4 వేల అడుగుల ఎత్తులో విమానాన్ని ఢీకొట్టిన పక్షి

పాట్నా నుంచి రాంచీకి వెళ్తున్న ఓ ఇండిగో విమానాన్ని.. 4 వేల అడుగుల ఎత్తులో ఉండగా ఓ పక్షి ఢీకొట్టింది. దీంతో విమానంలో చిన్న చిన్న పగుళ్లు ఏర్పడ్డాయి. అయితే విషయాన్ని వెంటనే గుర్తించిన పైలెట్లు విమానాన్ని అత్యసవర ల్యాండింగ్ చేశారు. దీంతో విమానానికి పెను ప్రమాదం తప్పింది. ఈ సమయంలో విమానంలో మొత్తంగా 175 మంది ప్రయాణికులు ఉండగా.. అదృష్ట వశాత్తు అంతా క్షేమంగా బయటపడ్డారు. మరోవైపు విమాన నష్టాన్ని ఇంజినీర్లు అంచనా వేస్తున్నారు.

బీహార్ రాజధాని పాట్నా నుంచి ఓ ఇండిగో విమానం జార్ఖండ్ రాజధాని రాంచీకి బయలు దేరింది. అయితే అందులో 175 మంది ప్రయాణికులు ఉన్నారు. అందరూ ఎక్కిన తర్వాత సిబ్బంది విమానాన్ని టేకాఫ్ చేశారు. ఆతర్వాత గంటకు విమానం 4000 మీటర్ల ఎత్తుకు చేరుకుంది. ఈ సమయంలో ఓ రాబందు వచ్చి విమానాన్ని ఢీకొట్టింది. ఒక్కసారిగా వచ్చి బలంగా తాకేసరికి విమానంలో చిన్న చిన్న పగుళ్లు ఏర్పడ్డాయి. విషయం గుర్తించిన పైలెట్లు వెంటనే విమానాన్ని అత్యవసర ల్యాండింగ్ చేయాలనుకున్నారు. అందుకోసం బిర్సా ముండు విమానాశ్రయానికి ముందస్తు సమాచారం అందించారు.

దీంతో వాళ్లు కూడా ఓకే చెప్పగా.. వెంటనే సిబ్బంది విమానాన్ని అక్కడే అత్యవసర ల్యాండింగ్ చేశారు. ఈ విషయాన్ని నేరుగా విమానాశ్రయ అధికారి వెల్లడించారు. అయితే ప్రమాద సమయంలో విమానంలో 175 మంది ప్రయాణికులు ఉండగా.. వారంతా క్షేమంగా బయటకు వచ్చారని చెప్పారు. పైలెట్లు వెంటనే స్పందించడం వల్లే పెను ప్రమాదం తప్పిందని పేర్కొన్నారు. ఏమాత్రం అలసత్వం ప్రదర్శించినా భారీ ప్రమాదం జరిగేదని.. సిబ్బంది సహా ప్రయాణికులు అంతా ప్రాణాలు కోల్పోవాల్లి వచ్చేదని వివరించారు. మరోవైపు పక్షి ఢీకొట్టడం వల్ల విమానానికి జరిగిన డ్యామేజీని ఇంజినీర్లు అంచనా వేస్తున్నారు.

మరోవైపు ఆదివారం రోజు ఢిల్లీ చేరుకున్న ఓ ఇండిగో విమానం తీవ్ర వాతావరణ కారణంగా అల్లకల్లోలానికి గురైంది. దీంతో కొంతసేపు విమానం గాల్లోనే చక్కర్లు కొట్టింది. ఆ తర్వాత కాసేపటికే.. అదృష్టవశాత్తు క్షేమంగా ల్యాండ్ అయింది. ప్రయాణికులు సహా విమాన సిబ్బంది ప్రాణాలతో బయట పడ్డారు.