ట్రంప్ బిల్లుకు వ్యతిరేకంగా మస్క్ వ్యాఖ్యలు

అమెరికా అధ్యక్ష ఎన్నికల ప్రచారం ముందు నుంచి డొనాల్డ్ ట్రంప్‌కు మద్దతుగా టెస్లా, స్పేస్ఎక్స్, ఎక్స్ సంస్థల అధినేత ఎలాన్ మస్క్.. భారీగా ప్రచారం నిర్వహించిన సంగతి తెలిసిందే. ఇక అమెరికా అధ్యక్షుడిగా బాధ్యతలు చేపట్టిన డొనాల్డ్ ట్రంప్.. తన పాలనలో ఎలాన్ మస్క్‌కు కీలక పదవి అప్పగించారు. వీరిద్దరూ కలిసి అమెరికా పాలనకు సంబంధించి కీలక నిర్ణయాలు తీసుకుంటున్నారు. అయితే అమెరికా ప్రభుత్వ ఖజానా నుంచి వృథాగా పోతున్న వ్యయాన్ని తగ్గించేందుకు డొనాల్డ్ ట్రంప్ కీలక నిర్ణయం తీసుకున్న సంగతి తెలిసిందే. అమెరికా అధ్యక్షుడిగా పగ్గాలు చేపట్టిన వెంటనే డిపార్ట్‌మెంట్ ఆఫ్ గవర్నమెంట్ ఎఫీషియన్సీ-డోజ్‌ను ఏర్పాటు చేసిన డొనాల్డ్ ట్రంప్.. దాని బాధ్యతలను ఎలాన్ మస్క్‌కు అప్పగించారు. అమెరికా ప్రభుత్వ వ్యవస్థలో పూర్తిగా మార్పులు, ప్రభుత్వంలోని వృథా ఖర్చులు తగ్గించడమే డోజ్ విధి. దీంతో చాలా మంది ప్రభుత్వ ఉద్యోగులను తొలగించాలని ట్రంప్‌కు డోజ్ సూచించింది. అయితే ట్రంప్ ప్రభుత్వంలో మస్క్‌ జోక్యం ఎక్కువ అవుతోందనే విమర్శలు వచ్చినప్పటికీ ట్రంప్‌ అవేమీ పట్టించుకోలేదు.

అయితే అమెరికా అధ్యక్షుడు డొనాల్డ్ ట్రంప్ మద్దతుతో హౌస్ రిపబ్లికన్లు ఆమోదించిన వన్ బిగ్ బ్యూటిఫుల్ బిల్లుపై ఎలాన్ మస్క్ తన నిరాశను వ్యక్తం చేశారు. ఈ భారీ వ్యయ బిల్లు.. బడ్జెట్ లోటును పెంచుతుందని ఆయన ఆరోపిస్తున్నారు. ఫలితంగా డోజ్ బృందం చేస్తున్న పని మొత్తం వృథా అని మస్క్ ఆవేదన చెందుతున్నారు. ఒక న్యూస్ ఛానెల్‌ ఇంటర్వ్యూలో మాట్లాడిన మస్క్.. వన్ బిగ్ బ్యూటిఫుల్ బిల్లుపై తీవ్ర విమర్శలు గుప్పించారు. బడ్జెట్ లోటును తగ్గించకుండా పెంచే భారీ వ్యయ బిల్లును చూసి తాను తీవ్ర నిరాశ చెందినట్లు తెలిపారు. ప్రస్తుతం ఈ బిల్లు సెనేట్ ఆమోదం కోసం ఎదురుచూస్తోంది. 2017 పన్ను తగ్గింపులను పొడిగించడం.. సరిహద్దు వ్యయాన్ని పెంచడం, క్లీన్ ఎనర్జీ క్రెడిట్‌లను తగ్గించడం, మెడికేడ్ పని అవసరాలను అమలు చేయడం వంటి పనులను ట్రంప్ చేస్తున్నారు.

ట్రంప్ తీసుకొచ్చిన బిల్లును బహిరంగంగా మస్క్ వ్యతిరేకించడంతో.. ట్రంప్-మస్క్ బ్రొమాన్స్‌ ముగిసిందా అని ఇంటర్నేషనల్ న్యూస్ ఛానెల్స్ అనుమానాలు వ్యక్తం చేస్తున్నాయి. అయితే తాజా మస్క్ ఇంటర్వ్యూకు సంబంధించిన పూర్తి ఎపిసోడ్ జూన్‌ 1వ తేదీన ప్రసారం కానుండటంతో.. ఆయన మాట్లాడిన అంశాలపై పూర్తి వివరాలు ఆరోజు బయటికి వచ్చే అవకాశాలు ఉన్నాయి. తాజా బిల్లుతో అమెరికాలో ద్రవ్యలోటు పెరుగుతుందని నిపుణులు చెబుతున్నారు. ఎన్నికల వేళ ద్రవ్యలోటును తగ్గిస్తానని హామీ ఇచ్చిన ట్రంప్ ఇప్పుడు ఇలాంటి నిర్ణయాలు తీసుకోవడంపై అమెరికాలోని మదుపరుల్లో తీవ్ర ఆందోళన నెలకొంది. ఈ క్రమంలోనే ఈ బిల్లుపై ఎలాన్‌ మస్క్‌ వ్యతిరేకత వ్యక్తం చేస్తున్నట్లు తెలుస్తోంది.

 డోజ్ ఏర్పాటు చేసిన మొదట్లో.. ట్రంప్ పాలనలో మస్క్ కీలక పాత్ర పోషించారు. ప్రభుత్వ సంస్థల్లో బడ్జెట్ కోతలను అమలు చేసేందుకు డోజ్ వేగంగా పనిచేశారు. అయితే ప్రస్తుతం టెస్లా, స్పేస్‌ఎక్స్, ఎక్స్ సంస్థలకు సీఈఓగా ఉన్న ఎలాన్ మస్క్.. అమెరికా ప్రభుత్వ వ్యవహారాల్లో తన ప్రమేయాన్ని తగ్గించుకోవాలని భావిస్తున్నట్లు తెలుస్తోంది. ఏప్రిల్ నెలలో టెస్లా అమ్మకాలు 3 ఏళ్లలో తీవ్ర కనిష్ట స్థాయికి పడిపోయాయి. ఈ క్రమంలోనే తన కంపెనీలపై దృష్టి పెట్టేందుకు డోజ్‌కు కొంత దూరంగా ఉన్నట్లు అర్థం అవుతోంది. డోజ్ నుంచి వైదొలుగుతానని కూడా ఎలాన్ మస్క్ కూడా చెప్పడం గమనార్హం. మరోవైపు.. డోజ్ నుంచి మస్క్ నిష్క్రమించే విషయాన్ని డొనాల్డ్ ట్రంప్ కూడా ధృవీకరించారు.