మా దేశంలో పాకిస్తాన్ లీగ్ వద్దన్న దుబాయ్! పీఎస్ఎల్ వాయిదా పడినట్టే

పాకిస్తాన్ క్రికెట్ బోర్డు (పీసీబీ)కు ఇది ఘోర అవమానం అని చెప్పొచ్చు. భారత్ - పాక్ తీవ్ర ఉద్రిక్తతల నడుమ పాకిస్తాన్ సూపర్ లీగ్‌ (పీఎస్ఎల్)కు అంతరాయం ఏర్పడింది. లీగ్‌కు ఎలాంటి ఇబ్బంది లేకుండా వెంటనే దుబాయ్ వేదికగా మ్యాచ్‌లు నిర్వహిస్తామని పీసీబీ ఛైర్మన్ నఖ్వీ వెల్లడించారు. కానీ.. పాకిస్తాన్‌కు షాక్ ఇస్తూ దుబాయ్ నో చెప్పింది.

పాకిస్తాన్ సూపర్ లీగ్‌లో భాగంగా మరో ఎనిమిది మ్యాచ్‌లు జరగాల్సి ఉంది. ఈలోపే భారత్-పాక్ మధ్య యుద్ధ మేఘాలు కమ్ముకోవడంతో పాకిస్తాన్ క్రికెట్ బోర్డు దుబాయ్ వేదికగా పాకిస్తాన్ క్రికెట్ లీగ్‌కు అంతా సన్నద్ధం చేసుకుంది. అయితే, పాకిస్తాన్ అభ్యర్థనను ఎమిరేట్స్ క్రికెట్ బోర్డ్ (ఈసీబీ) తిరస్కరించింది. దాంతో ఇప్పుడు పాకిస్తాన్ సూపర్ లీగ్ వాయిదా పడినట్లేనని పాకిస్తాన్ క్రికెట్ బోర్డు సభ్యుల నుంచి తెలుస్తోంది. ఎమిరేట్స్ క్రికెట్ బోర్డుకు బీసీసీఐకి ఉన్న సంబంధంతోనే పాకిస్తాన్ సూపర్ లీగ్‌కు దుబాయ్ నో చెప్పినట్లు తెలుస్తోంది. గత కొంతకాలంగా భారత్ - దుబాయ్ క్రికెట్ బోర్డుల మధ్య సత్సంబంధాలు కొనసాగుతున్న విషయం తెలిసిందే.

పాకిస్తాన్ క్రికెట్ బోర్డు ఈ విషయాన్ని అధికారికంగా ఇంకా ధృవీకరించలేదు. పీఎస్ఎల్‌లో ఆడే విదేశీ ప్లేయర్ల భద్రత దృష్ట్యా ఈ లీగ్‌ను బయట దేశాల్లో నిర్వహించాలని అనుకుంటున్నామని పీసీబీ ఛైర్మన్ మోహ్సిన్ నఖ్వీ తెలిపారు. పాకిస్తాన్ ప్రధాన మంత్రి ఆదేశాల మేరకే పీఎస్ఎల్‌ను వాయిదా వేస్తున్నట్లు పాకిస్తాన్ క్రికెట్ బోర్డు ఓ ప్రకటనలో వెల్లడించింది.

ఇరు దేశాల మధ్య ఉద్రిక్తతల నేపథ్యంలో అటు పాకిస్తాన్ సూపర్ లీగ్‌తో పాటు ఇటు ఇండియన్ ప్రీమియర్ లీగ్ కూడా వాయిదా పడింది. ధర్మశాల వేదికగా జరిగిన పంజాబ్-ఢిల్లీ మ్యాచ్‌తో ఐపీఎల్‌కు బ్రేక్ పడింది. ఆ తర్వాత రోజే బీసీసీఐ అత్యవసర సమావేశం ఏర్పాటు చేసి వారం రోజులు వాయిదా వేస్తున్నట్లు స్పష్టతనిచ్చింది. వారం రోజుల తర్వాత అప్పటి పరిస్థితులకు అనుగుణంగా మరో ప్రకటన విడుదల చేయనున్నారు. మొత్తానికి యుద్ధ వాతావరణంతో ఇరు దేశాల క్రికెట్ అభిమానులకు నిరాశే మిగిలిందని చెప్పొచ్చు.