పండుగ చేసుకునేందుకు వెళ్తుండగా రోడ్డు ప్రమాదం

మధ్య ప్రదేశ్‌లోని భేదాఘాట్ చౌకిటాల్ ప్రాంతానికి చెందిన ఆరుగురు ఓ గుడికి వెళ్లి మేకను బలిచ్చి పండుగ చేసుకోవాలనుకున్నారు. ముఖ్యంగా కిషన్ పటేల్, సాగర్ పటేల్, రాజేంద్ర పటేల్, మహేంద్ర పటేల్, మనోజ్ పటేల్, జితేంద్ర పటేల్.. 30 నుంచి 35 ఏళ్ల వయసు వారు. అందులోనూ వీరంతా స్నేహితులు కాగా.. నర్సింగాపూర్ జిల్లాలోని దుల్హాదేవ్ మహారాజ్ ఆలయానికి వెళ్లాలనుకున్నారు. ముందుగానే బలిచ్చేందుకు ఓ మేకను కొనుగోలు చేసి స్కార్ఫియో వాహనం మాట్లాడుకుని మరీ.. ఏప్రిల్ 10వ తేదీన ప్రయాణం అయ్యారు. ఆలయానికి చేరుకున్న తర్వాత స్వామి వారిని దర్శించుకుని.. మేక చెవి కోసి బలిచ్చేందుకు బయలు దేరారు.

మేకను బలివ్వాలంటే జబల్‌పూర్ వెళ్లాల్సి ఉండగా.. వాహనంలో ప్రయాణం ప్రారంభించారు. చార్గవాన్ ప్రాంతానికి చేరుకోగానే వారి వాహనం ప్రమాదానికి గురైంది. ముఖ్యంగా వాహనం వంతెన పైనుంచి అదుపు తప్పి కింద ఉన్న సోమవతి నదిలో పడిపోయింది. ఈ ప్రమాదంలో వాహనంలో ఉన్న కిషన్ పటేల్, సాగర్ పటేల్, రాజేంద్ర పటేల్, మహేంద్ర పటేల్‌లు అక్కడికక్కడే ప్రాణాలు కోల్పోయారు. మనోజ్ పటేల్, జితేంద్ర పటేల్‌లకు మాత్రం తీవ్ర గాయాలు అయ్యాయి. అలాగే వీరు బలిచ్చేందుకు తీసుకెళ్లిన మేక కూడా ప్రాణాలతో బయట పడింది.

ప్రమాద విషయం గుర్తించిన స్థానికులు పోలీసులుకు సమాచారం అందించారు. హుటాహుటిన రంగంలోకి దిగిన పోలీసులు క్షతాగాత్రులను స్థానిక ఆస్పత్రికి తరలించారు. ప్రస్తుతం వారికి వైద్యులు చికిత్స అందిస్తున్నారు. మరోవైపు మృతదేహాలను పోస్టుమార్టం నిమిత్తం స్థానిక ప్రభుత్వాసుపత్రికి పంపించారు. అయితే ప్రమాదానికి డ్రైవర్ మద్యం సేవించి ఉండడమేనని పోలీసులు చెబుతున్నారు. అందులో ఉన్న మృతులు, క్షతగాత్రులు సైతం వాహనంలోనే మద్యం తాగారని గుర్తించారు. అయితే ఇంత జరిగినా మేక బతకడం చూసి ఆశ్యర్యపోయారు. నిజంగానే దానికి భూమ్మీద నూకలు ఉన్నాయని.. అందుకే బతికిపోయిందంటూ చెప్పుకొస్తున్నారు.