లక్నోపై రిటైర్డ్ హర్ట్‌గా అవుటైన తిలక్ వర్మ,,,సూర్య ఎమోషనల్ వీడియో వైరల్

లక్నో సూపర్ జెయింట్స్-ముంబై ఇండియన్స్ మ్యాచ్‌లో ఎన్నో ఎమోషనల్ మూమెంట్స్ ఉన్నాయి. ఆఖరి వరకూ రెండు జట్ల మధ్య దోబూచులాడిన విజయం చివరికి లక్నోని వరించింది. మిడిలార్డర్‌లో క్రీజులోకి వచ్చిన సూర్య కుమార్ యాదవ్ విజయానికి స్వల్ప దూరంలో వికెట్ కోల్పోయాడు. ఆ తర్వాత మ్యాచ్‌ని గెలిపిస్తాడు అనుకున్న తిలక్ వర్మ రిటైర్డ్ అవుటవడంతో స్కై స్టన్నయ్యాడు. అసలు ఏం జరుగుతుందో అర్థంగాక అయోమయ స్థితిలో ఉన్నాడు. సూర్యకుమార్ యాదవ్ రియాక్షన్ వీడియో నెట్టింట వైరల్ అవుతోంది.

ఐపీఎల్ 2025లో లక్నో సూపర్ జెయింట్స్-ముంబై ఇండియన్స్ మ్యాచ్ ఇంట్రెస్టింగ్‌గా సాగింది. పోరాడిన ముంబై ఆఖరి ఓవర్‌లో చేతులెత్తేసింది. ముంబై ఓపెనర్లు విల్ జాక్స్, ర్యాన్ రికెల్టన్ విఫలమవగా.. ఫస్ట్ డౌన్, సెకండ్ డౌన్‌లో వచ్చిన నమన్ ధీర్, సూర్యకుమార్ యాదవ్ మ్యాచ్‌ని నిలబెట్టారు. నమన్ 24 బంతుల్లో నాలుగు ఫోర్లు, మూడు సిక్సర్లతో 46 పరుగులు చేయగా, సూర్యకుమార్ 43 బంతుల్లో తొమ్మిది ఫోర్లు, ఒక సిక్సర్‌తో 67 పరుగులు చేశాడు.

ముంబై ఇన్నింగ్స్‌ 17వ ఓవర్‌లో అవేశ్ ఖాన్ వేసిన తొలి బంతిని బ్యాక్‌వర్డ్ స్క్వయర్ లెగ్ మీదుగా బౌండరీ తరలించేందుకు సూర్యకుమార్ యాదవ్ ప్రయత్నించాడు. అయితే సమద్ అద్భుతంగా క్యాచ్ అందుకుని మ్యాచ్ స్వరూపాన్నే మార్చేశాడు. సూర్యకుమార్ యాదవ్-తిలక్ వర్మ కలిసి 66 పరుగుల భాగస్వామ్యాన్ని నెలకొల్పారు.

సూర్యకుమార్ యాదవ్ అవుటైన తర్వాత తిలక్ వర్మతో కలిసి కెప్టెన్ హార్దిక్ స్కోర్ బోర్డును ముందుకు తీసుకెళ్తున్నాడు. అయితే 19వ ఓవర్ చివరి బంతికి సడెన్‌గా తిలక్ వర్మ పెవిలియన్‌కు వచ్చాడు. వికెట్ పడకుండానే తిలక్ పెవిలియన్‌కు వస్తుండటంపై అందరితో పాటు స్కై కూడా ఏం జరుగుతుందో అర్థంగాక అయోమయంలో ఉన్నాడు. అయితే ముంబై కోచ్ మహేల జయవర్దనే తిలక్ వర్మను రిటైర్డ్ అవుట్ చేశామని చెప్పడంతో సూర్యకుమార్ హార్ట్ బ్రేక్ అయింది.

ఏడు బంతుల్లో 24 పరుగులు చేయాల్సిన సమయంలో తిలక్ వర్మను రిటైర్డ్ అవుట్ చేసి శాన్‌ట్నర్‌ని దింపడం ఏంటంటూ స్కై షాక్ అయ్యాడు. తిలక్ వర్మను అలా పెవిలియన్‌కు పిలవడంపై సూర్య ఎంత హర్ట్ అయ్యాడో వీడియోలో చూస్తేనే తెలుస్తుంది. కెప్టెన్, కోచ్ తీసుకున్న నిర్ణయంపై చేసేదేమీ లేక అలా బాధపడుతూ చూస్తూ ఉండిపోయాడు. ఈ మ్యాచ్‌లో కెప్టెన్ హార్దిక్ పాండ్యా ఆఖరి వరకూ క్రీజులో ఉన్నప్పటికీ ముంబై ఇండియన్స్ గెలవలేకపోయింది. లక్నోపై 12 పరుగుల తేడాతో ఓటమిపాలయింది.