రోహిత్ శర్మ ఫుల్ టైమ్ రిటైర్మెంట్ అప్పుడే..: చిన్ననాటి కోచ్

టీమిండియా కెప్టెన్ రోహిత్ శర్మ ఏడాది కాలంలోనే రెండు ఫార్మాట్‌లకు గుడ్ బై చెప్పాడు. టీ20 వరల్డ్ కప్‌లో భారత్‌ను ఛాంపియన్‌గా నిలిపిన హిట్ మ్యాన్ ఆ తర్వాత పొట్టి ఫార్మాట్‌కు వీడ్కోలు పలికాడు. అయితే కీలకమైన ఇంగ్లండ్ టూర్‌కి ముందు రోహిత్ శర్మ అనూహ్యంగా టెస్టు క్రికెట్‌కు రిటైర్మెంట్ ప్రకటించాడు. ఇంగ్లండ్ సిరీస్‌కు భారత జట్టును ఎంపిక చేస్తున్న సమయంలో రోహిత్ శర్మ రిటైర్మెంట్ అందర్నీ షాక్‌కు గురిచేసింది.

ప్రస్తుతం రోహిత్ శర్మ వన్డే ఫార్మెట్‌లో మాత్రమే కొనసాగుతున్నాడు. రోహిత్ శర్మ తన కెరీర్‌లో రెండు టీ20 వరల్డ్‌కప్‌లతో పాటు.. రెండు ఛాంపియన్స్ ట్రోఫీలను అందుకున్నాడు. అందులో రెండు రోహిత్ కెప్టెన్సీలో భారత్ దక్కించుకోవడం విశేషం. 2007 టీ20 వరల్డ్‌కప్ ప్లేయర్‌గా ఉన్న రోహిత్.. 2024లో కెప్టెన్‌గా ట్రోఫీ అందుకున్నాడు. 2013 ఛాంపియన్స్ ట్రోఫీలో ధోనీ కెప్టెన్సీలో ఆడిన హిట్ మ్యాన్, 2025లో ఫైనల్‌లో అద్భుతంగా ఆడి భారత్‌కు ఛాంపియన్స్ ట్రోఫీని అందించాడు.

అయితే, రోహిత్ శర్మ తన కెరీర్‌లో ఇప్పటి వరకు వన్డే వరల్డ్‌కప్‌ను అందుకోలేదు. 2011 వన్డే వరల్డ్ జట్టులో కూడా రోహిత్ శర్మ లేడు. భారత్ వేదికగా 2023లో జరిగిన వన్డే వరల్డ్‌కప్‌లో అవకాశం వచ్చినప్పటికీ ఫైనల్‌లో ఓడిపోయింది. అయితే 2027 వన్డే వరల్డ్‌కప్‌ను అందుకోవడమే ప్రస్తుతం రోహిత్ శర్మ ముందున్న ప్రధాన లక్ష్యం అని హిట్ మ్యాన్ చిన్ననాటి కోచ్ సిద్ధేశ్ లాడ్ చెప్పాడు.

రెండు ఫార్మాట్లకు వీడ్కోలు పలికిన రోహిత్ శర్మ ఐసీసీ వన్డే వరల్డ్ కప్ 2027 వరకూ టీమిండియా కెప్టెన్‌గా కొనసాగే అవకాశం ఉంది. వైట్ బాల్ క్రికెట్, ముఖ్యంగా వన్డేల్లో రోహిత్ అద్భుతంగా రాణిస్తున్నాడు. దాంతో ఈ ఫార్మెట్‌లో రోహిత్‌ను తప్పించే అవకాశాలు చాలా తక్కువగా కనిపిస్తున్నాయి.

"అతని లక్ష్యం ఐసీసీ వన్డే వరల్డ్ కప్ 2027ను గెలవడమే, ఆ తర్వాతే రిటైర్మెంట్. వరల్డ్ టెస్టు ఛాంపియన్ షిప్ కూడా గెలవాలి అనుకున్నాడు.. దురదృష్టవశాత్తు క్వాలిఫై కాలేకపోయింది. ఇప్పుడు అతని ముందుంది 2027 వన్డే వరల్డ్ కప్. నేను కూడా వన్డే వరల్డ్ కప్ గెలిచిన తర్వాతే అతను రిటైర్ అవ్వాలని కోరుకుంటున్నాను" అని రోహిత్ శర్మ చిన్ననాటి కోచ్ సిద్ధేశ్ లాడ్ పీటీఐకి వివరించాడు.