తిరుపతి వ్యక్తికి పాకిస్థాన్‌ నుంచి ఫోన్ కాల్,,,,బాధితుడి ఫిర్యాదుతో పోలీసుల చర్యలు

పహల్గామ్ ఉగ్రదాడికి ప్రతీకారంగా పాకిస్థాన్ మీద భారత్ చేపట్టిన ఆపరేషన్ సిందూర్‌ కొనసాగుతుంటే.. ఏపీలోని తిరుపతికి చెందిన ఓ వ్యక్తికి పాకిస్థాన్ నుంచి బెదింపు ఫోన్ కాల్ రావడం చర్చనీయాంశమైంది. తిరుపతికి చెందిన త్రిలోక్ కుమార్‌కు పాకిస్థాన్ నుంచి బెదిరింపు ఫోన్ కాల్ వ్యవహారంపై పోలీసులు కీలక నిర్ణయం తీసుకున్నారు. రెండు రోజుల క్రితం పాకిస్థాన్‌ నుంచి వచ్చిన బెదిరింపు కాల్‌పై కేసు నమోదైంది. బాధితుడి ఫిర్యాదు మేరకు అలిపిరి పోలీసులు కేసు నమోదు చేశారు. త్రిలోక్ నుంచి పోలీసులు ఫోను సంభాషణ సమాచారం సేకరించారు.. ఆయన్ను అడిగి వివరాలు తీసుకున్నారు.. తాజాగా కేసు నమోదు చేశారు.

త్రిలోక్‌ కుమార్‌ తిరుపతిలో గాజుల వ్యాపారం చేస్తుంటారు. బుధవారం ఉదయం బైక్‌పై తిరుమలకు వెళ్తుండగా.. పాకిస్థాన్‌కు చెందిన అధికారిని మాట్లాడుతున్నానంటూ తిరుపతికి చెందిన పగడాల త్రిలోక్ కుమార్‌కు బుధవారం కాల్ వచ్చింది. పాకిస్థాన్ కోడ్ +92తో 3292527504 నంబరు నుంచి వాట్సాప్ కాల్ చేశారు. హిందీలో మాట్లాడిన అవతలి వ్యక్తి.. త్రిలోక్ కుమార్ కుటుంబ సభ్యుల పేర్లు మొత్తం చెప్పాడు. ‘మీరు ఏం చేస్తున్నారో మాకు తెలుసు. జాగ్రత్తగా ఉండండి. లేకుంటే మీ ఇంటిపై బాంబు వేసి పేల్చేస్తాం’ అని త్రిలోక్ కుమార్‌ను హెచ్చరించారు.

పాకిస్థాన్ నుంచి కాల్ రావడంతో త్రిలోక్ కుమార్ అప్రమత్తమయ్యారు. వెంటనే పోలీసులకు సమాచారం అందించారు. త్రిలోక్ దగ్గర నుంచి సమాచారం సేకరించిన పోలీసులు దర్యాప్తు జరుపుతున్నారు. అయితే పాకిస్థాన్ నుంచి కాల్ చేస్తున్నామని చెప్పినా తాను భయపడలేదని.. అతడికి హిందీలో థీటుగా సమాధానమిచ్చానని త్రిలోక్ చెబుతున్నారు. ఇండియా ఎవరికీ భయపడదంటూ గర్వంగా చెప్పారు. త్రిలోక్ తిరుపతికి చెందిన జనసేనపార్టీ కార్యకర్త అని చెబుతున్నారు.

పాకిస్థాన్‌పై పోరాడుతున్న భారత సైన్యం సంక్షేమం కోసం తిరుపతికి చెందిన వ్యక్తి తన వంతుగా విరాళం అందించారు. నగరానికి చెందిన జ్యోతికృష్ణ తన వంతుగా రూ.5 లక్షల విరాళాన్ని అందించారు. తిరుపతిలోని ఎన్‌సీసీ గ్రూప్‌ క్వార్టర్స్‌ గ్రూప్‌ కమాండర్‌ కల్నల్‌ సతీందర్‌ దాహియాకు విరాళం చెక్కును అందజేశారు. దేశం కోసం పోరాడుతున్న సైనికులలో ఆత్మస్థైర్యాన్ని నింపేందుకు తన వంతుగా తన వ్యాపారాల ద్వారా కష్టపడి సంపాదించిన సొమ్మును విరాళంగా ఇచ్చినట్లు తెలిపారు.