బెంగళూరు తొక్కిసలాట.. రూ.10 లక్షల ఎక్స్‌గ్రేషియా

18 ఏళ్ల సుదీర్ఘ ఎదురుచూపుల తర్వాత ఐపీఎల్ టైటిల్ దక్కించుకున్న రాయల్ ఛాలెంజర్స్ బెంగళూరు విక్టరీ పరేడ్.. తీవ్ర విషాదాన్ని నింపింది. బెంగళూరులోని చోటు చేసుకుని పలువురు మృతి చెందిన సంగతి తెలిసిందే. మరికొందరు గాయపడగా.. వారిలో కొందరు ఐసీయూలో చావుబతుకుల మధ్య కొట్టుమిట్టాడుతున్నారు. తాజాగా ఈ తొక్కిసలాట ఘటనలో చికిత్స పొందుతున్న వారిని కర్ణాటక ముఖ్యమంత్రి సిద్ధరామయ్య.. స్వయంగా ఆస్పత్రులకు వెళ్లి పరామర్శించారు. అనంతరం మీడియా సమావేశం నిర్వహించిన సీఎం సిద్ధరామయ్య.. జరిగిన ఘటన గురించి కీలక వివరాలు వెల్లడించారు. అంతకుముందే కర్ణాటక డిప్యూటీ సీఎం డీకే శివకుమార్ ఈ ఘటనపై మీడియాకు వివరాలు తెలిపారు.

ఆర్సీబీ విజయోత్సవాల వేళ ఇలాంటి పరిణామాలు చోటు చేసుకోవడం తీవ్ర బాధాకరమైన విషయమని సీఎం సిద్ధరామయ్య అన్నారు. మృతుల కుటుంబ సభ్యులకు ముఖ్యమంత్రి ప్రగాఢ సానూభూతి తెలిపారు. ఈ ఘటనపై న్యాయ విచారణకు ఆదేశిస్తున్నట్లు వెల్లడించారు. ఆర్సీబీ విజయోత్సవాలకు ఇంత భారీ స్థాయిలో అభిమానులు తరలివస్తారని తమ ప్రభుత్వం ఊహించలేదని పేర్కొన్నారు.

ఇక ఈ తొక్కిసలాట ఘటనలో 11 మంది చనిపోయినట్లు సీఎం సిద్ధరామయ్య ప్రకటించారు. మరో 33 మందికి గాయాలు అయ్యాయని.. వారంతా వివిధ ఆస్పత్రుల్లో చికిత్స పొందుతున్నట్లు పేర్కొన్నారు. తొక్కిసలాట ఘటన గురించి విని తాము షాక్ అయ్యామని.. ఈ విషాద ఘటన విజయానందాన్ని తుడిచిపెట్టేసిందని సీఎం తీవ్ర ఆవేదన వ్యక్తం చేశారు.

చిన్నస్వామి స్టేడియంలో ప్రేక్షకుల కెపాసిటీ 35 వేలు కాగా.. 2 లక్షల నుంచి 3 లక్షల మంది అభిమానులు పోటెత్తినట్లు కర్ణాటక సీఎం తెలిపారు. అయితే తాము 35 వేలు లేదా అంతకంటే కొంచెం మంది ఎక్కువగా వస్తారని అంచనా వేశామని.. కానీ లక్షల మంది పోటెత్తుతారని అంచనా వేయలేదని వెల్లడించారు. చిన్నస్వామి స్టేడియం ఘటనలో చనిపోయిన వారి కుటుంబ సభ్యులకు రూ.10 లక్షల చొప్పున కర్ణాటక సీఎం సిద్ధరామయ్య పరిహారం ప్రకటించారు. గాయపడిన వారికి మెరుగైన వైద్యాన్ని ఉచితంగా అందిస్తామని హామీ ఇచ్చారు. చనిపోయిన వారిలో ఎక్కువ మంది యువతే ఉన్నారని ముఖ్యమంత్రి వెల్లడించారు.