రెండోసారి తండ్రైన తేజస్వీ యాదవ్.. బిడ్డను చూసేందుకు వచ్చిన మమతా బెనర్జీ

బీహార్ మాజీ సీఎం, ఆర్జేడీ చీఫ్ లాలూ ప్రసాద్ యాదవ్ ఇంట సందడి నెలకొంది. ఆయన కుమారుడు, బిహార్ మాజీ ఉపముఖ్యమంత్రి, ఆర్జేడీ నేత తేజస్వీ యాదవ్ రెండోసారి తండ్రి అయ్యారు. కోల్‌కతాలోని ఓ ఆస్పత్రిలో ఆయన సతీమణి రాజశ్రీ యాదవ్ పండంటి మగబిడ్డకు జన్మనిచ్చారు. ఈ విషయాన్ని తేజస్వి యాదవే స్వయంగా వెల్లడించారు. తన భార్య పండంటి మగబిడ్డకు జన్మ ఇచ్చినట్లు తెలిపారు. ఈ మేరకు ఫోటోను కూడా షేర్ చేశారు.

నిరీక్షణ చివరకు ముగిసింది అంటూ ఆయన ఎక్స్ వేదికగా పోస్టు పెట్టారు. "గుడ్ మార్నింగ్.. మా నిరీక్షణ చివరకు ముగిసింది. కుమారుడి రాకను ప్రకటిస్తున్నందుకు ఆనందంగా ఉంది. జై హనుమాన్" అంటూ పోస్టులో పేర్కొన్నారు. ప్రస్తుతం ఈ పోస్టు నెట్టింట తెగ వైరల్ అవుతోంది. ఇది చూసిన నెటిజన్లు, పలువురు రాజకీయ, సినీ ప్రముఖులు తేజస్వీ యాదవ్ దంపతులకు శుభాకాంక్షలు చెబుతున్నారు. పశ్చిమ బెంగాల్ ముఖ్యమంత్రి మమతా బెనర్జీ అియితే నేరుగా ఆస్పత్రికి వెళ్లి లాలూ కుటుంబ సభ్యులకు శుభాకాంక్షలు చెప్పారు. ఇందుకు సంబంధించిన ఫోటోలను దీదీ తన ఎక్స్ ఖాతాలో షేర్ చేశారు.

"తేజస్వీ యాదవ్ సతీమణి రాజశ్రీ యాదవ్ పండంటి మగబిడ్డకు జన్మనిచ్చారు. వారి ఆనందంలో పాలుపంచుకోవడం నాకు ఆనందంగా ఉంది. ఆ దంపతులతో పాటు లాలూ జీ కుటుంబానికి నా హృదయ పూర్వక శుభాకాంక్షలు. ఆశీస్సులు.. ఈరోజు వారిని కలవడం ఆనందంగా ఉంది. తల్లీ బిడ్డ ఇద్దరూ ఆరోగ్యంగా ఉన్నందుకు సంతోషంగా ఉంది. రాజశ్రీ కోల్‌కతాలో ఉన్న విషయం నాకు తెలుసు. అంతేకాకుండా తేజస్వీ కూడా తనకు బిడ్డ పుట్టిన విషయాన్ని నిన్న సాయంత్రం తెలిపారు. వస్తానని మాట ఇచ్చి.. ఈ రోజు నేను ఆస్పత్రికి వెళ్లి వారిని కలిశాను. ఈ చిన్నారి గొప్పగా ఎదిగి ఆ కుటుంబానికి అదృష్టంగా, ఆశాకిరణంగా మారాలని ఆకాంక్షిస్తున్నా" అని మమతా బెనర్జీ తన పోస్టులో పేర్కొన్నారు.

మరోవైపు తేజస్వీ యాదవ్ సోదరి కూడా నెట్టింట పోస్ట్ పెట్టారు. అందులో తేజస్వీ యాదవ్ వీడియో కాల్లో మాట్లాడుతూ.. తన బిడ్డను తండ్రి, సోదరికి చూపించారు. అప్పుడే మీకు మనవడు ఉన్నాడు అని లాలూతో చెప్పారు. ప్రస్తుతం ఈ వీడియో సైతం నెట్టింట వైరల్ అవుతోంది. కాగా, తేజస్వీ యాదవ్ - రాజశ్రీలకు 2021 డిసెంబరులో వివాహం జరిగింది. వీరికి 2023 మార్చిలో తొలి సంతానంగా ఆడ బిడ్డ పుట్టింది. ఆ పాపకు కాత్యాయిని అని పేరు పెట్టారు. ఇప్పుడు రెండో సంతానంగా మగ బిడ్డ జన్మించాడు. వారసుడి రాకతో లాలూ కుటుంబం సంబరాలు చేసుకుంటోంది.