చంద్రబాబు డైవర్సిన్ పాలిటిక్స్ లో భాగమే లిక్కర్‌ స్కాం ఆరోపణలు

కూటమి సర్కార్ తాజాగా లిక్కర్‌ స్కాం అంటూ చేస్తున్న హంగామా అంతా  సృష్టించిన బేతాళ కథ అని వైయస్ఆర్‌సీపీ లీగల్ సెల్ అధ్యక్షుడు ఎం.మనోహర్‌రెడ్డి మండిపడ్డారు. తాడేపల్లి వైయస్ఆర్‌సీపీ కేంద్ర కార్యాలయంలో మీడియాతో మాట్లాడుతూ గాలినంతా పోగుచేసి ప్రభుత్వం తప్పుడు కేసులకు తెగబడుతున్నారని ఆగ్రహం వ్యక్తం చేశారు. కనీస ఆధారాలు లేని ఈ కేసులో అక్రమ అరెస్ట్‌లు చేస్తున్నారని అన్నారు. తెలుగుదేశం ప్రభుత్వ హయాంలో జరిగిన మద్యం కుంభకోణంపై నమోదైన కేసులకు కౌంటర్‌గా చంద్రబాబు డైరెక్షన్‌లో ఈ లిక్కర్ స్కాంను సృష్టించారని ధ్వజమెత్తారు. అయన మాట్లాడుతూ..... గతంలో తెలుగుదేశం పాల‌న‌లో మద్యం కుంభకోణం జ‌రిగితే దానిమీద వైయ‌స్సార్సీపీ ప్ర‌భుత్వ హ‌యాంలో విచారణ జరిపి కేసు పెట్ట‌డం జ‌రిగింది. దానిమీద దర్యాప్తులో నేటి ముఖ్య‌మంత్రి చంద్ర‌బాబును ఏ-3 గా చేర్చ‌డం జ‌రిగింది. ఎక్సైజ్ శాఖ మంత్రి, ఐఏఎస్ అధికారి కూడా ఇందులో నిందితులుగా ఉన్నారు. తాజాగా కూట‌మి ప్ర‌భుత్వం అధికారంలోకి వ‌చ్చాక దానికి కౌంటర్‌గా అదే అంశాల‌తో క‌క్ష‌క‌ట్టి వైయస్ఆర్‌సీపీ ప్రభుత్వ హయాంలో లిక్కర్ స్కాం అంటూ కొత్త డ్రామాను తెరమీదికి తీసుకువచ్చారు.  ఊరూపేరూ లేని వెంక‌టేశ్వ‌ర శ్రీనివాస్ అనే వ్యక్తి ఇచ్చిన ఫిర్యాదు ఆధారంగా కేసులు న‌మోదు చేశారు. ఆయ‌నేమ‌న్నా విజిల్ బ్లోయరా? లిక్క‌ర్ కేసుల‌తో అతనికేం సంబంధ‌మో తెలియ‌దు. 09.09.2024న  రిజిస్ట‌ర్ పోస్టు ద్వారా ఢిల్లీ స్కాం కంటే ఎక్కువ స్కాం ఇక్క‌డ జ‌రిగింద‌ని ఎక్సైజ్ డిపార్ట్‌మెంట్‌కు సదరు వ్యక్తి లేఖ పంపితే అదే రోజు స్టేట్ బేవ‌రేజెస్ కార్పొరేష‌న్ లిమిటెడ్ వారు విచార‌ణ చేయ‌మ‌ని ఆదేశించార‌ట‌. ఎవ‌రెవ‌ర్ని విచారించారో తెలియ‌దు కానీ, కేవ‌లం 9 రోజుల్లోనే రూ. 4 వేల కోట్ల కుంభ‌కోణం జ‌రిగింద‌ని రిపోర్టు ఇచ్చారు. ఎక్సైజ్ డిపార్ట్‌మెంట్‌ ప్రిన్సిప‌ల్ సెక్ర‌ట‌రీ ముఖేష్ కుమార్ మీనాకి 18.09.2024న ఈ రిపోర్ట్‌ స‌మ‌ర్పిస్తే, దీనిపై 23.09.2024న ఎఫ్ ఐఆర్ న‌మోదు అయ్యింది. ఈ విచారణలో అధికారులు 9 రోజుల్లో ఎవ‌రెవ‌ర్ని విచారించారు, ఏ రికార్డులు ప‌రిశీలించారు, ఏవేం ఆధారాలు సేక‌రించారో చెప్ప‌కుండా ఎఫ్ ఐఆర్ కాల‌మ్‌లో ముద్దాయిల వివ‌రాల ద‌గ్గ‌ర అన్‌నోన్ అక్యూజ్డ్ అని మాత్రం రాశారు. ముందుగానే కేసు న‌మోదు చేసి రాజ‌కీయ క‌క్ష‌తో ఎవ‌రిని వేధించాలో నిర్ణ‌యించుకున్న త‌ర్వాత వారిని ఇప్పుడు ఎంపిక చేసుకుని  ముద్దాయిలుగా చేరుస్తున్నారు అని వాపోతున్నారు.