ఒకే ఒక్క యూటర్న్.. అతడిని బయట పడేసింది

అహ్మదాబాద్ విమాన ప్రమాదం సృష్టించిన విషాదం, భయం నగర వాసుల గుండెల్లో ఇంకా మెదులుతూనే ఉంది. వందలాది మంది అమాయక ప్రజల ప్రాణాలు గాల్లో కలిసిపోగా.. మృత్యువు అంచుల వరకూ వెళ్లి త్రుటిలో తప్పించుకున్న ఓ వ్యక్తి కథ ఇప్పుడు నెట్టింట వైరల్ అవుతోంది. ముఖ్యంగా ఆయన తీసుకున్న ఒక్క యూటర్న్‌తో ప్రాణాలతో బయటపడగా.. ఆ ఘటనను గుర్తు చేసుకుంటూ తన అంత అదృష్టవంతుడు ప్రపంచంలోనే ఎవరూ ఉండరని చెప్పుకొస్తున్నారు. సెకన్ల వ్యవధిలోనే తాను మరణం నుంచి బయట పడిన క్షణాలను అందరికీ వివరిస్తున్నారు.

53 ఏళ్ల వయసు కల్గిన రష్మీ చౌహాన్ రియల్ ఎస్టేట్ డెవలపర్‌గా పని చేస్తున్నారు. అయితే ఎప్పటిలాగే గురువారం రోజు మధ్యాహ్నం కూడా తన ఎస్‌యూవీ కారులో పని నిమిత్తం బయటకు వచ్చారు. ముఖ్యంగా అహ్మదాబాద్‌లోని ఘోడా క్యాంప్ వెనక దారిలో ప్రయాణిస్తున్నారు. నిత్యం ఆ రోడ్డంతా రద్దీగా ఉంటుంది. దీంతో ఆయన రోడ్డుపై కాస్త మెళ్లిగా వెళ్తున్నారు. ఈ సమయంలో ఒక్కసారిగా టేకాఫ్ అయిన విమానం భారీ శబ్దం చేస్తూ కుప్పకూలింది. ఒక్కసారిగా పెద్ద ఎత్తున శబ్దం రాగా ఏమైందోనని ముందుకు వంగి చూశాడు రష్మీ చౌహాన్.

విమాన శకలాలన్నీ తన వైపు దూసుకువస్తూ కనిపించాయి. దీంతో వెంటనే తన కారును యూటర్న్ తీసుకున్నారు. ఒక్క సెకన్ కూడా ఆగకుండా తన కారును వేగంగా ముందుకు పోనిచ్చారు. అయినప్పటికీ కొన్ని విమాన శకలాలు వచ్చి అతడి కారుపై పడ్డాయి. అయినా జంకకుండా కారును నడుపుతూనే ఉన్నారు. ఇలా అర కిలోటమీటరు వరకు ముందుకు వెళ్లాక కారు ఆపి కిందకు దిగారు. సెకన్లలో ప్రాణాలతో బయటపడడాన్ని గుర్తు చేసుకుని తెగ సంబురపడిపోయారు. కానీ ఆ భారీ శబ్దం, పేలుడు ఘటనను గుర్తు చేసుకుంటూ తీవ్ర భయాందోళనకు గురయ్యారు.

ఇందుకు సంబంధించిన వీడియో సోషల్ మీడియాలో తెగ వైరల్ అవుతుడంగా.. అంతా ఆశ్చర్య పోతున్నారు. సెకన్లలోనే ప్రమాదం నుంచి బయట పడ్డావంటే నీవు చాలా అదృష్టవంతుడివి అంటూ కామెంట్లు చేస్తున్నారు. ముఖ్యంగా ఈ ప్రమాదం గురించి రష్మీ చౌహాన్ మాట్లాడుతూ.. "నేను ప్రపంచంలోనే అత్యంత అదృష్ట వంతుడిని. ఆ క్షణంలో నేను సరైన నిర్ణయం తీసుకోకపోతే, ఈరోజు బతికి ఉండేవాడిని కాదు" అని కన్నీళ్లతో, వణుకుతున్న గొంతుతో తెలిపారు. తాను సురక్షితంగా ఉన్నానని తెలిసిన తర్వాత కూడా తన కళ్లముందే ఎంతో మంది అమాయక ప్రాణాలు కోల్పోవడాన్ని జీర్ణించుకోలేకపోయినట్లు చెప్పారు.