ఐపీఎల్ 2025 ఫైనల్లో ‘ఆపరేషన్ సిందూర్’ స్పెషల్
sports | Suryaa Desk | Published : Tue, May 27, 2025, 09:05 PM
ఐపీఎల్ 2025లో లీగ్ దశ మ్యాచ్లు ఇవాళ్టితో ముగియనున్నాయి. వాస్తవానికి టోర్నీ తొలుత ప్రకటించిన షెడ్యూల్ ప్రకారం జరిగి ఉంటే.. మే 25నే ఫైనల్ మ్యాచ్ జరగాల్సింది. కానీ భారత్, పాకిస్థాన్ మధ్య ఉద్రిక్తతల కారణంగా లీగ్ వారం పాటు వాయిదా పడింది. ఆ తర్వాత మే 17 నుంచి పునఃప్రారంభమైంది. తాజా షెడ్యూల్ ప్రకారం జూన్ 3న గుజరాత్ అహ్మదాబాద్లోని నరేంద్రమోదీ క్రికెట్ స్టేడియంలో ఐపీఎల్ ఫైనల్ మ్యాచ్ జరగనుంది.
ఇక ఈ మ్యాచ్ కోసం బీసీసీఐ భారీ ఏర్పాట్లు చేస్తోంది. సరిగ్గా వారం రోజుల్లో ఈ మెగా మ్యాచ్ జరగనుంది. సాధారణంగా ఎప్పుడైనా ఫైనల్ మ్యాచ్కు ముందు ముగింపు వేడుకను నిర్వహిస్తారు. అయితే ఈసారి మాత్రం ఆ కార్యక్రమం ప్రత్యేకత సంతరించుకోనుంది. ఈ సారి వేడుకల్లో ఉగ్రవాదంపై భారత్ చేపట్టిన ఆపరేషన్ సింధూర్ విజయాన్ని సెలబ్రేట్ చేయాలని బీసీసీఐ డిసైడ్ అయింది. ఈ మేరకు భారత సాయుధ దళాలకు బీసీసీఐ ఆహ్వానం పంపింది. ఈ విషయాన్ని బీసీసీఐ కార్యదర్శి దేవజిత్ సైకియా వెల్లడించారు.
“పాకిస్థాన్తో ఉద్రిక్తల మధ్య ఆపరేషన్ సిందూర్ సమయంలో మన సాయుధ దళాలు ప్రదర్శించిన శౌర్య, పరాక్రమాలు ఎంతో మందికి స్ఫూర్తిదాయకం. అందుకే.. ఐపీఎల్ 2025 ముగింపు వేడుకలను మన సాయుధ దళాలను గౌరవించుకునేందుకు అంకితమివ్వాలని డిసైడ్ అయ్యాం. ఆర్మీ చీఫ్ జనరల్ ఉపేంద్ర ద్వివేది, నేవీ చీఫ్ అడ్మిరల్ దినేశ్ కె.త్రిపాఠి, వాయుసేనాధిపతి ఎయిర్ చీఫ్ మార్షల్ అమర్ ప్రీత్ సింగ్, మిలిటరీ టాప్ ర్యాంక్ అధికారులు, పలువురు జవాన్లను ముగింపు వేడుకకు మేం ఆహ్వానించాం” అని బీసీసీఐ కార్యదర్శి వెల్లడించారు.
జమ్ముకశ్మీర్లోని పహల్గాం ఉగ్రదాడిలో 26 మంది చనిపోయిన విషయం తెలిసిందే. దీనికి ప్రతీకారంగా భారత్ ఆపరేషన్ సిందూర్ చేపట్టి పాకిస్థాన్లోని 100 మందికి పైగా ఉగ్రవాదులను మట్టుబెట్టింది. ఈ విజయాన్ని సెలబ్రేట్ చేసుకోవాలని బీసీసీఐ నిర్ణయం తీసుకుంది. జూన్ 3న నరేంద్రమోదీ స్టేడియంలో ఫైనల్ మ్యాచ్ జరగనుంది. పంజాబ్ కింగ్స్, గుజరాత్ టైటాన్స్, ఆర్సీబీ, ముంబై ఇండియన్స్ జట్లు ప్లే ఆఫ్స్ చేరాయి
|
|