కుమారుడికి సీటు ఇవ్వలేదనే ట్రంప్ హార్వర్డ్‌పై కక్ష సాధిస్తున్నారా

 అగ్రరాజ్యం అమెరికా అధ్యక్షుడు డొనాల్డ్ ట్రంప్ హార్వర్డ్ విశ్వవిద్యాలయం విషయంలో చాలా కఠినంగా వ్యవహరిస్తున్నారు. ఇప్పటికే బడ్జెట్, పన్ను మినహాయింపుల్లో కోతలు విధించిన విషయం అందరికీ తెలియగా.. ఆ తర్వాత కొన్ని రోజులకే విదేశీ విద్యార్థులను యూనివర్సిటీలో చేర్చుకోవడానికి ఉన్న అనుమతిని సైతం రద్దు చేస్తున్నట్లు ప్రకటించారు. దీంతో కావాలనే ట్రంప్ సదరు యూనివర్సిటీపై కక్ష సాధిస్తున్నారని వార్తలు వస్తున్నాయి. ఇందుకు కారణాలను కూడా చూపుతూ.. కొందరు నెటిజెన్లు సోషల్ మీడియాలో వార్తలను ప్రచారం చేస్తున్నారు. ముఖ్యంగా ట్రంప్ కుమారుడు బారన్‌కు హార్వర్డ్ సీటు ఇవ్వలేదని, కానీ గతంలో ఒబామా కుమార్తె మలియాకు సీటు ఇచ్చిందని చెప్పుకొస్తున్నారు. మరి ఇందులో నిజం ఎంత ఉందో మనం ఇప్పుడు తెలుసుకుందాం.

అమెరికా అధ్యక్షుడు డొనాల్డ్ ట్రంప్ హార్వర్డ్ యూనివర్సిటీకి అందించే నిధుల్లో ఇటీవలే కోత విధించారు. ఆ తర్వాత కొన్నాళ్లకే విదేశీ విద్యార్థులను చేర్చుకోవడానికి ఉన్న అనుమతిని కూడా రద్దు చేశారు. దీన్ని వ్యతిరేకిస్తూ.. ఇప్పటికే ఈ విశ్వవిద్యాలయం కోర్టులో పిటిషన్ దాఖలు చేసింది. అయితే దీనిపై విచారణ జరిపిన ఫెడరల్ కోర్టు న్యాయమూర్తి.. ట్రంప్ నిర్ణయాన్ని నిలుపుదల చేస్తూ ఆదేశాలు జారీ చేశారు. మరోవైపు యూనివర్సిటీలో విదేశీ విద్యార్థుల వివరాలను తెలుసుకోవాలనుకుంటున్నామని ట్రంప్ పేర్కొన్నారు. ఆయా దేశాలు విద్యార్థుల చదువు కోసం ఎలాంటి సొమ్ము చెల్లించడం లేదని కూడా వ్యాఖ్యానించారు.

ఈక్రమంలోనే సోషల్ మీడియా వేదికగా పలువురు.. ట్రంప్‌పై తీవ్ర విమర్శలు చేస్తున్నారు. కావాలనే ట్రంప్ హార్వర్డ్‌పై కక్ష సాధిస్తున్నారని పేర్కొన్నారు. ముఖ్యంగా ట్రంప్ చిన్న కుమారుడు బారన్‌కు హార్వర్డ్, కొలంబియా, స్టాన్‌ఫోర్ట్ యూనివర్సిటీలు సీటు నిరాకరించడం వల్లే న్యూయార్క్ యూనివర్సిటీ స్టెర్న్ స్కూల్ ఆఫ్ బిజినెస్‌లో ఫైనాన్స్ చదవడానికి అడ్మిషన్ తీసుకున్నట్లు పలువురు నెటిజెన్లు సోషల్ మీడియాలో ప్రచారం చేస్తున్నారు. అలాగే అమెరికా మాజీ అధ్యక్షుడు బరాక్ ఒబామా కుమార్తె మలియా ఒబామాకు హార్వర్డ్ సీటు ఇచ్చిందని తెలిపారు. కానీ బారన్‌కు సీటు ఇవ్వడం నిరాకరించడంతోనే.. ట్రంప్ కక్ష సాధింపు చర్యలు చేపడుతున్నారని పేర్కొన్నారు.

కానీ తాజాగా దీనిపై హార్వర్డ్ విశ్వవిద్యాలయం స్పందించింది. సోషల్ మీడియాలో జరుగుతున్న ఈ ప్రచారాన్ని తీవ్రంగా ఖండించింది. బారన్ తమ యూనివర్సిటీకి దరఖాస్తు కూడా చేసుకోలేదని చెప్పింది. మరోవైపు డొనాల్డ్ ట్రంప్ సతీమణి మెలానియా ట్రంప్ కూడా దీనిపై స్పందించారు. అతడు అసలు హార్వర్డ్‌కు దరఖాస్తు చేయలేదని వివరణ ఇచ్చారు. దీంతో ఈ తప్పుడు వార్తలకు తెర పడినట్లు అయింది.