కర్ణాటకలో ఒక్కటైన కాంగ్రెస్ బీజేపీ.. కమల్ హాసన్‌పై ఫైర్

తమిళం నుంచి కన్నడ భాష పుట్టింది అంటూ.. చెన్నైలో నిర్వహించిన ఒక సినిమా వేడుకలో మక్కల్ నీది మయ్యం పార్టీ అధినేత, సినీ నటుడు కమల్ హాసన్ చేసిన వ్యాఖ్యలతో కన్నడ సంఘాలు, కర్ణాటకలోని రాజకీయ పార్టీలు, ఇతర వర్గాల నుంచి తీవ్ర వ్యతిరేకత వ్యక్తం అవుతోంది. అసలే మన దేశంలో కన్నడ, తమిళం అంటే ఆ రాష్ట్రాల ప్రజల్లోనే కాకుండా రాజకీయాల్లో ఎంతో భాషాభిమానం ఉంటుంది. అలాంటిది.. ఒక సినీ నటుడు, పైగా రాజకీయ నేతగా ఉన్న కమల్ హాసన్.. కన్నడ భాషపై చేసిన వ్యాఖ్యలతో ఆ రాష్ట్రంలో ఇప్పుడు తీవ్ర వ్యతిరేకత వ్యక్తం అవుతోంది. అయితే గతంలో కూడా కమల్ హాసన్.. కన్నడ భాషను అవమానించారని పలువురు తీవ్ర ఆగ్రహావేశాలు వ్యక్తం చేస్తున్నారు.

తాజాగా కన్నడ భాషపై కమల్ హాసన్ చేసిన వ్యాఖ్యల నేపథ్యంలో కర్ణాటకలో ఒక ఆసక్తికరమైన పరిణామం చోటు చేసుకుంది. అధికార కాంగ్రెస్ పార్టీ, ప్రతిపక్ష బీజేపీ పార్టీలు ఏకాభిప్రాయంతో కమల్ హాసన్ వ్యాఖ్యలను తీవ్రంగా ఖండించాయి. కమల్ చేసిన వ్యాఖ్యలు కన్నడ అస్తిత్వాన్ని అవమానించేవిగా ఉన్నాయని అభివర్ణించాయి. ఈ వ్యవహారంపై స్పందించిన కర్ణాటక ముఖ్యమంత్రి సిద్ధరామయ్య.. కన్నడకు సుదీర్ఘ చరిత్ర ఉందని.. పాపం కమల్ హాసన్‌కు దాని గురించి తెలియదని ఎద్దేవా చేశారు.

ఇక బీజేపీ ఎమ్మెల్యే, కర్ణాటక అసెంబ్లీలో ప్రతిపక్ష నేత ఆర్ అశోక.. కమల్ హాసన్ ఒక మానసిక రోగి అని పేర్కొన్నారు. కన్నడ భాష సాంస్కృతిక గుర్తింపును అవమానిస్తున్నారని మండిపడ్డారు. కమల్ హాసన్ కన్నడ భాషను, కర్ణాటకవాసులను పదేపదే అగౌరవపరుస్తున్నారని ఆరోపించారు. కమల్ హాసన్ సినిమాలు అన్నింటినీ కర్ణాటకలో బహిష్కరించాలని సిద్ధరామయ్య సర్కార్‌ను కోరుతున్నానని.. లేకపోతే అతడు మెంటల్ పేషంట్‌లా ప్రవర్తిస్తూనే ఉంటాడని ఆర్ అశోక తీవ్ర వ్యాఖ్యలు చేశారు.

మరోవైపు.. కమల్ హాసన్ వ్యాఖ్యలపై కన్నడ అనుకూల సంఘాలు, సాంస్కృతిక కార్యకర్తలు సహా వివిధ వర్గాలలో తీవ్ర ఆగ్రహం వ్యక్తం చేస్తున్నాయి. చేసిన వ్యాఖ్యలకు వెంటనే కమల్ హాసన్ వివరణ ఇచ్చి.. క్షమాపణ చెప్పాలని డిమాండ్ చేస్తున్నాయి.

మరోవైపు.. ఇప్పటికే ఈ వ్యవహారంపై స్పందించిన కర్ణాటక రాష్ట్ర బీజేపీ అధ్యక్షుడు బి.వై. విజయేంద్ర.. మరొక భాషను అగౌరవంగా చూపడం అనాగరిక ప్రవర్తన అని ఎక్స్‌లో ట్వీట్ చేశారు. ముఖ్యంగా సినిమా రంగంలో ఉన్నవారు ప్రతి భాషను గౌరవించే సంస్కృతిని కలిగి ఉండాలని.. కన్నడతో సహా అనేక భారతీయ భాషల్లో నటించిన కమల్ హానస్.. తమిళ భాషను కీర్తించడంలో భాగంగా కన్నడను అవమానించడం అహంకారం, గర్వానికి పరాకాష్ట అని విజయేంద్ర పేర్కొన్నారు.

తమిళనాడు బీజేపీ నాయకురాలు తమిళిసై సౌందరరాజన్ కూడా ఈ వివాదంపై స్పందించారు. తాను ఒక తమిళ వ్యక్తిని భారతీయురాలిని అని గర్విస్తానని.. అయితే భాషల గురించి అభిప్రాయాన్ని వ్యక్తం చేసేటప్పుడు జాగ్రత్తగా ఉండాలని సూచించారు. ప్రాక్టికల్‌గా ఉండాలని.. అది వివాదాస్పదంగా మారకుండా చూసుకోవాలని హితవు పలికారు. డీఎంకే పార్టీని ప్రసన్నం చేసుకునేందుకు కమల్ హాసన్ ఇతర భాషలను విమర్శిస్తారని తమిళిసై మండిపడ్డారు.