తిరుమలలో వధూవరులకు ఉచితంగా ప్రత్యేక ప్రవేశ దర్శనం

తిరుమల తిరుపతి దేవస్థానం ఎన్నో సామాజిక సేవా కార్యక్రమాలు చేపడుతున్న సంగతి తెలిసిందే. ఈ క్రమంలోనే టీటీడీ ఉచిత వివాహాలను కూడా నిర్వహిస్తోంది. 2016 ఏప్రిల్ 25 నుంచి ఈ ఉచిత వివాహాల కార్యక్రమం కొనసాగుతోంది. తిరుమలలోని పాపవినాశనం రోడ్డులో ఉన్న కళ్యాణ వేదిక వద్ద టీటీడీ ఉచిత వివాహాలను నిర్వహిస్తూ వస్తోంది. ఈ కార్యక్రమానికి విశేష స్పందన లభిస్తోంది. 2016 నుంచి మే 1, 2025 వరకూ 26,214 వివాహాలు ఇక్కడ జరిగాయి. కళ్యాణ వేదిక వద్ద ఒక్కటయ్యే కొత్త జంటల కోసం టీటీడీ పలు ఏర్పాట్లు చేస్తోంది. పెళ్లి తంతు జరిపించడానికి కావాల్సిన పురోహితుడు, మంగళవాయిద్యాలతో పాటుగా పసుపు, కుంకుమ, కంకణాన్ని టీటీడీ ఉచితంగా అందిస్తోంది. అయితే పెళ్లికి కావాల్సిన మిగతా సామాగ్రిని వధూవరులు, వారి కుటుంబసభ్యులే తమ వెంట తెచ్చుకోవాల్సి ఉంటుంది.

కళ్యాణ వేదిక వద్ద వివాహం జరిగిన తర్వాత పెండ్లికొడుకు, పెండ్లికూతురితో పాటు వారి తల్లిదండ్రులకు తిరుమల శ్రీవారి దర్శనాన్ని ఉచితంగా కల్పిస్తారు. మొత్తం ఆరుగురిని ఏటీసీ వద్ద ఉన్న క్యూలైన్ నుంచి రూ.300ల ప్రత్యేక ప్రవేశ దర్శనం కోసం ఉచితంగా అనుమతిస్తారు. దర్శనం పూర్తి చేసుకున్న తర్వాత ఒక్కొక్కరికి ఒక్కో తిరుపతి లడ్డూ ఉచితంగా అందజేస్తారు.

టీటీడీ ఉచిత వివాహాలు.. ఆన్‌లైన్‌లో దరఖాస్తు విధానం

టీటీడీ ఉచిత వివాహాలు కోసం ఆన్‌లైన్ ద్వారా నమోదు చేసుకోవచ్చు. వధూవరులు, వారి తల్లిదండ్రులు మంచి ముహూర్తం చూసుకుని ఆన్‌లైన్ ద్వారా టీటీడీ కల్యాణవేదిక స్లాట్ బుక్ చేసుకునే సదుపాయం ఉంది. ఇందుకోసం టీటీడీ అధికారిక వెబ్‌సైట్ సంప్రదించాల్సి ఉంటుంది. కళ్యాణ వేదిక కాలమ్‌లో వివరాలను నమోదు చేసిన తర్వాత.. ఆధార్ కార్డులను అప్‌లోడ్ చేయాల్సి ఉంటుంది. ఇక వయసు నిర్ధారణ కోసం జనన ధ్రువపత్రం, పదో తరగతి మార్కుల జాబితా, టీసీ, మున్సిపల్ అధికారులు జారీ చేసిన బర్త్ సర్టిఫికేట్ అప్‌లోడ్ చేయాల్సి ఉంటుంది. అలాగే పెళ్లి తేదీ, సమయం నమోదు చేస్తే.. అక్‌నాలెడ్జ్‌మెంట్ జారీ చేస్తారు. ఈ అక్‌నాలెడ్జ్‌మెంట్ లెటర్ తీసుకుని వివాహానికి ఆరు గంటల ముందు తిరుమలలోని కళ్యాణ వేదిక కార్యాలయాన్ని సంప్రదించాలి.

టీటీడీ ఉచిత వివాహనికి అర్హతలు

వధూవరులు ఇద్దరూ హిందువులై ఉండాలి. వధువుకు 18 సంవత్సరాలు, వరునికి 21 సంవత్సరాలు పూర్తై ఉండాలి.. ప్రేమ వివాహాలు. రెండో వివాహాన్ని అనుమతించారు. వివాహానికి తల్లిదండ్రుల అనుమతి తప్పనిసరి. వారు రాలేని పక్షంలో సరైన పత్రాలు సమర్పించాల్సి ఉంటుంది. తిరుమలలో వివాహం తర్వాత పెళ్లిని రిజిస్ట్రర్ చేసుకునేందుకు కల్యాణవేదిక వద్ద టీటీడీ ఏర్పాట్లు కూడా చేసింది. వివరాలు, సంబంధిత పత్రాలు సమర్పించి వివాహాన్ని నమోదు చేసుకోవచ్చు.