ఆర్సీబీ కొనుగోలు వార్తలను కొట్టిపారేసిన కర్ణాటక డిప్యూటీ సీఎం

ఐపీఎల్ ఫ్రాంచైజీ రాయల్ ఛాలెంజర్స్ బెంగళూరు  తాను కొనుగోలు చేయబోతున్నానంటూ వస్తున్న వార్తలను కర్ణాటక ఉప ముఖ్యమంత్రి డీకే శివకుమార్ తీవ్రంగా ఖండించారు. ఈ ఊహాగానాల్లో ఎలాంటి వాస్తవం లేదని ఆయన స్పష్టం చేశారు. 2025లో ఆర్సీబీ జట్టు తొలిసారిగా ఐపీఎల్ టైటిల్ గెలుచుకున్న తర్వాత ఫ్రాంచైజీ యాజమాన్యం మారబోతోందంటూ పెద్ద ఎత్తున ప్రచారం జరిగింది. ఈ నేపథ్యంలోనే డీకే శివకుమార్ పేరు కూడా తెరపైకి వచ్చింది.బుధవారం మీడియాతో మాట్లాడిన డీకే శివకుమార్ ఈ వదంతులపై తనదైన శైలిలో స్పందించారు. "నాకు ఆర్సీబీ ఎందుకు నేను రాయల్ ఛాలెంజ్ విస్కీ బ్రాండ్ పేరును ప్రస్తావిస్తూ కూడా తాగను కదా" అని ఆయన చమత్కరించారు. "ఐపీఎల్ ఫ్రాంచైజీని కొనడానికి నేనేమీ పిచ్చివాడిని కాను. నాకు అలాంటి ఆలోచనే లేదు" అని ఆయన తేల్చిచెప్పారు. ఈ వ్యాఖ్యలతో రాజకీయ వర్గాల్లో, క్రికెట్ అభిమానుల్లోనూ జరుగుతున్న చర్చకు ఆయ‌న తెరదించారు.ఆర్సీబీ 18 ఏళ్ల సుదీర్ఘ నిరీక్షణ తర్వాత ఐపీఎల్ ట్రోఫీని కైవసం చేసుకోవడం, ఆ తర్వాత బెంగళూరులో జరిగిన విజయోత్సవ సంబరాల్లో విషాదం చోటుచేసుకోవడం తెలిసిందే. ఈ సంబరాల్లో జరిగిన తొక్కిసలాటలో పలువురు మరణించారు. ఈ పరిణామాల నేపథ్యంలో జట్టు యాజమాన్యం మారవచ్చనే ఊహాగానాలు మొదలయ్యాయి. ప్రస్తుత యజమాని డయాజియో ఇండియా, ఆర్సీబీ ఫ్రాంచైజీని విక్రయించాలని యోచిస్తున్నట్లు కూడా వార్తలు వచ్చాయి.అయితే, ఈ వార్తలను డయాజియో ఇండియా కూడా ఖండించింది. బాంబే స్టాక్ ఎక్స్ఛేంజ్‌కు ఇచ్చిన అధికారిక ప్రకటనలో ఆర్సీబీ అమ్మకం వార్తలు కేవలం ఊహాజనితమైనవి అని, ఫ్రాంచైజీని విక్రయించేందుకు ప్రస్తుతం ఎలాంటి చర్చలు జరగడం లేదని స్పష్టం చేసింది. ఇక‌, ఇటీవల ఆర్సీబీ జట్టు ఐపీఎల్ విజయం సాధించి బెంగళూరుకు తిరిగి వచ్చినప్పుడు, విమానాశ్రయంలో విరాట్ కోహ్లీ, కెప్టెన్ రజత్ పాటిదార్ వంటి ఆటగాళ్లకు స్వాగతం పలికిన వారిలో శివకుమార్ కూడా ఉన్నారు. అయితే, అది కేవలం ఒక అధికారిక కార్యక్రమమేనని, అంతకుమించి జట్టుతో తనకు ఎలాంటి సంబంధం లేదని ఆయన తాజా ప్రకటనలో స్పష్టం చేశారు. డీకే శివకుమార్‌తో పాటు డయాజియో ఇండియా కూడా అమ్మకం వార్తలను తోసిపుచ్చడంతో ఈ వదంతులకు ఇక తెరపడినట్లే.