర్తి వివరాలు మీకోసం.

2021లో అప్పటి బీజేపీ సర్కారు బైక్ ట్యాక్సీ పథకాన్ని ప్రవేశ పెట్టగా.. 2022లో దీన్ని అమలు చేశారు. అయితే ముందే నుంచే ఆటోలు, క్యాబ్‌ల డ్రైవర్లు ఆ అమలును రద్దు చేయాలంటూ ఆందోళన చేశారు. ముఖ్యంగా బైక్ ట్యాక్సీ డ్రైవర్లు మహిళలతో అనుచితంగా ప్రవర్తించడంపై అనేక ఫిర్యాదులు వచ్చాయి. అంతేకాకుండా ఆటో, క్యాబ్ డ్రైవర్లతో గొడలు కూడా పెట్టుకుని.. దాడులకు పాల్పడ్డారు. దీంతో ఈ సమస్యను తీర్చేందుకు కర్ణాటక ప్రభుత్వం.. 25 రోజుల క్రితమే బైక్ ట్యాక్సీల పథకంపై నిషేధం విధించింది. మోటార్ వాహన చట్టం నిబంధనలను పాటించకపోగా.. మహిళలకు ఈ సేవలు ఏమాత్రం సురక్షితం కావని ప్రకటించింది.

దీంతో రాపిడో, ఓలా, ఉబర్ సహా ఇతర బైక్ ట్యాక్సీ సంస్థలు హైకోర్టును ఆశ్రయించాయి. ముఖ్యంగా మోటార్ వాహనాల చట్టం కింద తగిన పర్మిట్లతో ద్విచక్ర వాహనాలను.. రవాణా వాహనాలుగా నమోదు చేయాలని రవాణా శాఖను ఆదేశించాలని కోరుతూ పిటషన్లు వేశారు. దీనిపై నేడు న్యాస్థానం విచారణ జరపగా.. కర్ణాటక మోటార్ వాహన నిబంధనల ప్రకారం తెల్లటి నంబర్ ప్లేట్లు కల్గిన ద్విచక్ర వాహనాలు వాణిజ్య కార్యకలాపాలను నడపలేమని.. ఇలా చేయడం చట్ట విరుద్ధమే అవుతుందని రాష్ట్ర ప్రభుత్వం వాదించింది. మరోవైపు రాపిడో తాము వాహన చట్టాలకు అనుగుణంగానే బైక్ ట్యాక్సీ సేవలు నిర్వహిస్తున్నట్లు వెల్లడించింది.

ఇరువైపులా వాదనలు విన్న న్యాయస్థానం బైక్ ట్యాక్సీలను ఆరు వారాల్లోగా నిలిపి వేయడానికి చర్యలు తీసుకోవాలంటూ జస్టిస్ బీఎం శ్యామ్ ప్రసాద్ ప్రభుత్వాన్ని ఆదేశించారు. అలాగే బైక్ ట్యాక్సీ కార్యకలాపాలకు అవసరం అయిన నియమాలు, మార్గదర్శకాలను రూపొందించడానికి రాష్ట్ర ప్రభుత్వానికి మూడు నెలల సమయం ఇచ్చారు. సర్కారు నిబంధనలు అమల్లోకి వచ్చే వరకు మోటార్ సైకిళ్లను రవాణా వాహనాలుగా నమోదు చేయలేమని.. అలాంటి సేవలకు కాంట్రాక్ట్ క్యారేజ్ పర్మిట్లను జారీ చేయమని రవాణా శాఖను ఆదేశించలేమని వెల్లడించారు.