పోక్సో కేసులో బాంబే హైకోర్టు సంచలన తీర్పు

ముంబయికి చెందిన 15 ఏళ్ల బాలిక 2020వ సంవత్సరం ఆగస్టు నెలలో ఇంటి నుంచి వెళ్లిపోయింది. అయితే అప్పటికే ఆమె ప్రేమ పేరుతో ఓ యువకుడితో మాట్లాడడం గమనించిన తల్లిదండ్రులు నవీ ముంబయిలోని అతడి ఇంటికి వెళ్లి చూశారు. అక్కడ ఆమె కనిపించకపోయే సరికి సదరు యువకుడికి ఫోన్ చేసి ఆరా తీశారు. తన వద్ద బాలిక లేదని చెప్పగా.. మరింతగా వెతికారు. అయితే రెండ్రోజుల తర్వాత బాలిక తండ్రికి ఫోన్ చేసి తాను ఆ యువకుడితోనే ఉన్నట్లు చెప్పింది. అయితే ప్రస్తుతం నవీ ముంబయిలోనే లేమని, ఉత్తర ప్రేదశ్‌లోని యువకుడి గ్రామంలో ఉన్నట్లు వివరించింది. దీంతో తల్లిదండ్రులు అక్కడితో విషయాన్ని వదిలేశారు.

అయితే 10 నెలల తర్వాత మళ్లీ బాలిక తండ్రికి ఫోన్ చేసి తాను గర్భం దాల్చినట్లు వివరించింది. అలాగే సదరు యువకుడు తనను పెళ్లి చేసుకోవడానికి ఒప్పుకోవడం లేదని పేర్కొంది. దీంతో బాలిక అభ్యర్థన మేరకు తల్లలిదండ్రులు పోలీసులను ఆశ్రయించారు. 2019 నుంచే బాలిలకు అతడితో పరిచయం ఉందని.. అతడు ప్రేమిస్తున్నానంటూ వెంట పడగా తనకు కూడా నచ్చి ఓకే చెప్పినట్లు వివరించింది. అయితే తమ బంధం తల్లిదండ్రులకు నచ్చక పోవడంతో.. 2020లో ఇంటి నుంచి వెళ్లిపోయినట్లు వివరించింది. అయితే అదే ఏడాది యువకుడు తనను శారీరకంగా లొంగదీసుకున్నాడని.. ఆ తర్వాత ఆయన స్వగ్రామానికి తీసుకెళ్లి అక్కడే ఉంచున్నట్లు బాలిక ఫిర్యాదులో వెల్లడించింది.

ఈక్రమంలోనే తాను గర్భం దాల్చానని.. కానీ ఇప్పుడు యువకుడు తనను పెళ్లి చేసుకోవడం లేదని పోలీసులకు చెప్పింది. దీంతో పోలీసులు యువకుడిపై పోక్సో కేసు పెట్టి అతడిని అరెస్ట్ చేశారు. చాలా రోజులుగా జైల్లోనే ఉంటున్నాడు. అయితే తాజాగా యువకుడు బెయిల్ మంజూరు చేయాలంటూ బాంబే హైకోర్టును ఆశ్రయించాడు. ఈక్రమంలోనే నేడు న్యాయస్థానం విచారణ జరిపింది. అయితే ఇదంతా జరిగిన సమయంలో బాలిక మైనర్ అని, ఆమె అంగీకారంతో అసలు ఏమాత్రం పని లేదంటూ ఆమె తరఫు న్యాయవాది వాదించారు. బెయిల్ మంజూరు చేయొద్దని కోర్టును కోరారు.

ఇరువైపులా వాదనలు విన్న బాంబే హైకోర్టు.. బాలిక ఇష్టంతోనే యువకుడితో వెళ్లినట్లు ఆమె ఇచ్చిన వాంగ్మూలం చూస్తుంటేనే తెలుస్తుందని చెప్పింది. ఆమె ఏం చేస్తుందో ఆమెకు పూర్తి అవగాహన ఉందని పేర్కొంది. 10 నెలలు బాలిక అతడితోనే కలిసుందని.. 18 ఏళ్ల వయసులోపే అయినా బాలిక చర్యలు, నిర్ణయాలపై చాలా స్పప్టంగా కనిపిస్తుందని చెప్పింది. అయితే బాలిక గ్రామంలో ఉన్నట్లు సమాచారం ఇచ్చినప్పటికీ వారు ఎలాంటి చర్యలు తీసుకోలేదని తల్లిదండ్రులను తప్పుపుట్టింది. అలాగే ఈ కేసులో నిందితుడిగా ఉన్న యువకుడికి బెయిల్ మంజూరు చేసింది.