ఇన్‌స్టాలో బ్యాన్ చేశారని.. ఐపీఎల్ పై ఆర్సీబీ మాజీ ఓనర్ కొడుకు ఫైర్

రాయల్ ఛాలెంజర్స్ బెంగళూరు (ఆర్సీబీ) సూదీర్ఘ నిరీక్షణకు తెరదించుతూ ఐపీఎల్ 2025 టైటిల్‌ను గెలుచుకుంది. విరాట్ కోహ్లి, జట్టు యజమానులు, అభిమానులు 18 ఏళ్లుగా ఈ విజయం కోసం ఎదురు చూశారు. ఎట్టకేలకు జట్టు గెలవడంతో ఆర్సీబీ అభిమానలందరూ సంబరాల్లో మునిగి తేలారు. అందరిలాగే విజయ్ మాల్యా కొడుకు సిద్ధార్థ్ మాల్యా కూడా సంతోషించారు. తన సంతోషాన్ని ఇన్స్‌స్టాగ్రామ్‌లో ఓ వీడియో పోస్ట్ చేసి షేర్ చేసుకున్నారు. అయితే ఆ విడియోను ఇన్‌స్టాగ్రామ్ కాపీరైట్ సమస్య అని పేర్కొంటూ తొలగించింది. దీనిపై తాజాగా సిధార్థ్ మాల్యా స్పందించారు. ఇలా చేసిందుకు బీసీసీఐ, ఐపీఎల్ యాజమాన్యంపై ఆగ్రహం వ్యక్తం చేశారు.

బీసీసీఐ, ఐపీఎల్ తీరును నిరసిస్తూ తాజాగా సిద్ధార్థ్ ఓ పోస్టు పెట్టారు. అందులో తన బాధను వెల్లడించారు. కాపీరైట్ ఉల్లంఘన కారణంగా తనను ఇన్‌స్టాగ్రామ్‌లో పోస్ట్‌లు చేయకుండా నిషేధించారని తెలిపారు. ఇలా ఎందుకు జరిగిందో అని నేను లోతుగా తెలుసుకుంటున్న క్రమంలో ఐపీఎల్ యాజమాన్యమే తన వీడియోను తీసేయమని చెప్పిందని తెలుసుకున్నట్లు వెల్లడించారు.

"కొన్ని కారణం వల్ల, ఇన్‌స్టాగ్రామ్ నా వీడియోను తీసివేసింది. నన్ను యాప్‌లో ఏం పోస్ట్ చేయకుండా బ్యాన్ చేసింది" అని తెలిపారు. "నిన్ననే (జూన్ 9) నా బ్యాన్ ఎత్తివేశారు. ఆ విషయం గురించి నేను తెలుసుకున్నాను. ఐపీఎల్‌కు సంబంధించిన వారే నా వీడియోను తీసేయమని ఇన్‌స్టాగ్రామ్‌కు చెప్పారు. నేను వారి కాపీరైట్ రూల్స్‌ను ఉల్లంఘించానని వారు అన్నారు. ఇది నాకు చాలా ఆశ్చర్యంగా ఉంది. ఆ వీడియో నిమిషం కంటే తక్కువగానే ఉంది. నా గురించి, నా భావాల గురించి వ్యక్తం చేసేందుకు ఆ వీడియో పెట్టాను. ఆర్సీబీ విక్టరీని నేను సెలబ్రేట్ చేసుకోకుండా, నన్ను అభిమానులతో మాట్లాడకుండా చేయడం చాలా బాధాకరం. ఐపీఎల్ ఇలా చేయడం తప్పు. కానీ, ఏం చేయలేం" అని చెప్పుకొచ్చారు సిద్ధార్థ్ మాల్యా .

అంతేకాకుండా ఇన్‌స్టా నుంచి తన వీడియోను తొలగించిన విషయంలో ఐపీఎల్‌పై విమర్శలు గుప్పించారు. అది చాలా చిన్న వీడియో అని.. అందులో తన వ్యక్తిగత భావాలు మాత్రమే వ్యక్తం చేశానని చెప్పారు. ఐపీఎల్ కావాలనే తన సంతోషాన్ని దూరం చేసిందని ఆరోపించారు. ఈ సంఘటనపై సోషల్ మీడియాలో భిన్నాభిప్రాయాలు వ్యక్తం అయ్యాయి. కొందరు సిద్ధార్థ్ మాల్యాకు మద్దతుగా నిలిచారు. కొందరు ఐపీఎల్ అతిగా ప్రవర్తిస్తోందని విమర్శించగా.. మరికొందరు మాత్రం ఐపీఎల్ నిర్ణయాన్ని సమర్థించారు. కాపీరైట్ రూల్స్‌ను అందరూ పాటించాలని అన్నారు.