బుమ్రాను క్రికెట్ దిగ్గజం డాన్ బ్రాడ్మన్తో పోల్చిన ఆడమ్ గిల్క్రిస్ట్
sports | Suryaa Desk | Published : Fri, May 02, 2025, 09:08 PM
టీమిండియా స్టార్ పేసర్, ముంబై ఇండియన్స్ బౌలింగ్ ఆయుధం జస్ప్రీత్ బుమ్రాపై ఆస్ట్రేలియా మాజీ వికెట్ కీపర్, దిగ్గజ బ్యాటర్ ఆడమ్ గిల్క్రిస్ట్ ప్రశంసల వర్షం కురిపించాడు. ఐపీఎల్ 2024 సీజన్లో బుమ్రా ప్రదర్శన చూసి ముగ్ధుడైన గిల్క్రిస్ట్, అతడిని ఏకంగా ఆసీస్ మహోన్నత క్రికెటర్ సర్ డొనాల్డ్ బ్రాడ్మన్తో పోల్చాడు. బౌలింగ్లో బుమ్రా ఆధిపత్యం చూస్తుంటే నాడు బ్రాడ్మన్ బ్యాటింగ్ లో చూపించిన ఆధిపత్యం గుర్తుకువస్తోందని అభిప్రాయపడ్డాడు.ప్రస్తుత ఐపీఎల్ సీజన్లో గాయం నుంచి కోలుకుని పునరాగమనం చేసిన బుమ్రా, అద్భుత ఫామ్ను కొనసాగిస్తున్నాడు. అతను ఆడిన మ్యాచ్లలో ముంబై ఇండియన్స్ విజయాల్లో కీలక పాత్ర పోషించాడు. ముఖ్యంగా, తన కట్టుదిట్టమైన బౌలింగ్తో ప్రత్యర్థులను ఉక్కిరిబిక్కిరి చేస్తున్నాడు. ఈ సీజన్లో ఇప్పటివరకు కేవలం 6.96 ఎకానమీ రేటుతో పరుగులు నియంత్రిస్తూ, మ్యాచ్కు సగటున 10 డాట్ బాల్స్తో ఒత్తిడి పెంచుతున్నాడు.గిల్క్రిస్ట్ మాట్లాడుతూ, "బుమ్రా బహుశా ఆల్ టైమ్ గ్రేట్ ఫాస్ట్ బౌలర్ కావచ్చు. గణాంకాలు, విభిన్న పరిస్థితుల్లో నైపుణ్యం పరిగణనలోకి తీసుకుని చూస్తే, సర్ డొనాల్డ్ బ్రాడ్మన్ తన సమకాలీనుల కంటే ఎంత ముందున్నాడో గుర్తొస్తుంది. బుమ్రా కూడా ఆ కోవకే చెందుతాడు" అని అన్నారు. గత బోర్డర్-గవాస్కర్ ట్రోఫీలో బుమ్రా ప్రదర్శన 32 వికెట్లు, సగటు 13 ఆస్ట్రేలియన్లను తీవ్రంగా భయపెట్టిందని గిల్క్రిస్ట్ గుర్తుచేసుకున్నారు. "ఫార్మాట్ ఏదైనా అతను అత్యుత్తమ బౌలర్ అనడంలో సందేహం లేదు" అని పేర్కొన్నారు.
|
|