పహల్గామ్ ఉగ్రదాడి తర్వాత భారత్ అంటే భయపడుతున్న పాక్

జమ్మూ కాశ్మీర్ ఉగ్రదాడి తర్వాత ఇప్పుడు భారత్ అంటే పాకిస్తాన్ భయపడుతున్నట్లు కనిపిస్తోంది. పహల్గామ్‌ ఉగ్రదాడికి తమకు ఎలాంటి సంబంధం లేదని ఇప్పటికే పాక్ రక్షణ శాఖ మంత్రి ఖవాజా అసిఫ్ మీడియాకు వెల్లడించారు. అయితే ఈ దాడికి ప్రతీకారం కచ్చితంగా భారత్ తీసుకుంటుంది అని పాక్ భావిస్తోంది. ఈ నేపథ్యంలోనే ఈ ఉగ్రదాడితో అలర్ట్ అయిన పాక్.. సైన్యాన్ని అప్రమత్తం చేసింది. ఈ క్రమంలోనే భారత సరిహద్దుల్లోకి పాక్ యుద్ధ విమానాలను మోహరిస్తోందనే వార్తలు ఇప్పుడు తీవ్ర చర్చనీయాంశంగా మారాయి. అయితే ఇప్పటికే విమానాలు వైమానిక స్థావరాలకు బయల్దేరినట్లు సోషల్ మీడియాలో వాటి ట్రాకింగ్‌కు సంబంధించిన స్క్రీన్ షాట్లు వైరల్ అవుతున్నాయి. దీంతో రెండు దేశాల మధ్య మరోసారి తీవ్ర ఉద్రిక్త పరిస్థితులు నెలకొన్నాయి.

పహల్గామ్ ఘటనతో అప్రమత్తమైన పాకిస్తాన్ మిలిటరీ.. తమ యుద్ధ విమానాలను కరాచీ నుంచి ఉత్తరాన ఉన్న వైమానిక స్థావరాలకు పంపించినట్లు వార్తలు వస్తున్నాయి. విమానాల ట్రాకింగ్‌కు సంబంధించి నెటిజన్లు ఎక్స్‌లో స్క్రీన్‌ షాట్లు షేర్‌ చేస్తున్నారు. ఆ స్క్రీన్‌ షాట్లలో ఉన్న వివరాల ప్రకారం.. కరాచీలోని దక్షిణ ఎయిర్‌కమాండ్ నుంచి ఉత్తరం వైపున ఉన్న లాహోర్, రావల్పిండి నగరాలకు సమీపంలో ఉన్న ఎయిర్‌బేస్‌ల వైపు పాక్‌ యుద్ధ విమానాలు బయల్దేరుతున్నాయని తెలుస్తోంది. పాక్‌కు అత్యంత కీలకమైన నూర్‌ఖాన్ బేస్ రావల్పిండిలో ఉంది. ఇది మన దేశ సరిహద్దు సమీపంలో ఉంటుంది. ఇక ఆ స్క్రీన్ షాట్లలో రవాణా విమానమైన లాక్‌హీడ్ సీ-130 హెర్క్యూలస్, నిఘా కోసం, వీఐపీల తరలింపునకు వాడే ఎంబ్రారర్ ఫోనమ్ 100 జెట్ విమానం కనిపించాయి.

2019లో జమ్మూ కాశ్మీర్‌లోని జమ్మూ శ్రీనగర్ హైవేపై జరిగిన పుల్వామా ఉగ్రదాడిలో 40 మంది సైనికులు అమరులయ్యారు. దీనిపై తీవ్రంగా స్పందించిన మోదీ సర్కార్.. బాలాకోట్‌లోని జైషే మహమ్మద్ గ్రూప్‌ ట్రైనింగ్ సెంటర్లపై వైమానిక దాడులు నిర్వహించి ప్రతీకారం తీర్చుకుంది. ఈ నేపథ్యంలోనే గతంలో జరిగిన ప్రతీకార దాడిని దృష్టిలో ఉంచుకుని పాక్ ఆర్మీ అలర్ట్ అవుతున్నట్లు తెలుస్తోంది.