పోప్ ఫ్రాన్సిస్ మృతి.. కొత్త పోప్ ఎవరు

కేథలిక్‌ల అత్యున్నత మత గురువు పోప్ ఫ్రాన్సిస్ 88 ఏళ్ల వయసులో సోమవారం రోజు ఉదయం ప్రాణాలు విడిచారు. గత కొంత కాలంగా ఆయన శ్వాసకోశ సమస్యలు, డబుల్ న్యూమోనియా, కిడ్నీ సంబంధిత వ్యాధులతో తీవ్రంగా బాధపడుతూ.. ఈరోజు చనిపోయారు. పోప్ ఫ్రాన్సిస్ మృతితో.. పోప్ స్థానం ఖాళీ అయింది. ఈక్రమంలోనే కొత్త పోప్ ఎవరు అనే విషయం చర్చనీయాంశంగా మారింది. తదుపరి పోప్ ఎవరు, ఆయన్ను ఎలా ఎన్నుకుంటారు, ఎప్పుడు, ఎవరు ఈ నిర్ణయాన్ని ప్రకటిస్తారో మనం ఇప్పుడు తెలుసుకుందాం.

కొత్త పోప్ ఎన్నిక అనేది సాధారణంగా పోప్ మరణించిన 15 రోజుల నుంచి 20 రోజుల మధ్య జరుగుతుంది. వాటికన్ సిటీలోని కేథలిక్ చర్చిలో అత్యంత సీనియర్ అధికారులు కొత్త పోప్‌ను ఎన్నుకుంటారు. వారందరినీ కలిసి కాలేజ్ ఆఫ్ కార్డినల్స్ అని పిలుస్తుంటారు. అయితే వీరందరూ పురుషులే. ఇందులో ఒక్క మహిళ కూడా లేదు. ముఖ్యంగా వీరిని నేరుగా పోప్ నియమిస్తుంటారు. ప్రస్తుతం 252 మంది కేథలిక్ కార్డినల్స్ ఉండగా.. 138 మంది మాత్రమే తదుపురి పోప్‌ను ఎన్నుకోవడానికి అర్హులు. ఎందుకంటే వీరందరికీ 80 ఏళ్ల కంటే తక్కువ వయసు.

80 సంవత్సరాల పైబడిన వారందరినీ ఈ ఎన్నికల్లో ఓటు వేయనివ్వరు. కాకపోతే వీరందా పోప్ ఎన్నిక చర్చల్లో పాల్గొనవచ్చు. ప్రస్తుతం 114 మంది కార్డినల్స్ వయసు 80 ఏళ్లు దాటగా.. వీరంతా ఎన్నికకు దూరంగా ఉండబోతున్నారు. సాధారణంగా పోప్ మరణించినప్పుడు లేదా రాజీనామా చేసిన తర్వాత ఈ ఎన్నిక సాగుతుంటుంది. అయితే కార్డినల్స్ కాన్‌క్లేవ్ అనే రహస్య సమావేశంలో ఈ ఓటింగ్ ప్రక్రియ జరుగుతుంది. ఇందులో 2/3 మెజార్టీ అవసరం పడుతుండగా.. ఈ మెజార్టీ వచ్చే వరకు కాన్‌క్లేవ్ రహస్య సమావేశాన్ని నాలుగు రౌండ్ల వరకు నిర్వహిస్తుంటారు.

దీనికి రోజులు, వారాలు, నెలల సమయం కూడా పట్టే అవకాశం ఉంటుంది. అలాగే కార్డినల్స్ బ్యాలెట్ పేపర్లను కాల్చడం వల్ల రోజుకు రెండు సార్లు వెలువడే పొగ ద్వారా ఎన్నికలు ఎలా సాగుతున్నాయో తెలుస్తుంది. ముఖ్యంగా నలుపు రంగు పొగ వస్తే ఎన్నిక పూర్తి కాలేదని, తెల్లటి పొగ వస్తే కొత్త పోప్ ఎన్నిక అయినట్లు అర్థం. అయితే తెల్ల పొగ వెలువడిన గంటలోపే కొత్త పోప్.. సెయింట్ పీటర్స్ స్క్వేర్ బాల్కనీలోకి వచ్చి అందరికీ కనిపిస్తారు. ఆ తర్వాతే ఆయన పేరు ప్రస్తావించి పోప్‌గా ప్రకటిస్తారు. అయితే కొత్త పోప్ పేరును.. ఈ సమయంలో మార్చుకునే అవకాశం కూడా ఉంటుంది. పోప్ ఫ్రాన్సిస్ అసలు పేరు జార్జ్ మారియో బెర్గోగ్లియో కాగా.. ఆయన సెయింట్ ఫ్రాన్సిస్ ఆఫ్ ఆస్సిసి గౌరవార్థం తన పేరును ఫ్రాన్సిస్‌గా మార్చుకున్నారు.

బాప్తిజం తీసుకున్న రోమన్ కేథలిక్‌లు ఎవరైనా పోప్ అయ్యేందుకు ఎన్నికల్లో పోటీ చేసే అవకాశం ఉంటుంది. అయితే సంప్రదాయకంగా కార్డినల్స్ తమలో ఒకరిని పోప్‌గా ఎంచుకునేందుకు ప్రాధాన్యం ఇస్తుంటారు. ఇలా ఎక్కువగా అమెరికా, ఇటలీకి చెందిన వాళ్లకే ఎక్కువగా పోప్ అయ్యే అవకాశం దక్కింది. చూడాలి మరి తదుపరి పోప్ ఎవరవుతారు, ఏ దేశానికి చెందిన వారికి అవకాశం వస్తుందనేది.