ప్రభుత్వం కావాలనే జగన్ కి బందోబస్త్‌ ఏర్పాటు చెయ్యలేదు

దేశంలో అత్యంత ప్ర‌జాద‌ర‌ణ ఉన్న నాయ‌కుల్లో ఒక‌రైన మాజీ ముఖ్యమంత్రి వైయస్ జ‌గ‌న్‌కు పోలీస్ భద్రత కల్పించడంలో కూటమి ప్రభుత్వం పూర్తిగా విఫలమైందని మాజీ ఎమ్మెల్యే కొరుముట్ల శ్రీనివాసులు ఆగ్రహం వ్యక్తం చేశారు. తాడేపల్లి వైయస్ఆర్‌సీపీ కేంద్ర కార్యాలయంలో మీడియాతో మాట్లాడుతూ కూటమి ప్రభుత్వ ఏర్పాటైన తరువాత నుంచి జెడ్‌ప్లస్ కేటగిరి ఉన్న వైయస్ జగన్‌ భద్రత పట్ల ప్రభుత్వం నిర్లక్ష్యంగా వ్యవహరిస్తోందని మండిపడ్డారు. రాష్ట్రంలో ఆయన ఎక్కడ పర్యటించినా వేల సంఖ్యలో అభిమానులు వస్తుంటారని, ప్రభుత్వం ఉద్దేశపూర్వకంగానే కనీస పోలీస్ బందోబస్త్‌ కూడా ఏర్పాటు చేయలేదని ధ్వజమెత్తారు.అయన మాట్లాడుతూ..... రామగిరి మండలంలో వైయస్ఆర్‌సీపీ నాయకుడు లింగ‌మ‌య్య కుటుంబాన్ని ప‌రామ‌ర్శించి వారి కుటుంబానికి న్యాయం చేయాల‌నే ఉద్దేశంతో పాపిరెడ్డిప‌ల్లెకు వెళ్లిన వైయ‌స్ జ‌గ‌న్‌కి భ‌ద్ర‌త క‌ల్పించ‌డంలో ఈ ప్ర‌భుత్వం ఉదాసీనంగా వ్యవహరించింది. ప్ర‌తిప‌క్ష నాయ‌కుడికి భ‌ద్ర‌త క‌ల్పించాల్సిన ప్ర‌భుత్వం త‌న బాధ్య‌త‌ను విస్మ‌రించింది. అంతే కాకుండా జ‌గన్ ప‌ర్య‌ట‌న‌పై హోంమంత్రి అనిత అహంకార‌పూరితంగా చేసిన వ్యాఖ్య‌లను ప్ర‌జాస్వామ్య‌వాదులు ఖండించాలి. లోపాల‌ను స‌రిద్దిద్దుకుంటామ‌ని కానీ, నిర్ల‌క్ష్యానికి కార‌ణ‌మైన వారిపై చ‌ట్ట‌ప‌రంగా చ‌ర్య‌లు తీసుకుంటామ‌ని కానీ హోంమంత్రి చెప్ప‌క‌పోవ‌డం చూస్తుంటే జ‌గ‌న్ భ‌ద్ర‌త విష‌యంలో ప్ర‌భుత్వ వ్య‌వ‌హారశైలిపై ప‌లు అనుమానాలు క‌లుగుతున్నాయి. జ‌గ‌న్‌ను పులివెందుల ఎమ్మెల్యే అని మాట్లాడినంత మాత్రాన ఆయ‌నకున్న ప్ర‌జాద‌ర‌ణను ఏమాత్రం త‌గ్గించ‌లేరని గుర్తించుకోవాలి. రోజూ ఏదొక మూల‌న రాష్ట్రంలో మ‌హిళ‌ల‌పై దాడులు జ‌రుగుతున్నా ఈ హోంమంత్రికి  బాధితులను ప‌రామ‌ర్శించే తీరిక ఉండ‌దు. వైయ‌స్ జ‌గ‌న్ ప్ర‌జ‌ల‌కు అండ‌గా నిల‌బడితే ఆయ‌న్ను విమ‌ర్శించ‌డానికి మాత్రం మీడియా ముందు వాలిపోతుంటారు అని మండిపడ్డారు.