అక్రమ వలసదారుల అరెస్టుపై వెనక్కి తగ్గిన ట్రంప్‌

అమెరికాలో అక్రమ వలసదారులపై ఉక్కుపాదం మోపుతున్న డొనాల్డ్ ట్రంప్ ఈ విషయంలో కాస్త వెనకడుగు వేసినట్లు కనిపిస్తోంది. అరెస్టులకు వ్యతిరేకంగా లాస్ ఏంజెలెస్‌ ప్రాంతంలో గత కొన్ని రోజులుగా భారీ ఎత్తున నిరసనలు వెల్లువెత్తుతున్నాయి. అమెరికా వలస సేవలు, సుంకాల విభాగం (ఐసీఈ ) అధికారులు అక్రమ వలసదారులను అరెస్ట్ చేయడాన్ని వ్యతిరేకిస్తూ.. లాస్ ఏంజెలెస్‌లో జరుగుతున్న ఈ ఆందోళనలు తీవ్ర రూపం దాల్చడంతో ప్రపంచవ్యాప్తంగా తీవ్ర చర్చనీయాంశంగా మారాయి. ఈ నేపథ్యంలోనే లాస్ ఏంజెలెస్‌ ఎఫెక్ట్‌తో అమెరికా అధ్యక్షుడు డొనాల్డ్ ట్రంప్ ఈ విషయంలో కాస్త వెనక్కి తగ్గారనే వార్తలు వెల్లువెత్తుతున్నాయి. ఎక్కువ మంది వలసదారులు పనిచేస్తున్న లాస్ ఏంజెలెస్ ప్రాంతంలో బిజినెస్‌లకు ఎలాంటి ఇబ్బందులు కలగకుండా ఉండేలా తొందర్లోనే ఉత్తర్వులను జారీ చేస్తానని ట్రంప్ ఇటీవల పేర్కొన్నారు.

ఈ నేపథ్యంలో లాస్ ఏంజెలెస్‌ ప్రాంతంలో ఉన్న అగ్రికల్చర్ ఫ్యాక్టరీలు, రెస్టారెంట్లు, హోటళ్లలో ఐసీఈ అధికారులు చేస్తున్న తనిఖీలను ఆపేయాలని ట్రంప్ ఆదేశించినట్లు పలు మీడియాల్లో కథనాలు వస్తున్నాయి. ఇమిగ్రేషన్ అండ్ కస్టమ్స్ ఎన్‌ఫోర్స్‌మెంట్‌లోని ఒక సీనియర్‌ అధికారి కూడా ఈ సోదాలను వెంటనే ఆపేయాలని స్థానిక అధికారులకు ఆదేశాలు జారీ చేసినట్లు తెలుస్తోంది. అయితే ఈ ఆదేశాలపై ఇప్పటివరకు ట్రంప్ సర్కార్ నుంచి ఎలాంటి అధికార ప్రకటన వెలువడకపోవడం గమనార్హం.

గత శుక్రవారం లాస్ ఏంజెలెస్‌లోని డౌన్‌టౌన్‌లో ఉంటున్న అక్రమ వలసదారులను అరెస్ట్ చేసేందుకు ఐసీఈ అధికారులు తనిఖీలు చేయడం తీవ్ర ఉద్రిక్తతకు దారి తీసింది. దీంతో లాస్ ఏంజెలెస్‌లో నిరసనలు ప్రారంభం అయ్యాయి. లాస్ ఏంజెలెస్‌లో మొదలైన ఆందోళనలు క్రమ క్రమంగా అమెరికా మొత్తం విస్తరించాయి. ఈ క్రమంలోనే లాస్ ఏంజెలెస్‌లో నిరసనకారులను అదుపు చేసేందుకు ట్రంప్ భారీస్థాయిలో నేషనల్ గార్డ్‌లను అక్కడికి తరలించడంతో ఈ ఉద్రిక్తతలు కాస్తా మరింత ఎక్కువ అయ్యాయి. ఈ నేపథ్యంలోనే ఆందోళన కారులను నిలువరించేందుకు మరో 2000 మంది నేషనల్ గార్డ్‌లను మోహరించాలని ట్రంప్ ఆదేశాలు జారీ చేశారు.

అయితే అక్రమ వలసదారుల విషయంలో డొనాల్డ్ ట్రంప్ తీసుకున్న ఈ చర్యను కాలిఫోర్నియా గవర్నర్ గవిన్ న్యూసమ్, లాస్ ఏంజెలెస్ మేయర్ కరెన్ బాస్ సహా స్థానిక పోలీసు అధికారులు తీవ్రంగా వ్యతిరేకించడం గమనార్హం. కాలిఫోర్నియా గవర్నర్ గవిన్ న్యూసమ్ ఏకంగా ఈ వ్యవహారంపై ఫెడరల్ కోర్టులో పిటిషన్ దాఖలు చేయగా... అధ్యక్షుడు డొనాల్డ్ ట్రంప్ ఇచ్చిన ఆదేశాలు చెల్లవని కోర్టు తేల్చిచెప్పడం గమనార్హం. తాజా పరిణామాలు వలసదారులపై ట్రంప్ అనుసరిస్తున్న విధానాలపై దేశవ్యాప్తంగా కొనసాగుతున్న చర్చ మరింత తీవ్రం అయింది.