నాన్న ప్రోత్సాహం వల్లే సివిల్స్‌లో రెండో ర్యాంకు సాధించా..: హర్షిత గోయల్

ఢిల్లీ అఖిల భారత సర్వీసుల్లో నియామకాల కోసం యూపీఎస్సీ నిర్వహించిన సివిల్స్ - 2024 తుది ఫలితాలు మంగళ వారం రోజు మధ్యాహ్నం విడుదల అయిన విషయం అందరికీ తెలిసిందే. అయితే ఈ ఫలితాల్లో శక్తి దూబే మొదటి ర్యాంకుతో సత్తా చాటగా.. గుజరాత్‌కు చెందిన హర్షిత గోయల్ రెండో ర్యాంకుతో సంచలనం సృష్టించారు. ఈ సందర్భంగానే హర్షిత గోయల్ మీడియాతో మాట్లాడుతూ.. చాలా ఎమోషనల్ అయ్యారు. తన తల్లి చనిపోవడంతో తండ్రే దగ్గరుండి అన్ని రకాలుగా తనను ప్రోత్సహించారని చెప్పుకొచ్చారు. ఆయన సపోర్ట్ వల్లే తాను ఈరోజు ఈ స్థాయికి చేరుకోగలిగానంటూ వెల్లడించారు. ఆ పూర్తి వివరాలు మీకోసం.

యూపీఎస్సీ సివిల్స్ ఫలితాల్లో గుజరాత్‌కు చెందిన హర్షిత గోయల్ రెండో ర్యాంకుతో సత్తా చాటారు. ఈ సందర్భంగానే ఆమె మీడియాతో మాట్లాడుతూ చాలా ఎమోషనల్ అయ్యారు. ఇంత పెద్ద విజయం సాధించడం చాలా సంతోషంగా ఉందని చెప్పారు. పలితాలు చూసుకోగానే రెండో ర్యాంకు వచ్చినట్లు తెలుసుకుని నమ్మలేకపోయానని అన్నారు. కానీ కాసేపు కాగానే.. తాను ఐఏఎస్ కావాలనే కలను సాకారం చేసుకున్నట్లు తెలుసుకుని చాలా సంబుర పడిపోయినట్లు వివరించారు. అలాగే తన కుటుంబ నుంచి తానే మొదటి సర్వెంట్ కాబోతున్నానంటూ హర్షం వ్యక్తం చేశారు.

సివిల్స్ సాధించేందుకు తానెంతో కష్ట పడగా.. కుటుంబ సభ్యులు, స్నేహితుల నుంచి కూడా పూర్తి మద్దతు లభించిందని హర్షిత గోయల్ పేర్కొన్నారు. తన తల్లి చనిపోయిందని.. అయినప్పటికీ తండ్రే దగ్గరుండి అన్నీ చూసుకున్నారని వెల్లడించారు. తండ్రి ఇలా అన్ని రకాలుగా ప్రోత్సహించడం వల్లే తాను సివిల్స్‌లో రెండో ర్యాంకు సాధించ గల్గినట్లు చెప్పుకొచ్చారు. తన స్నేహితులు కూడా ఎంతగానో సాయం చేశారని వివరించారు. ప్రజల జీవితాల్లో మార్పు తీసుకురాలనే ఉద్దేశంతోనే తాను ఐఏఎస్ కావాలనుకుంటున్నట్లు వెల్లడించారు. మరీ ముఖ్యంగా మహిళల అభ్యున్నతికి తోడ్పడేందుకు తనకు ఈ పదవి ఉపయోగపడుతుందని హర్షిత గోయల్ వ్యాఖ్యానించారు.

అలాగే ఎలా చదివారనే ప్రశ్నకు స్పందిస్తూ.. టైమ్ టేబుల్ పెట్టుకుని మరీ చదివేదాన్నని చెప్పారు. అలాగే తనకు చదవాలని అనిపించనప్పుడు ఫోన్ చూసేదాన్నని.. ఎక్కువగా ఇన్‌స్టాగ్రామ్ ఫాలో అయ్యేదాన్నని వెల్లడించారు. సోషల్ మీడియాకు సంబంధించిన ప్రశ్నలు కూడా ప్రిలిమ్స్‌లో వచ్చాయని మనం ఏవి వాడినా.. చదువుకు ఉపయోగపడేవి చూస్తే సరిపోతుందని హర్షిత చెప్పుకొచ్చారు. ప్రస్తుతం ఈమె చేసిన ఈ కామెంట్లు నెట్టింట వైరల్ అవుతున్నాయి. తల్లి లేకపోయినా ఇంత మంచి స్థాయికి చేరుకున్నారంటే మీ తండ్రి సహకారం ఎంతగా ఉంటుందో అర్థం చేసుకోగలమంటూ నెటిజెన్లు కామెంట్లు చేస్తున్నారు.