16 ఏళ్ల అల్లుడే కావాలంటున్న 35 ఏళ్ల అత్త

ఉత్తరప్రదేశ్‌లోని మీరట్‌లో ఒక వింత కేసు వెలుగులోకి రావడం సంచలనం రేపుతోంది. ఢిల్లీకి చెందిన 35 ఏళ్ల ఓ మహిళ.. తన మేనల్లుడైన 16 ఏళ్ల మైనర్ బాలుడిని తన భర్త అని పేర్కొనడం ఇప్పుడు తీవ్ర చర్చనీయాంశంగా మారింది. కొన్ని రోజుల పాటు ఆ బాలుడు.. మహిళ ఇంట్లో ఉండటంతో వారిద్దరి మధ్య ఏదో జరిగిందని అనుమానించిన బాలుడి కుటుంబ సభ్యులు.. వారిద్దరినీ దూరంగా ఉంచారు. దీంతో ఆ మహిళ.. ఉండలేక ఆ బాలుడి ఇంటికి వచ్చేసింది. తన భర్త చనిపోయాడని.. ఇప్పుడు ఉన్న భర్త మాత్రం ఆ బాలుడేనని తెగేసి చెప్పింది. దీంతో అది విన్న కుటుంబ సభ్యులతోపాటు పోలీసులు షాక్ అయిపోయారు. అసలు ఈ కేసులో ఏం చేద్దాం అనేది ఇప్పుడు పోలీసులు తర్జన భర్జన పడుతున్నారు. బాలుడు మైనర్ కాబట్టి ఇది పోక్సో చట్టం పరిధిలోకి వస్తుందా లేదా అని పోలీసులు విచారిస్తున్నారు.

మీరట్‌లోని దౌరాలా పట్టణానికి చెందిన ఆ 16 ఏళ్ల బాలుడిని ఎయిర్ కండిషనర్, రిఫ్రిజిరేటర్ రిపేరింగ్ నేర్చుకునేందుకు.. ఆ వితంతు మహిళ ఇంటికి ఢిల్లీకి పంపించారు. ఈ క్రమంలోనే వారి మధ్య సన్నిహిత సంబంధం ఏర్పడింది. కొంతకాలం తర్వాత ఆ బాలుడు తిరిగి ఇంటికి వచ్చిన తర్వాత అతడి ప్రవర్తనలో మార్పు రావడం గుర్తించిన కుటుంబ సభ్యులు.. తిరిగి అతడ్ని అత్త వద్దకు పంపించవద్దని నిర్ణయించుకున్నారు.

అయితే ఇంటికి వెళ్లిన అల్లుడు.. తిరిగి రాకపోవడంతో.. ఆ అత్త నేరుగా ఆ బాలుడి ఇంటికి వెళ్లింది. ఆ బాలుడిని తనతో పంపించాలని డిమాండ్ చేసింది. దీంతో బాలుడి కుటుంబ సభ్యులు పోలీసులకు సమాచారం అందించగా.. వారు రంగంలోకి దిగారు. పోలీసులు, కుటుంబ సభ్యుల సమక్షంలో అతడు తనకు మేనల్లుడు కాదని.. తన భర్త అని.. అతనితోనే జీవిస్తానని చెప్పడంతో అది విని వాళ్లంతా షాక్‌కు గురయ్యారు. ఈ ప్రకటనతో పోలీసులు కూడా ఆశ్చర్యపోయి.. ఆ పరిస్థితిలో ఏం చేయాలో ఒక్క క్షణం వారికి అర్థం కాలేదు.

ఈ ఘటనపై మీరట్ ఎస్పీ సిటీ ఆయుష్ విక్రమ్ సింగ్ స్పందించారు. బాలుడి వయస్సు సుమారు 16 ఏళ్లు కావడంతో భారతీయ చట్టం ప్రకారం అతను చట్టబద్ధంగా మైనర్ అని.. వివాహ సంబంధాలు లేదా శారీరక సంబంధాలకు అర్హుడు కాదని పేర్కొన్నారు. ఈ కేసు పోక్సో చట్టం కిందకు వస్తుందో లేదో బాలుడి వయస్సు ధృవీకరణ పత్రం నిర్ణయిస్తుందని తెలిపారు. మైనర్‌గా నిర్ధారించబడితే.. ఆ మహిళ తీవ్రమైన చట్టపరమైన పరిణామాలను ఎదుర్కోవాల్సి ఉంటుందని చెప్పారు.